افينى وليمپياداسىندا قازاقستاننىڭ بايراعىن جەلبىرەتكەن سپورتشى بۇگىندە كولىك جوندەۋشىگە اينالعان. بۇل تۋرالى Ikerim.kz سايتى جازادى.

ول – چەمپيون. ول – سپورت شەبەرى. ول – «قۇرمەت» وردەنىنىڭ يەگەرى. 2004 جىلى افينىداعى وليمپيادادا اۋىر اتلەتيكادان 77 كەلى سالماق دارەجەسىندە ونەر كورسەتىپ، كۇمىس جۇلدەنى جەڭىپ الدى. بۇل جەتىستىك ونى قازاسقستانعا عانا ەمەس الەمگە ايگىلى ەتتى. ەلىمىزدىڭ سپورتىنىڭ تاريحىندا ەسىمى التىن ارىپتەرمەن جازىلعان اتلەت سەرگەي فيليمونوۆ قازىر قايدا ءجۇر؟ نەمەن اينالىسىپ ءجۇر؟ جۇلدىزدى ساتىنەن كەيىنگى ءومىرى قالاي ورنەكتەلدى؟

ونى ءبىر كەزدەرى ءبارى قۇرمەت تۇتتى، ۇلگى الدى. جاس سپورتشىلار مەن بۋىنى ەندى قاتىپ كەلە جاتقان جەتكىنشەكتەردىڭ كۋميرىنە اينالدى. قازاقستاننىڭ ەڭبەك سىڭىرگەن سپورت شەبەرى، الەم رەكوردىنىڭ يەگەرى اتاندى. ەكى وليمپيادادا قاتارىنان ەل نامىسىن قورعاعان داڭقتى سپورتشى. سيدنەيدە وتكەن ءدۇبىرلى دودادا ءتورتىنشى ورىنعا تۇراقتاسا، افينىدا جەڭىس تۇعىرىنا كوتەرىلدى. بۇدان بولەك ەۋروپا مەن ازيانىڭ چەمپيونى دەگەن اتاعى تاعى بار.

وليمپياداعا اپارار جول

سەرگەي فيليمونوۆ 1975 جىلى 2 اقپاندا الماتى وبلىسى، قاراتال اۋدانى، ۇشتوبە قالاسىندا دۇنيەگە كەلگەن. كىشكەنتايىنان اجەسىنىڭ قولىندا وسكەن. قومقور اجە ۆەرا پانتەلەيقىزى «نەمەرەم بۇرىس جولعا ءتۇسىپ كەتپەسە ەكەن» دەگەن نيەتپەن ونى اۋىر اتلەتيكا ۇيىرمەسىنە جازدىرادى. ول كەزدە بولاشاق چەمپيون بار بولعانى 9 جاستا ەدى. ءسويتىپ ەڭ العاشقى جاتتىقتىرۋشىسى – لازار دوننان زىلتەمىر كوتەرۋدىڭ قىر-سىرىن ۇيرەنە باستايدى. بىرنەشە سپورتشىنى باپتاپ، دوداعا قوسقان دون ونى العاش كورگەندە-اق بولاشاق جۇلدىز ەكەنىن بىردەن اڭعارىپتى. جاتتىقتىرۋشىنىڭ سەنىمى الداماسا كەرەك-ءتى، سەرگەي 13 جاسىندا-اق جەڭىستى جولىن باستايدى.

سپورتتاعى جولى ونى ەۆروپانىڭ، ازيانىڭ چەمپيونى دەگەن بيىكتەرگە دەيىن كوتەردى. ال 29 جاسىندا ەڭ زور ناتيجە – وليمپيادا شىڭىنان كورىندى. افينىدا وتكەن الەمدىك باسەكەدە كۇمىستەن القا تاعىندى. بۇل جەتىستىگى ءۇشىن اقشالاي سىيلىق جانە الماتى قالاسىنان 3 بولمەلى پاتەر تابىستالدى. بىراق قاراپايىمدىلىعىنا دارداي اتاعى بۇعاۋ سالماعان ميلليونداردىڭ كۋميرى ميللونداردىڭ قالاسىندا قالماي، تۋعان جەرى ۇشتوبەگە قايتۋدى ۇيعارادى.

وليمپيادادان كەيىن…

2005 جىلدىڭ 2 تامىزى داڭقتى سپورتشىنىڭ ءومىرىن كۇرت وزگەرتتى. ءدال سول كۇنى ول ۇشتوبە-تالدىقورعان تاس جولىندا 23 جاسار ۆەلوسيپەدشىنى قاعىپ كەتەدى.

«وتە قاراڭعى ەدى. ونىڭ جولعا قالاي شىعا كەلگەنىن اڭعارماي قالدىم. تۇك كورىنبەدى. ەشتەڭەنى بايقاماۋىما قاراما-قارسى كەلە جاتقان كولىكتىڭ دە ىقپالى بولدى» — دەپ سەرگەي سول كۇنگى وقيعانى كوڭىلسىز ەسكە الادى.

ۆەلوسيپەدشى وقيعا ورنىنان دەرەۋ اۋرۋحاناعا جەتكىزىلەدى. وكىنىشكە قاراي، كوپ ۇزاماي قايتىس بولادى. سەرگەي ونىڭ بارلىق جەرلەۋ راسىمىنە قاجەتتى قارجىنى وتەپ، وتباسىنا بار كومەگىن كورسەتەدى. سپورتشىنىڭ ادال نيەتىن بايقاعان بولۋى كەرەك، باعىنا وراي، قايتىس بولعان جىگىتتىڭ جاقىندارى وعان ءوز كەشىرىمدەرىن بەرەدى.

دەگەنمەن وسى قايعىلى جاعدايدان كەيىن جۇلدىزدى سپورتشىنىڭ ءومىرى وردەن تومەن قاراي قۇلديلاي باستايدى. جاقىندارى دا، دوستارى دا، ارىپتەستەرى دە، ءتىپتى، جان-جارى دا ودان تەرىس اينالادى. ەشقانداي قولداۋشىسى، ارقاسۇيەرى قالماعان اۋىر اتلەت ءوز-ءوزىن اششى سۋمەن جۇباتۋعا كوشەدى.

ء«تىپتى، الماتىداعى پاتەرىمدى دە ء«ىشىپ قويدىم»، ال مۇلدە جالعىز قالعان كەزىمدى كۇمىس مەدالىمدى جاتتىقتىرۋشىما بەرىپ، ءوزىم رەسەيگە، تاتەمنىڭ جانىنا كەتىپ قالدىم» — دەيدى اقىرىن عانا سەرگەي.

رەسەيدىڭ كەمەر وبلىسىندا جۇك كولىگىنىڭ تىزگىنىنە وتىرىپ، كومىر تاسۋمەن اينالىسادى. وسى كەزەڭ ونىڭ قايتا ەس جيۋىنا، قالىپقا كەلۋىنە كومەگىن تيگىزەدى.

2007 جىلى عانا «قۇرمەت» وردەنىنىڭ يەگەرىنە ىزدەۋ سالىنىپ، ەلىنە قايتا ورالۋىن سۇرايدى. ول دا كوپ قارسىلاسپاي، ءوز تۋعان جەرىنە كەلىپ، جاڭا ءومىر باستاۋعا شەشىم قابىلدايدى. سپورتقا دا قايتا ورالادى، الايدا…

بىرنەشە جىلدىق ۇزىلىستەن كەيىن قالىپقا كەلۋ وڭايعا تۇسپەدى. جاتتىعۋدى قايتا باستاعان سپورتشىنىڭ اياعى سىر بەرىپ، اۋىر اتلەتيكامەن ءبىرجولا قوشتاسۋىنا تۋرا كەلەدى. بۇل جاعداي دا سەرگەيدىڭ قايتا تۇتىنعان ءۇمىت وتىنا سۋ بۇركىگەندەي بولدى.

تاعى دا كۇيزەلىس…

«مەن ءبىر عانا نارسەنى ۇقتىم، بەلگىلى-ءبىر دارەجەگە جەتىپ، جوعارى ناتيجە كورسەتكەن كەزدە سەن بارىنە كەرەكسىڭ. ال ءسال قۇلديلاساڭ، قاجەتسىز نارسەدەي تىزىمنەن ىسىرىلىپ قالاسىڭ. ماعان ءدال سولاي جاسادى. بىراق مەن ەشقاشان ەشكىمگە وكپەلەمەيمىن. وسى جاعدايلاردىڭ ءبارىن باسىمنان وتكەرۋ تاعدىرىما جازىلعان شىعار. بۇل – مەنىڭ ءومىرىم، مەنىڭ جولىم. مەن داڭقتىڭ شىڭىنا كوتەرىلدىم، ەل مەنى تانىدى جانە ءدال سولاي تومەندەتتى»، – دەيدى سەرگەي فيليمينوۆ.

Abai.kz