قازاقستاندا تەگىن جەر تەلىمىنە ۇمىتكەرلەردىڭ بىرىڭعاي بازاسى قۇرىلادى، - دەپ حابارلايدى اباي-اقپارات kaz.365info.kz سايتىنا سىلتەمە جاساپ. بۇل ازاماتتارعا بەرىلەتىن تەگىن جەر تەلىمىنىڭ ەكى رەت بەرىلىپ قويماۋى ءۇشىن ساقتىق رەتىندە قابىلدانعان شارا ەكەن.

9-قىركۇيەكتەگى ۇكىمەتتىڭ كەڭەيتىلگەن وتىرىسىندا مەملەكەت باسشىسى جانە 13-قىركۇيەكتەگى ۇكىمەت وتىرىسىندا قر پرەمەر-ءمينيسترى قر اۋىل شارۋاشىلىعى مينيسترلىگى الدىنا اۋقىمدى ماقساتتار مەن بىرقاتار مىندەتتەمەلەر قويعان بولاتىن.

ءوز كەزەگىندە، بۇل مىندەتتەمەلەر بۇگىن قر پرەمەر-ءمينيسترىنىڭ ورىنباسارى — اۋىل شارۋاشىلىعى ءمينيسترى اسقار مىرزاحمەتوۆتىڭ توراعالىعىمەن مينيسترلىكتىڭ وڭىرلەرمەن بەينەبايلانىس رەجيمىندەگى القا ماجىلىسىندە كەڭىنەن تالقىعا ءتۇسىپ، ولاردى جۇزەگە اسىرۋدىڭ جول كارتاسى جاسالدى. بۇل تۋرالى اۋىلشارۋاشىلىعى مينيسترلىگىنىڭ ءباسپاسوز قىزمەتى ءمالىم ەتتى.

بىرىنشىدەن، جۇزەگە اسىرىلىپ جاتقان اگروبيزنەس — 2020 باعدارلاماسى نەگىزىندە اگروونەركاسىپتىك كەشەندى دامىتۋدىڭ مەملەكەتتىك باعدارلاماسى ازىرلەنەتىن بولادى.

جاڭا باعدارلاما مينيسترلىك باعىتى بويىنشا اۋىل شارۋاشىلىعى ونىمدەرى مەن ازىق-تۇلىك وندىرىسىنە قولداۋ ءبىلدىرۋدى عانا ەمەس، وزگە دە سالالارمەن ساباقتاسقان ماسەلەلەردى قامتيدى.

سونداي-اق، باعدارلامانى بەكىتۋ اياسىندا اۋىلشارۋاشىلىعى ونەركاسىپ كەشەندەرىن سۋبسيديالاۋ جۇيەسىنە بىرقاتار تۇزەتۋلەر ەنگىزۋ جوسپارلانۋدا. وسىمدىك شارۋاشىلىعىندا بۇل تارماق ەگىن القاپتارىن، ونىڭ ىشىندە، بيداي القاپتارى قۇرىلىمىن ديۆەرسيفيكاتسيالاۋعا قاتىستى. ال مال شارۋاشىلىعىندا تاۋەكەلى از، جەممەن قامتاماسىز ەتىلۋى وڭاي ورتا جانە شاعىن شارۋاشىلىقتاردى قامتۋ جانە جايىلىمدىق مال شارۋاشىلىعى الەۋەتىن پايدالانۋ مۇمكىندىكتەرى قاراستىرىلۋدا.

سونىمەن قاتار، «قازاگرو» ۇلتتىق باسقارۋشى حولدينگى» اق-تىڭ نەسيەلەۋ ساياساتى قايتا قارالاتىن بولادى. اتاپ ايتقاندا، بۇل اۋىلشارۋاشىلىعى ونەركاسىپ كەشەندەرى سۋبەكتىلەرىن قامتۋ اياسىن ەسەلەي تۇسەتىن ورتا جانە شاعىن جوبالارعا قاتىستى.

مەملەكەت باسشىسىمەن بەكىتىلە وتىرىپ، اگروبيزنەس — 2020 باعدارلاماسىن «مەملەكەتتىك» فورماتىندا قايتا بەكىتۋ ءۇردىسى وڭىرلەردەگى اۋىل شارۋاشىلىعى ءوندىرىسىنىڭ دامۋىنا تۇرتكى بولادى جانە دە جوعارىدا اتالىپ وتكەن ماسەلەلەردى شەشۋگە مۇمكىندىك بەرەدى.

ەكىنشىدەن، جاپپاي كاسىپكەرلىكتى دامىتۋ جۇمىسىن جانداندىرۋ ءۇشىن اۋىل تۇرعىندارىن جۇمىسپەن قامتۋ جانە جەكە قوسالقى شارۋاشىلىقتار الەۋەتتەرىن قولدانۋ ارقىلى كاسىپورىنداردىڭ قايتا وڭدەۋ قۋاتتارىن جۇكتەۋ شارالارى قولعا الىنا باستادى. بۇل اۋىل شارۋاشىلىعى ونىمدەرىن ءوندىرۋ مەن جىلجىتۋدى ورتالىقتاندىرۋ ءۇشىن جاسالۋدا.

قۇرىلاتىن اۋىل شارۋاشىلىعى كووپەراتيۆتەرى ءسۇت، ەت، جەمىستەر مەن كوكەنىستەر، ءجۇن مەن تەرى ازىرلەۋمەن، سونداي-اق، ومارتاشىلىق، قۇس شارۋاشىلىعى، تاۋارلىق بالىق شارۋاشىلىعى جانە اۋىلشارۋاشىلىعى ونەركاسىپ كەشەندەرىنىڭ باسقا دا باعىتتارىمەن اينالىسا الادى.

اۋىل تۇرعىندارىن جۇمىسپەن قامتۋ شارالارىن ىسكە اسىرۋ ارقىلى 3 جىلدا تاۋارلىق وندىرىسكە 226 مىڭ جۇمىسپەن قامتۋ شارالارىن تارتۋ جانە 70 مىڭنان اسا جۇمىس ورىنىن اشىپ، قايتا وڭدەۋ كاسىپورىندارىنىڭ جۇكتەلىمىن كەمىندە 20 پايىزعا ارتتىرۋ كوزدەلۋدە.

بۇگىندە 448 اۋىل شارۋاشىلىعى كووپەراتيۆى قۇرىلىپ ۇلگەردى جانە دە اۋىل شارۋاشىلىعى كووپەراتيۆتەرى ءۇشىن ارنايى سالىقتىق رەجيمدى ىسكە اسىرۋ بارىسىندا جەردىڭ بولۋى تالابىن جويۋ باعىتىندا جۇمىستار جۇرگىزىلۋدە.

ۇشىنشىدەن، جەكە تۇرعىن-ءۇي قۇرىلىسى ءۇشىن جەر تەلىمىن بەرۋ ماسەلەسى قارالدى.

كەڭەيتىلگەن وتىرىستا مەملەكەت باسشىسى «نۇرلى جەر» بىرىڭعاي تۇرعىن-ءۇي قۇرىلىسى باعدارلاماسىن ازىرلەۋدى تاپسىرعان ەدى. وندا جەكە تۇرعىن ءۇي قۇرىلىسى ءۇشىن 10 سوتىق جەر تەلىمىن ءبولۋ ماسەلەسى قوزعالادى.

بۇل ماسەلەنى شەشۋ ءۇشىن جەر كودەكسىنە اكىمدىكتەرگە مەملەكەت قاجەتتىلىگىنە جەكە تۇرعىن ءۇي قۇرىلىسىن سالۋ ءۇشىن جەر تەلىمدەرىن ساتىپ الۋ مۇمكىندىگىن بەرۋ بويىنشا وزگەرىس ەنگىزۋ كوزدەلۋدە.

ايتالىق، كەزەكتە تۇرعان ازاماتتاردىڭ ءتىزىمىن جۇيەلەۋ جانە ەكى رەت تەگىن جەر تەلىمىن الۋ جاعدايلارىن بولدىرماس ءۇشىن «ەلەكتروندى ۇكىمەت» پورتالىندا كەزەكتە تۇرعان ازاماتتاردىڭ بىرىڭعاي رەەسترىن قۇرۋ جوسپارلانۋدا. بۇل جەر تەلىمدەرىن بەرۋ مەحانيزمدەرىن جەتىلدىرىپ، ەل اۋماعىندا وتىنىمدەردىڭ ءبىر فورماسى ارقىلى ارنايى ەسەپ جۇرگىزۋگە جانە اعىمداعى ەسەپتى وزەكتەندىرۋگە مۇمكىندىك بەرەدى.

تورتىنشىدەن، 2016-2017 جىلدارى ەكونوميكالىق ءوسىمدى ىنتالاندىرۋ جانە جۇمىسپەن قامتاماسىز ەتۋ جوسپارى اياسىندا بيىلعى جىلى مينيسترلىككە 97 ملرد. تەڭگە كولەمىندە قوسىمشا قارجى ءبولىندى. بۇل قاراجات العا قويىلعان مىندەتتەردى ورىنداۋ جانە ءوندىرىس تيىمدىلىگىن ارتتىرۋعا باعىتتالعان.

ەندىگى كەزەكتە، مينيسترلىكتىڭ مىندەتى — اتالعان بيۋدجەت قاراجاتىنىڭ ءتيىمدى يگەرىلۋىن قامتاماسىز ەتۋ.

سونداي-اق، جيىن بارىسىندا سۋارمالى جەردى 600 مىڭ گەكتار ۇلعايتۋ جانە ولاردىڭ ينفراقۇرىلىمىن جەتىلدىرۋ ماسەلەلەرى ءسوز بولدى.

بەسىنشىدەن، 2016 جىلى جانۋارلاردىڭ اسا قاتەرلى اۋرۋلارىنا قاتىستى ەپيزووتيكالىق جاعداي جەكەلەگەن ينفەكتسيالاردىڭ تارالۋىن ەسەپتەمەگەندە، قالىپتى كۇيدە جانە بۇل باعىتتا تۇراقتىلىق بار. مىسالى، جىل باسىنان بەرى جانۋارلار اۋرۋلارىنىڭ 95 وشاعى تىركەلسە، ولاردىڭ 42-ءسى دەرەۋ جويىلىپ، جەرگىلىكتى اتقارۋشى ورگاندار شەشىمىمەن جابىلدى. ال قالعان 42 وشاقتا نۇسقاۋناماعا سايكەس ۆەتەرينارلىق-كارانتيندىك ءىس-شارالار جۇرگىزىلۋدە. سونىمەن قاتار، تىركەلىمگە الىنعان برۋتسەللەزدى 109 پۋنكتتە ساۋىقتىرۋ جۇمىستارى جۇرگىزىلۋدە.

2016 جىلى 135,5 ملن مانيپۋلياتسيا جۇرگىزۋ جوسپارلانعان. اعىمداعى جىلدىڭ 7 ايىندا 76,6 ملن مانيپۋلياتسيا جۇرگىزۋ جوسپارلانعان. ونىڭ ىشىندە، 73,1 ملن مانيپۋلياتسيا جۇزەگە اسىرىلىپ، 7 ايلىق كورسەتكىشتىڭ 95,4 پايىز جوسپارى ورىندالدى.

قر پرەمەر-ءمينيسترىنىڭ ورىنباسارى — اۋىل شارۋاشىلىعى ءمينيسترى اسقار مىرزاحمەتوۆ وتىرىس بارىسىندا ايتىلعان ماسەلەلەردى قورىتىندىلاي وتىرىپ، الداعى ۋاقىتتا اۋىلشارۋاشىلىعى ونەركاسىپ كەشەندەرىن جاڭا دەڭگەيگە كوتەرۋ بويىنشا بىرقاتار تاپسىرمالار بەردى جانە دە ولاردىڭ ورىندالۋى قاتاڭ باقىلاۋدا بولاتىنىن ەسكەرتتى.

Abai.kz