وڭتۇستىك قازاقستان وبلىسى اكىمى ريودا ونەر كورسەتەتىن سپورتشىلارىمىزدىڭ دايىندىعىن پىسىقتادى. بۇل تۋرالى «Abai.kz» پورتالى وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

بۇگىن ءوڭىر باسشىسى ب.اتامقۇلوۆ وبلىستىق دەنە تاربيەسى جانە سپورت باسقارماسىنىڭ باسشىسى ءا.نۇرتاەۆتى قابىلدادى. كەزدەسۋدە تاراپتار 5 تامىز كۇنى برازيليانىڭ ريو-دە-جانەيرو قالاسىندا جالاۋى كوتەرىلەتىن جازعى وليمپيادا ويىندارىندا وڭتۇستىكتىڭ عانا ەمەس، بۇكىل ەلىمىزدىڭ نامىسىن قورعايتىن سپورتشىلارىمىز تۋرالى ءسوز ەتتى. 

كۇنگەي سپورتشىلارىنىڭ دايىندىعى تۋرالى بايانداپ، بىرقاتار سايىپقىراندارىمىزدىڭ كەيبىر سپورت تۇرلەرى بويىنشا لاتىن امەريكاسىندا دايىندىعىن پىسىقتاپ جاتقانىن ايتقان باسقارما باسشىسى ءوزى باستاعان دەلەگاتسيانىڭ ەرتەڭ، 2 تامىز كۇنى، كەشكىسىن جولعا شىعاتىنىن جەتكىزدى. 

ءوز كەزەگىندە، وبلىس اكىمى بايراقتى باسەكەدە سپورتشىلارىمىزدىڭ جۇلدىزى جاناتىنىنا سەنىم ءبىلدىرىپ، جەرلەستەرىمىزگە ساتتىلىك تىلەدى. 

ايتا كەتكەن ءجون، ريودا وتەتىن جازعى وليمپيادا ويىندارىندا وڭتۇستىك قازاقستان وبلىسىنىڭ ايتىنان 21 سپورتشى سىنعا تۇسەتىن بولادى. وليمپيادالىق ارەناعا العاشقى بولىپ دزيۋدوشىلارىمىز شىعادى دەپ كۇتىلۋدە.

Abai.kz