وڭتۇستىك قازاقستان وبلىستىق كلينيكالىق اۋرۋحاناسىنىڭ دارىگەرلەرى شەتەلدىك، اتاپ ايتقاندا وڭتۇستىك كورەيادان كەلگەن حيرۋرگتارمەن بىرىگىپ باۋىرعا كۇردەلى وتا جاسادى.

اتالمىش دارىگەرلەر وبلىستىق كلينيكالىق اۋرۋحاناعا العاش كەلىپ وتىر. وڭتۇستىككورەيالىق ماماندار اقىلى حيرۋرگيا ءبولىمىنىڭ جۇمىسىمەن ءجىتى تانىسىپ قانا قويماي، 36 جاستاعى ازاماتقا كۇردەلى وتا جاسادى. ەكى ەلدىڭ دارىگەرلەرى بىرلەسىپ جاساعان وپەراتسيادا ناۋقاستىڭ باۋىرىنىڭ جارامسىز بولىگى قاۋىپسىز جولمەن الىندى. ءساتتى جاسالعان وتانىڭ ارقاسىندا بۇل ازامات امان قالدى. ەندى باۋىر اۋرۋى مازالاماۋى ءتيىس دەيدى دارىگەرلەر.

جانبولات دىلدابەكوۆ, ءبولىم مەڭگەرۋشىسى: «مىسالى، بۇرىن باۋىردىڭ قۇرتىن اشىپ تازالايتىن بولسا، قازىر باۋىردى اشپاي، ساۋ جەرىنە تيىسپەي جارامسىز جەرىن عانا الىپ تاستايمىز. بۇل وپەراتسيانى ءوزىمىز باستادىق. بۇل كىسىلەرگە دايىنداپ بەردىك. ولار وپەراتسيانىڭ نەگىزگى جاسالۋ باعىتىن كورسەتىپ بەردى.»

جىل باسىنان بەرى وبلىستىق كلينيكالىق اۋرۋحانادا باۋىرعا قاتىستى 13 وتا جاسالعان. ەڭ باستىسى، ناتيجەسى قاناعاتتانارلىق. ەندى كۇنگەيلىك دارىگەرلەر وڭتۇستىك كورەيا ماماندارىنان ترانسپلانتاتسيالىق وتا جاساۋ ءادىسىن مەڭگەرۋدە. ول ءۇشىن شەتەل اسىپ، ارنايى وقىپ كەلگەن ماماندار دا بار. سول دارىگەرلەر وبلىستىق كلينيكالىق اۋرۋحاناسىندا بيىل العاش رەت بۇيرەك الماستىرۋ وتاسىن ويداعىداي ىسكە اسىرعان.

سي ۋووك سونگ، حيرۋرگ، باۋىر ترانسپانتولوگى: «مۇنداعى مۇمكىندىكتى كوردىك. وپەراتسياعا دا قاتىستىق. اۋرۋحاناداعى دارىگەرلەردىڭ بىلىكتىلىگى جاقسى دەپ ايتا الامىن. سونداي-اق ءبىزدىڭ ماقساتىمىز — ترانسپلانتاتسيالىق وتانى دامىتىپ، مامانداردىڭ تەحنولوگيامەن جۇمىس ىستەۋ مۇمكىندىگىن ارتتىرۋ. وسى باعىتتا جۇمىستار جاسالىپ جاتىر. ەندىگى ماقسات — ەكى تاراپتىڭ جۇمىسىن ودان ءارى جانداندىرۋ.»

وسى ءىسساپار اياسىندا كورەيالىق دارىگەرلەر مەديتسينالىق مەكەمەنىڭ بارلىق مۇمكىندىكتەرىمەن تانىسىپ شىقتى. شەتەلدىك ماماندار ايتقانداي، ەندى وبلىستىق كلينيكالىق اۋرۋحاناسىندا ترانسپلانتاتسيالىق وتا جاساۋدىڭ تەحنولوگياسى كۇشەيتىلمەك.

Abai.kz