قازاقستان رەسپۋبليكاسىنىڭ تاۋەلسىزدىك تۇعىرىنىڭ بەرىكتىگى مەن ەلدىگىمىزدىڭ تۇتاستىعى ەلباسىمىز، ەگەمەندى ەلىمىزدىڭ تۇڭعىش پرەزيدەنتى ن.ءا.نازارباەۆتىڭ سارابدال ساياساتىنىڭ ارقاسى ەكەندىگى بارشامىزعا ايان. قازاقستان – ءبىرتۇتاس جەر، ءبىرتۇتاس حالىق، ءبىرتۇتاس بولاشاق دەسەك، مەملەكەت باسشىسى ن.ءا.نازارباەۆ بۇكىل سانالى عۇمىرىندا قازاقستان حالقىنىڭ باقىتتى ءومىرى، باياندى بولاشاعى ءۇشىن بار قاجىر-قايراتىمەن ەڭبەك ەتىپ كەلەدى. وتكەنىمىزدى سارالاي قاراساق، ەلباسىنىڭ سىندارلى ساياساتىنىڭ ارقاسىندا قازاقستان تايعاق كەشۋلەردەن سۇرىنبەي ءوتىپ، بەدەلدى دە ابىرويلى، الەمدىك قاۋىمداستىق مويىنداعان، جەدەل دامۋدىڭ داڭعىل جولىنا تۇسكەن ەلدەردىڭ قاتارىنا ەندى.

قازاقستان رەسپۋبليكاسىنىڭ تۇڭعىش پرەزيدەنتى كۇنىن وڭتۇستىكقازاقستاندىقتار دا جوعارى دەڭگەيدە اتاپ ءوتتى. مەرەكەگە وراي جەر-جەرلەردە ءتۇرلى مادەني ءىس-شارالار ءوتتى.

تۇركىستانداعى مۇراجايدا پرەزيدەنت كۇنىنە ارنالعان كورمە اشىلدى

تۇركىستان قالاسىنداعى تاريحي-ەتنوگرافيالىق مۇراجايدا پرەزيدەنت كۇنىنە ارنالعان كورمە اشىلدى. مۇندا ەلباسىنىڭ تۇركىستان جانە قازاقستاننىڭ وركەندەۋى جولدارى جازىلعان تۋىندىلارى قويىلعان. مۇراجايداعى ەكسپوناتتار پرەزيدەنتپەن كەزدەسۋ بارىسىندا جاسالعان فوتوسۋرەتتەر مەن وزگە جادىگەرلەرمەن تولىعىپ وتىر.

«قازاقستاننىڭ رۋحاني ورتالىعى — تۇركىستان» دەگەن ەلباسىنىڭ پىكىرىن نەگىزگە الا وتىرىپ 2011 جىلى اشىلعان «تاريحي-مادەني ەتنوگرافيالىق ورتالىق» بولاشاقتا تۇركىستان تاريحىن زەردەلەيتىن عىلىمي-زەرتتەۋ ورتالىعىنا اينالماق.

مۇراجايدىڭ نەگىزگى ماقساتى — حالىقتى تۇركىستاننىڭ رۋحاني ومىرىنەن، تاريحىنان حاباردار ەتىپ، ونىڭ ەل مادەنيەتىندە الار ورنىن، ماڭىزىن ورتالىقتاعى تاريحي جادىگەرلەر جيناعى ارقىلى كورسەتۋ. مۇنداعى جادىگەرلەر ساتىپ الۋ، سىي نەمەسە مۇرا رەتىندە قابىلدانعان زاتتار ەسەبىنەن، ارحەولوگيالىق ەكسپەديتسيالاردىڭ ناتيجەسىندە تولىقتىرىلىپ وتىرادى.

شىمكەنتتىك وقۋشىلار ەلباسى جايلى ەسسە جازدى

№65 مەكتەپتىڭ تۇلەكتەرى ەلباسىنا دەگەن ىستىق ىقىلاستارىن ەسسە جازۋ ارقىلى جەتكىزدى.

جاسوسپىرىمدەر قازاق ەلىنىڭ تاۋەلسىزدىك جىلدارى جەتكەن جەتىستىكتەرى مەن ماقتانىشتارىن قازاق، ورىس، جانە اعىلشىن تىلدەرىندە جازدى. مۇنىڭ بارلىعى ەلباسىنىڭ كورەگەن ساياساتىنىڭ ناتيجەسى ەكەنىن ۇققان وقۋشىلار، مۇنداي ءىس-شارالاردىڭ جاستاردى وتانىن، حالقىن ءسۇيىپ، ەلجاندىلىققا تاربيەلەۋگە قوسار ۇلەسى زور دەيدى.

مەرەكە كۇنى  90 پوليتسەي ماراپاتتالدى

قازاقستاننىڭ تۇڭعىش پرەزيدەنتى كۇنىنە وراي وڭتۇستىك قازاقستان وبلىستىق ىشكى ىستەر دەپارتامەنتىنىڭ 90-نان استام قىزمەتكەرى ماراپاتتالدى. دەپارتامەنت عيماراتىندا وتكەن سالتاناتتى ءىس-شارا ىشكى ىستەر ءمينيسترى، پوليتسيا گەنەرال-پولكوۆنيگى قالمۇحامەت قاسىموۆتىڭ وڭتۇستىكقازاقستاندىق پوليتسەيلەرگە جولداعان، تۇڭعىش پرەزيدەنت كۇنىمەن قۇتتىقتاۋ حاتىمەن اشىلدى. قۇتتىقتاۋ حاتتا مينيستر قوعامدىق ءتارتىپتى قامتاماسىز ەتۋدە ەرەن ەڭبەكتەرى ءۇشىن دەپارتامەنتتىڭ جەكە قۇرامىنا العىس بىلدىرگەن.

ودان كەيىن دەپارتامەنت باستىعى، پوليتسيا پولكوۆنيگى جانات سۇلەيمەنوۆ كاسىبي بىلىكتىلىگىمەن تانىلعان 90-نان اسا قىزمەتكەردى ماراپاتتادى. ونىڭ ىشىندە 19 پوليتسەي ىشكى ىستەر ءمينيسترىنىڭ ارنايى بۇيرىعىمەن ماراپاتتالىپ وتىر.

سالتاناتتى جيىن وبلىستىڭ ەسترادا جۇلدىزدارى مەن جاس ونەرلى پوليتسەيلەردىڭ مەرەكەلىك كونتسەرتىمەن جالعاستى.

Abai.kz