وڭتۇستىك قازاقستان وبلىسىنىڭ اگرارلى اۋدانى سانالاتىن قازىعۇرتتا جىلىجاي شارۋاشىلىعى قارقىندى دامىپ كەلەدى. بۇل تۋرالى "Abai.kz" پورتالى وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى. 

ايتا كەتەيىك، بۇگىنگى تاڭدا كولەمى 90 گەكتارعا جەتكەن جىلىجايدان قازىعۇرت اۋدانى ديحاندارى 20 مىڭ تونناعا جۋىق كوكونىس، 4,5 مىڭ توننادان استام باقشا داقىلدارىن جينادى. جىلىجايلاردا 200-دەي ازامات ەڭبەك ەتىپ كەلەدى.

«تاۋلى ايماقتا جىلىجاي سالۋدا تۇرباتتىقتار وزىپ تۇر. سولاردىڭ ءبىرى «راحمات اتا» شارۋا قوجالىعى. ەل العىسىنا بولەنگەن ۇجىم 20 ازاماتتى جۇمىسپەن قامتىپ وتىر. سەرىكتەستىك 1,6 گەكتار جەردە «اتيا» قىزاناعى مەن «تۋمي» قيارىن ەگىپ، بۇگىندە ەكىنشى كەزەڭنىڭ داقىلدارىن جيناۋدا. تۇربات اۋىلىنىڭ حالقى جىلىجاي شارۋاشىلىعىن دامىتۋعا بەيىمدەلگەن. جيىرما گەكتاردان استام جەردىڭ ءار گەكتارىنان 100 توننادان استام باۋ-باقشا داقىلدارىن جيناپ الىپ وتىر»، - دەپ مالىمدەيدى وبلىس اكىمىنىڭ ءباسپاسوز قىزمەتى.

قازىعۇرتتىق ديحاندار وندىرگەن ونىمدەرىن وبلىس تۇرعىندارىمەن قاتار الماتىلىقتار مەن استانالىقتاردى دا قامتاماسىز ەتۋگە قول جەتكىزگەن. ال، جالپى العاندا وڭتۇستىك قازاقستان وبلىسىندا جىلىجايلار كولەمى مىڭ گەكتاردان اسادى. بۇل جالپى ەلىمىزدىڭ  جىلىجايلار سەكتورىنىڭ 87 پايىزى دەگەن ءسوز.  

Abai.kz