ۇكىمەتتىڭ جەر كوميسسياسىنىڭ وتىرىسىندا كوميسسيا توراعاسى، ۆيتسە-پرەمەر-مينيستر،  اۋىلشارۋاشىلىق ءمينيسترى اسقار مىرزاحمەتوۆ اۋىلشارۋاشىلىق جەرلەرىن يەلەنىپ وتىرعاندار تۋرالى اقپاراتتى جاريالاي المايتىنىن، جاريالاۋعا قر «دەربەس دەرەكتەر جانە ولاردى قورعاۋ تۋرالى» زاڭىنىڭ تالاپتارى جول بەرمەيتىنىن العا تارتتى. 

الايدا، اتالعان زاڭ بويىنشا جەكە نەمەسە زاڭدى تۇلعالاردىڭ يەلىگىندەگى نەمەسە جالعا العان جىلجىمايتىن مۇلكى، اتاپ ايتقاندا جەر ۋچاسكەلەرى تۋرالى اقپارات ونىڭ دەربەس دەرەكتەرى رەتىندە كورسەتىلمەگەن.

دەمەك، قازاقستاندىق نەمەسە شەتەلدىك زاڭدى نەمەسە جەكە تۇلعانىڭ اۋىلشارۋاشىلىق جەرلەرىن جالعا الۋى نەمەسە ساتىپ العانى تۋرالى اقپارات، ونىڭ كولەمى، ورنالاسقان جەرى، پايدالانۋ ماقساتى تۋرالى اقپاراتتى جيناۋ نەمەسە تاراتۋ قر «دەربەس دەرەكتەر جانە ولاردى قورعاۋ تۋرالى» زاڭىمەن رەتتەلمەيدى.

كەرىسىنشە، قر «اقپاراتقا قول جەتكىزۋ تۋرالى» زاڭىنىڭ 6-بابىنا سايكەس قول جەتكىزۋگە شەكتەۋ قويىلمايتىن اقپارات قاتارىنا اۋىل شارۋاشىلىعىنىڭ جاي-كۇيى ناقتى كورسەتىلگەن. اۋىل شارۋاشىلىق جەرلەرى تۋرالى اقپارات تىكەلەي اۋىل شارۋاشىلىعىنىڭ جاي-كۇيىنە جاتاتىنىن ەسكەرسەك، اۋىل شارۋاشىلىق جەرلەرى تۋرالى اقپارات بارلىق ادامدارعا قولجەتىمدى بولۋى ءتيىس. 

سوندىقتان، قر اۋىل شارۋاشىلىق مينيسترلىگى قازاقستاندىق نەمەسە شەتەلدىك، جەكە نەمەسە زاڭدى تۇلعالاردىڭ اۋىل شارۋاشىلىق جەرلەرىن ساتىپ الۋى نەمەسە جالعا العانى تۋرالى اقپاراتتى اشىق جاريالاۋعا مىندەتتى.

كەز-كەلگەن ازامات اۋىل شارۋاشىلىق جەرلەرىن پايدالانۋ، جالعا الۋ نەمەسە ساتىپ الۋ تۋرالى اقپاراتتى جيناۋعا جانە تاراتۋعا تولىق قۇقىعى بار. 

قر «اقپاراتقا قول جەتكىزۋ تۋرالى» زاڭىنىڭ 10-بابى بويىنشا اقپاراتقا قول جەتكىزۋ مىناداي تاسىلدەرمەن قامتاماسىز ەتىلەدى: اقپاراتتى بۇقارالىق اقپارات قۇرالدارىندا ورنالاستىرۋ; اقپاراتتى اقپارات يەلەنۋشىنىڭ ينتەرنەت-رەسۋرسىندا ورنالاستىرۋ. 

وسىعان وراي بارلىق ازاماتتاردان ءار وبلىس، اۋدان، اۋىلدارداعى اۋىل شارۋاشىلىق جەرلەرىن پايدالانۋشى جەكە جانە زاڭدى تۇلعالار تۋرالى اقپارات جيناۋدى جانە ونى سايتتاردا، الەۋمەتتىك جەلىلەردە جاريالاۋدى نەمەسە «الاش جولى» قوزعالىسىنىڭ بەلسەندىلەرىنە جولداۋدى سۇرايمىز.

سونىمەن بىرگە، قر اۋىل شارۋاشىلىق مينيسترلىگىنەن بارلىق وبلىستارداعى اۋىل شارۋاشىلىق جەرلەرىنىڭ يەلەرى تۋرالى اقپاراتتى 10 كۇن ىشىندە جاريالاۋدى تالاپ ەتەمىز. 

ەگەر اقپارات جاريالانباعان جاعدايدا مينيسترلىك باسشىسىنىڭ زاڭ بۇزۋشىلىعى تۋرالى سوتقا جانە پروكۋراتۋراعا ارىز جازاتىنىمىزدى ەسكەرتەمىز.

ماقسات ءىلياسۇلى

Abai.kz