ۇزىناعاشتا قازا تاپقان ءۇش جىگىتتىڭ وتباسىنا ماتەريالدىق كومەك كورسەتىلەدى دەگەن اقپارات شىندىققا جاناسپايدى، - دەپ حابارلادى الماتى وبلىسى اكىمىنىڭ ورىنباسارى باحتيار ونەرباەۆ.

بۇل تۋرالى قازاقپارات حابارلادى.

"اعايىندى جىگىتتەردىڭ ولىمىنە بايلانىستى ماتەريالدىق كومەك كورسەتىلەدى" دەگەن كەيبىر باق-تارداعى اقپارات دۇرىس ەمەس. رەسمي تۇردە مالىمدەيمىن. الدىن الا ءبىز ەشقانداي ۋادە بەرگەنىمىز جوق. تەرگەۋ ءجۇرىپ جاتىر. كۇدىكتىلەر ۇستالدى. سوت ءوتسىن، انىقتالسىن. بۇل - قىلمىستىق وقيعا. قازاقپىز عوي، اۋدان، اۋىل اكىمدەرىنە تاپسىرما بەردىك، بارىپ، قايعىلارىنا ورتاقتاسىپ، قارايلاسۋ جاعىن تاپسىردىق. اۋدان اكىمى وتىن، سۋىن ءتۇسىرىپ بەرىپ قولدان كەلگەنشە كومەگىن كورسەتىپ جاتىر. اكىمشىلىك شەت قاراپ وتىرعان جوق. مۇسىلماننىڭ پارىزى - كوڭىل ايتۋ. جاعدايدى وبلىس اكىمى باقىلاۋىندا ۇستاپ وتىر. بۇگىنگى اپپارات جيىنىندا سۇراپ، تاپسىرمالارىن بەردى»، - دەدى باحتيار ونەرباەۆ.

وبلىس اكىمىنىڭ ورىنباسارىنىڭ سوزىنەن ۇققانىمىز، قارالى شاڭىراققا اينالا جۇرت قايعىرا كوڭىل ايتىپ، قولىنان كەلگەنىنشە قارايلاسىپ جاتقان كورىنەدى. الايدا، ناقتى ماتەريالدىق كومەك كورسەتىلمەيدى ەكەن. نەگە؟ سەبەبى، "بۇل - قىلمىستىق وقيعا" (ب. ونەرباەۆتىڭ ءسوزى). ال، قىلمىستىق وقيعا كەزىندە قازا تاپقانداردىڭ ءبارى ەرلىك كورسەتە بەرمەۋى مۇمكىن. بىراق، قازانىڭ اتى - قازا. شاما شارقىنشا كۇنەلتىپ، وتباسىن اسىراپ قانا جۇرگەن مومىن جانداردىڭ قازاسى ەستىگەن جۇرتتىڭ قابىرعاسىن قايىستىردى. ءۇش بىردەي وتباسى اسىراۋشىسىنان ايرىلىپ، اڭىراپ قالدى. بۇنداي جاعدايدا جەرگىلىكتى وكىمەت "قارايلاسىپ" قانا قويماي، ناقتى جاردەم جاساعاندارى ءجون بولار ەدى. كەشەگى الماتى وقيعاسىن ەسكە الايىقشى. "تەرروريستىڭ" قولىنان قازا تاپقان پوليتسيا قىزمەتكەرلەرىنە الماتى قالاسى اكىمدىگىنىڭ تاراپىنان 15 000 000 تەڭگە وتەماقى، باسقا دا ماتەريالدىق كومەكتەر كورسەتىلگەن بولاتىن. سول كەزدە كاسىبي زاڭگەر ابزال قۇسپانۇلى جاڭاوزەن وقيعاسىن ەسكە الىپ، پوليتسەيلەر وعىنان قازا تاپقان جانداردىڭ وتباسىنا 500 000 تەڭگە كولەمىندە عانا جاردەماقى بەرىلگەنىن ەسكە العان-دى. ءبىز دە سول ەكى وقيعانى قايىرا ەسكە تۇسىرە كەلە، مەملەكەت ءوز ازاماتتارىنىڭ قاۋىپسىزدىگىن قامتاماسسىز ەتە المايدى ەكەن، ەندەشە ماتەريالدىق ءھام رۋحاني تۇرعىدا قول ۇشىن سوزۋى ءتيىس دەگەندى ايتامىز.

P.S. كىسى قولىنان قازا تاپقان جازىقسىز جانداردىڭ ارتىنا قارايلاپ وتىرعانىمىزدا مىنانداي ءبىر اقپاراتقا ۇشىراستىق. راتەل.كز  سايتى 10 ماۋسىم كۇنى اقتوبەدەگى انتيتەررورلىق وپەراتسيا كەزىندە قازا بولعان لاڭكەس ارمان ايتۋعاننىڭ زاڭسىز نەكەدەگى ايەلى، 28 جاستاعى ايزادا ۇسىكقاليەۆانىڭ ا. ايتۋعاننان تۋعان 8 ايلىق ءاسيا ەسىمدى قىزى بارىن جازىپتى. ا. ۇسىكقاليەۆا ا. ايتۋعانمەن زاڭدى نەكەدە بولماعانىن، نەكەلەرىن تەك مەشىتتە قيدىرعانىن ايتىپ، سوت ارقىلى ا. ايتۋعاندى سەگىز ايلىق ءسابيدىڭ اكەسى دەپ تانۋ تۋرالى شەشىم شىعارتقان. سول شەشىم نەگىزىندە ەندى اسياعا مەملەكەتتەن اسىراۋشىسىنان ايىرىلۋىنا بايلانىستى 23 715 تەڭگە كولەمىندەگى ارنايى جاردەماقى تولەنەتىن بولىپتى. جاردەماقىدان بولەك ا. ايتۋعان مەن ا. ۇسىكقاليەۆانىڭ قىزدارىنا تەررورشىنىڭ تەگى دە بەرىلمەك.  

ءشارىپحان قايسار

Abai.kz