جاقىندا  چەحيانىڭ ىشكى ىستەر مينيسترلىگى «رەسەي ءباسپاسوزىنىڭ ۇگىت-ناسيحاتىمەن (پروپاگانداسىمەن) جانە وزگە دە دەزينفورماتسيالىق اقپاراتتارمەن كۇرەس» دەپارتامەنتىن قۇردى. چەحيالىق باق مالىمەتتەرىنە سۇيەنسەك، بۇل دەپارتامەنت، اسىرەسە، تۇرعىنداردىڭ قوعامدىق پىكىرىنە تەرىس ىقپال ەتىپ، مەملەكەتتىڭ ىشكى تۇراقتىلىعىنىڭ بۇزىلۋىنا سەبەپ بولا باستاعان رەسەي پروپاگانداسىمەن كۇرەسكە دەن قويۋدى ماقسات ەتىپ وتىرعان كورىنەدى. بۇل تۋرالى «Hospodarske Noviny» گازەتى جازادى.

قۇرامىنا 20 ادام كىرەتىن بۇل دەپارتامەنت ءوز قىزمەتىنە جاڭا جىلدان باستاپ كىرىسەتىن كورىنەدى. «Hospodarske Noviny» گازەتىنىڭ دەرەكتەرىنە سۇيەنسەك، دەپارتامەنت انىقتاعان بارلىق ماتەريالدار پوليتسيا، قورعانىس مينيسترلىگى مەن ارنايى قىزمەت وكىلدەرىنە بەرىلەتىن بولادى. اسىرەسە، اشىق دەرەك كوزدەرىندەگى (الەۋمەتتىك جەلىلەر مەن باق) پروپاگاندالىق ماتەريالدارعا باسا نازار اۋدارىلادى ەكەن.

اتالعان دەپارتامەنتتىڭ قۇرىلعانى تۋرالى چەحيا ءىىم ءمينيسترى ميلان حوۆانەتس مالىمدەگەن. 20-قازاندا پراگادا وتكەن «دەزينفورماتسياعا قارسى كۇرەس» اتتى كونفەرەنتسيادا ميلان حوۆانەتس مالىمدەمە جاساپ، اتالعان دەپارتامەنت چەحياداعى ءاربىر سمارتفوندى تەكسەرەتىنىن ايتتى.

سونداي-اق، ناتو-داعى چەح گەنەرالى پەتر پاۆەل اتالعان دەپارتامەنتتىڭ قىزمەتى تۋرالى ايتا كەلىپ، «اسىرەسە ەڭ باستى قاۋىپ  باتىس ەلدەرى مەن ۋكرايناعا قاتىستى رەسەي پروپاگانداسى» دەدى.

2015 جىلى پولشا پرەزيدەنتى  برونيسلاۆ كوموروۆسكي باتىس باسپاسوزىندەگى كرەملدىڭ گيبريدتىك شابۋىلدارىن قاتاڭ سىناعان بولاتىن.

ال ليتۆا پارلامەنتى دە رەسەيلىك پروپاگاندانىڭ قاۋىپتىلىگىنە الاڭداۋشىلىق بىلدىرگەن. ليتۆا مەملەكەتتىك قاۋىپسىزدىك دەپارتامەنتى اتالعان ماقساتتا رەسەي بيلىگى جىل سايىن ءجۇز مىڭعا جۋىق ەۋرو ءبولىپ، ارانداتۋشى باق-تى قارجىلاندىرىپ وتىرعانىن ايتقان.

2016 جىلى ەۋرووداق ارنايى سايت اشىپ، وندا رەسەيلىك دەزينفورماتسيالاردى اشىق اشكەرەلەدى.

16-قازان كۇنى «The Financial Times» باسىلىمى رەسەي بيلىگىنىڭ ەۋرووداق ەلدەرىنىڭ ىشكى ساياساتىنا ارالاسىپ وتىرعاندىعى جونىندە ماقالا جاريالادى.

ايتا كەتەيىك، چەحيادا شامامەن ورىس ءتىلدى 30 مىڭ ازامات تۇرادى. ەلدە ورىس تىلىندە اقپارات تاراتاتىن ون شاقتى سايت بار.

P.S. قازاقستان اۋديتورياسىندا ەمىن-ەركىن جۇمىس جاساپ جاتقان قانشاما رەسەيلىك باق بار؟.. اقپاراتتىق كەڭىستىكتىڭ 50 پايىزدان استام بولىگىن قۇرايتىن رەسەيلىك باق-قا قاشان تىيىم سالىنادى؟ بۇل سۇراققا جاۋاپ بەرۋ ءۇشىن ءبىزدىڭ دە ىشكى ىستەر مينيسترلىگىنىڭ جانىنان ارنايى دەپارتامەنت قۇرىلعانى ءجون دەپ سانايمىز.

ءسىز نە دەيسىز؟

نۇرگەلدى ابدىعانيۇلى

Abai.kz