بۇگىن، بەلگىلى وپپوزيتسيا سەركەسى گۇلجان ەرعاليەۆا اتىراۋدا ءىسى قارالىپ جاتقان «ماكس بوقاەۆ پەن تالعات ايانوۆتىڭ ايىپ تاعىلعان كەي باپتار بويىنشا كىناسى بار» دەپ ەسەپتەيتىنىن مالىمدەدى.

سول ءۇشىن دە، كۇنى كەشە رەسپۋبليكالىق  «جاس الاش» گازەتىنىڭ باس رەداكتورى رىسبەك سارسەنبايۇلى ەكەۋىنىڭ اتىراۋعا ارنايى بارعانىن ايتقان گۇلجان ەرعاليەۆا، باس كەيىپكەرلەردى پروتسەسسۋالدىق كەلىسىمگە قول قويۋعا شاقىرۋ ءۇشىن، ءتىپتى سۋديا گ.داۋلەشوۆادان سوتتالۋشىلارمەن كەزدەستىرۋدى ءوتىنىپ حات تا جازعانىن ايتتى.

«پروتسەسسۋالدىق كەلىسىم زاڭ اياسىندا جۇرەدى. باستىسى، سوتتالۋشىلار بىزبەن  كەزدەسۋدەن باس تارتىپ وتىرعان جوق. ەگەر، سوت بىزگە تىم بولماعاندا، ءبىر ساعاتقا كەزدەسۋگە رۇقسات بەرسە، بۇل ماسەلەنى جان-جاقتى تالقىلار ەدىك. پروتسەسس تە، تاعىلىپ وتىرعان ايىپ تا وتە كۇردەلى. جالپاق تىلمەن ايتقاندا، ولار «قىلمىستىق كودەكستىڭ» «زاڭسىز ميتينگ ۇيىمداستىرىپ، زاڭسىز شەرۋگە قاتىستى»، «جالعان اقپارات تاراتتى»، «الەۋمەتتىك جانە ۇلتتىق ارازدىق تۋدىردى» دەگەن باپتار بويىنشا ايىپتالىپ جاتىر. راس، جىگىتتەر ميتينگتى ۇيىمداستىردى، حالىق اراسىندا ناسيحات جۇرگىزىپ، ولاردى قاتىسۋعا دا شاقىردى. مىنە، وسى باپتار بويىنشا جىگىتتەر ايىبىن مويىنداۋى كەرەك دەپ ويلايمىن. ال، «قر قىلمىستىق كودەكسىنىڭ» 174 باپ، 2 ءبولىمى  بويىنشا تاعىلعان ايىپ وتە كۇردەلى.  مەنىڭ ويىمشا، كەز كەلگەن پروتسەستە كەلىسىم بولۋى ءتيىس. جانە ول زاڭدىق تۇرعىداعى دۇرىس كەلىسىم پروتسەسى بولۋى كەرەك» دەگەن گۇلجان ەرعاليەۆا، بۇل سالادا ءبىراز تاجىريبەسى بار اعا بۋىن رەتىندە، ايىپتالۋشى ازاماتتاردى اقىلعا شاقىردى جانە مەملەكەتتىك ايىپتاۋشىلار مەن قورعاۋشى تاراپقا كەلىسىم ۇستەلىنە وتىرۋعا كەڭەس بەردى.

«ارينە، شەشىمدى جىگىتتەردىڭ وزدەرى قابىلدايدى. بىراق، ولار الدىڭعى ەكى باپ بويىنشا ايىبىن موينىنا الۋى كەرەك. قانشا دەگەنمەن، ولار ۇلكەن ادامدار عوي. بولار جاعداي بولدى. ءوتتى دە، كەتتى» دەپ قوسىپ قويدى گۇلجان ەرعاليەۆا.

Abai.kz