تابيعاتتا كەزدەسەتىن وسىمدىكتەردىڭ كەيبىرەۋى تاپتىرماس ەم رەتىندە قولدانىلسا، كەيبىرەۋى ۋلى بولىپ كەلەدى. سوندىقتان تابيعاتتىڭ زاڭىنا باعىنا وتىرىپ، وسىمدىكتەردى ءوز پايداڭىزعا جاراتقان ءجون. وڭتۇستىك وڭىرىندە ءاربىر ءۇيدىڭ باقشاسىندا كەزدەسەتىن قۇلپىناي مەن تاڭقۋرايدىڭ ءدامى ەرەكشە ءتاتتى ءارى دەنساۋلىققا پايدالى. 

سارىاعاشتىڭ تۇرعىنى گۇلزينا ابايبەك سوڭعى 5 جىلدان بەرى قۇلپىناي وسىرۋمەن اينالىسادى. قۇلپىناي ەرتە پىسەتىن جيدەك. ادەتتە ءبىزدىڭ ەلىمىزدىڭ باسقا وبلىستارىنا قۇلپىناي وزبەكستاننان جەتكىزىلەدى. كەيىنگى جىلدارى وڭتۇستىك قازاقستاننىڭ سارىاعاش اۋدانىندا وسىرىلەتىن قۇلپىنايدىڭ كولەمى ارتىپ كەلەدى. «جيانلعان قۇلپىنايدىڭ ساقتاۋ مەرزىمى 5 كۇن عانا، سوندىقتان قاشىق اۋداندارعا جونەلتۋدە قيىندىقتار تۋىنداي. سوندىقتان قازىر جاقىن اۋداندارعا جىبەرىپ وتىرامىز»، دەيدى گۇلزينا. شارۋا ءارى كاسىپكەر گۇلزينا قۇلپىناي توسابىن جاساپ تا ساتادى.

قۇلپىناي – بۇلدىرگەندەر توبى، راۋشانگۇلدەر تۇقىمداسىنا جاتاتىن كوپجىلدىق وسىمدىك. وسكەن كەزدە پايدا بولاتىن مۇرتشالارى ارقىلى كولدەنەڭ جايىلادى. ونىڭ 5-12 كۇلتەلى گۇلدەرى جاپىراقتارىنىڭ ۇستىڭگى بەتىندە ورنالاسادى. جيدەگى قىزىل ءتۇستى، حوش ءيىستى بولادى. قۇلپىنايدىڭ جابايى ءتۇرىن تەك ەۋروپادان كەزدەستىرە الاسىز. ەرتە كوكتەمدە، جازدا، كۇزدە جەمىس بەرەتىن سۇرىپتارى بار. قۇلپىنايدىڭ ادام اعزاسىنا كەلتىرەر پايداسى مول، س دارۋمەنىنە وتە باي، قۇرامىندا مينەرالدار مەن ميكروەلەمەنتتەر كوپ كەزدەسەدى: تەمىر، ماگني، كالي، كالتسي، مىس، يود، فوسفور، تسينك، مارگانەتس ت.ب. اتالمىش دارۋمەندەر، مينەرالدار مەن ميكروەلەمەنتتەرسىز ادام اعزاسى دۇرىس جۇمىس ىستەي المايتىنىن ەسكەرگەن ءجون. ادام اعزاسىنا كەلتىرەر پايداسىنان وزگە سالادا دا قولدانىسقا يە. ماسەلەن، ءسان الەمىندە پارفيۋمەريا جاساۋ بارىسىندا پايدالانىلسا، تاعام وندىرىسىندە دەسەرت، شىرىن، توساپ، دجەم جاساۋعا بولادى.

اباي-اقپارات