اتىراۋ قالاسىندا ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى ءالى جالعاسىپ جاتىر. بۇگىنگى وتىرىستا سوتتالۋشىلار مەن ولاردىڭ قورعاۋشىلارى سۋدياعا تاعى دا وتىنىشتەرىن جاۋدىردى. ءوتىنىشتىڭ دە ءوتىنىشى بولادى، دەگەنمەن بۇگىنگىلەردى تىڭداعاندا نە جىلارىڭدى، نە كۇلەرىڭدى بىلمەيسىڭ...

تۇستەن كەيىنگى وتىرىستا سوتتالۋشىلاردىڭ قورعاۋشىسى ج.بوقاەۆا بۇۇ بەيبىت جينالىستار جانە قاۋىمداستىقتار بوستاندىعى جونىندەگى ارنايى بايانداماشى ماينا كيايدىڭ اتالعان قىلمىستىق ىسكە قاتىستى زەرتتەۋ جاساعانىن ايتتى. ونىڭ مالىمەتىنشە، م.كياي تالداۋدى «قادىر-قاسيەت» قوعامدىق ۇيىمىنا جولداپ، ودان ءارى ونى سوتقا بەرۋگە تاپسىرعان. سۋديا گ.داۋلەشوۆا قورعاۋشىلار ۇسىنعان بۇۇ ارنايى بايانداماشىسىنىڭ تالداۋى مەن بىرنەشە حاتتى ءىس ماتەريالدارىنا قوستى. دەگەنمەن، بۇل قادام بوقاەۆ پەن ايانوۆتىڭ ءۇشىنشى تۇلعالار، ياعني شەتەلدىكتەر تاراپىنان دا كومەك الىپ وتىرعانىن بىلدىرسە كەرەك. «ولاردىڭ تاعى كىممەن بايلانىستا ەكەندىگى جانە تاعى قايدان قارجىلاندىرىلۋى مۇمكىن؟» دەگەن ساۋال تۋىندايدى. بارلىعى زاڭدى بولىپ، جاسىراتىن ەشتەڭە بولماسا، وندا نەلىكتەن بۇگىنگى وتىرىسقا قاتىسقان شەتەلدىك باقىلاۋشى جۋرناليستەردىڭ سۇراعىنا جاۋاپ بەرمەي، باسىن الا قاشتى؟ ەل ىشىنە ىرىتكى سالۋ شەتەلدىكتەردىڭ وسىنداي ارالاسۋىنان باستالاتىنى حاق. ۋكراينا مەن قىرعىزستانداعى جاعدايدىڭ سوڭى نەگە اكەلگەنى بارشاعا ءمالىم.

سونداي-اق، بۇگىنگى وتىرىستا سوتتالۋشىلاردىڭ ادۆوكاتى سوت زالىنا كىرەردە ونى پوليتسيا قىزمەتكەرلەرىنىڭ تەكسەرمەۋىن ءوتىندى. ال قورعاۋشى ج.بوقاەۆا «سوتتالۋشىلاردىڭ اينەكتىڭ ارتىندا وتىرعانى دۇرىس ەمەس، ولار قوعامعا قاۋىپتى قىلمىسكەرلەر ەمەس» دەپ شىقتى. سونداي-اق، ول قورعاۋشىلاردىڭ سوتتالۋشىلارعا جاقىنىراق وتىرۋىن ءوتىندى. دەگەنمەن، سۋديا گ.داۋلەشوۆا سوت زالىندا سوتتالۋشىلاردىڭ بارلىعىنا بىردەي جاعداي جاسالعانىن ايتتى. جانە دە م.بوقاەۆ پەن ت.ايانوۆتىڭ تەرگەۋ اباقتىسىندا وتىرعاندىقتان، كۇزەتىلەتىن ازاماتتار ەكەندىگىن ەسكە سالدى.

وتىرىستىڭ سوڭىنا قاراي م.بوقاەۆ تەرگەۋ اباقتىسىنان سوت عيماراتىنا كەلەتىن جول ناشار ەكەندىگىن ايتتى. سوندىقتان، ول سۋديا گ.داۋلەشوۆادان قالاداعى كوپىردى جىلدامىراق جوندەۋدى سۇرادى، سۋديا كۇلىپ، «بۇل سوتتىڭ قولىندا بولسا، بۇگىن بارىپ كوپىردى جوندەپ بەرۋشى ەدىم» دەپ جاۋاپ بەردى.

سوتتالۋشىلاردىڭ وسىنداي كۇلكىلى وتىنىشتەرى، ولاردىڭ جاۋاپ بەرۋگە كەلگەن كۋاگەرلەرگە ايعايلاپ العىس ايتۋى، بوقاەۆ پەن ايانوۆ سوت زالىنا كىرگەندە جانە شىققاندا قولداۋشىلارىنىڭ ولارعا قول شاپالاقتاۋى سياقتى قويىلىمداردىڭ كۇندە قايتالاناتىنىن اتاپ وتكەن ءجون بولار.  

Abai.kz