وڭتۇستىك قازاقستاندا «قازاقستاننىڭ سىبايلاس جەمقورلىققا قارسى زاماناۋي ساياساتى» تاقىرىبىندا ءماجىلىس ءوتتى. 

جيىنعا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ پەن وبلىس اكىمى جانسەيىت تۇيمەباەۆ، وبلىستىق باسقارما باسشىلارى، قۇقىق قورعاۋ ورگاندارى باسشىلارى، جوعارى وقۋ ورىندارىنىڭ رەكتورلارى، ءدىني كونفەسسيالاردىڭ جانە بۇقارالىق اقپارات قۇرالدارىنىڭ وكىلدەرى، ءبىلىم بەرۋ، دەنساۋلىق ساقتاۋ جانە مادەنيەت ۇيىمدارىنىڭ باسشىلارى قاتىستى. سونىمەن قاتار، سەمينار جۇمىسىن بەينەسەلەكتر ارقىلى قالا جانە اۋدان اكىمدەرى، مەكتەپ ديرەكتورلارى مەن باس دارىگەرلەر، جاستار مەن قوعام وكىلدەرى، بارلىعى 1200-دەن اسا ادام كورە الدى. 

ماجىلىسكە توراعالىق ەتكەن ج.تۇيمەباەۆ مەملەكەت باسشىسىنىڭ «100 ناقتى قادام» ۇلت جوسپارىندا سىبايلاس جەمقورلىققا قارسى كۇرەستى كۇشەيتۋ ماسەلەسىنە باسا نازار اۋدارىلعانىن ايتىپ، بۇگىنگى تالقىلاناتىن - مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن ۇيىمداستىرىلعان باستى تاقىرىپتىڭ وزەكتىلىگىنە توقتالدى.  

«جەمقورلىقتىڭ مەملەكەتتىك باسقارۋدىڭ تيىمدىلىگىن، ەلدىڭ ينۆەستيتسيالىق تارتىمدىلىعىن تومەندەتەتىنى، الەۋمەتتىك-ەكونوميكالىق دامۋدى تەجەيتىنى بارشاعا ءمالىم. وسىعان وراي، جەمقورلىقتىڭ پايدا بولۋىنا ىقپال ەتەتىن جاعدايلاردى جويۋ، مەملەكەتتىك قىزمەتتەردىڭ ساپاسىن ارتتىرۋ، سونىمەن قاتار، جەمقورلىققا قارسى مادەنيەتتى قالىپتاستىرۋ – بۇگىنگى قوعامنىڭ ەڭ باستى ماسەلەسى. مەملەكەتىمىزدىڭ قوزعاۋشى كۇشى كاسىبي مەملەكەتتىك اپپارات، ياعني مەملەكەتتىك قىزمەتشىلەر بولىپ تابىلادى. سوندىقتان دا، مەملەكەتتىك قىزمەتشىلەر اراسىندا سىبايلاس جەمقورلىققا قارسى ءىس-قيمىل تۋرالى زاڭناما تالاپتارىن قاتاڭ ساقتاۋ اسا ماڭىزدى. سونىمەن قاتار، سىبايلاس جەمقورلىققا الىپ باراتىن جول قاراپايىم ادەپ نورمالارىن ساقتاماۋدان تۋىندايتىنىن اتاپ وتكەن ءجون»، - دەدى ج.تۇيمەباەۆ.

مۇنان سوڭ، «100 ناقتى قادام» ۇلت جوسپارى اياسىندا قۇرىلعان وبلىستاعى ادەپ جونىندەگى ۋاكىل ءامىردين الىشەۆ ءسوز سويلەپ، وڭىرىمىزدە وسى باعىتتا اتقارىلىپ جاتقان ءىس-شارالار تۋرالى باياندادى. ايتۋىنشا، ۋاكىلدىك قۇرىلعان ۋاقىتتان بەرى 68 مەملەكەتتىك قىزمەتشى مەن باسقا دا ازاماتتار وزدەرىن تولعاندىرىپ جۇرگەن سۇراقتارىن كوتەرىپ، جاۋاپتار السا، كەنتاۋ جانە قازىعۇرت اۋدانىنان تۇسكەن 2 ارىز ادەپ كەڭەسىنىڭ قاراۋىنا جولدانىپ، ءبىر مەملەكەتتىك قىزمەتشىگە «قىزمەتىنە تولىق ساي ەمەستىگى تۋرالى» تارتىپتىك شارا كورىلگەن. سونىمەن قاتار، ادەپ جونىندەگى ۋاكىلگە سىمتەتىك ارقىلى 7 ادام حابارلاسىپ، مەملەكەتتىك قىزمەتشىلەرمەن شەشىمىن تاپقان. 

سونىمەن بىرگە، وتىرىستا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ بايانداما جاسادى. اگەنتتىك اتىنان جاسالعان مالىمەتتەردە ەلدەگى سىبايلاس جەمقورلىقپەن كۇرەس ساياساتىنىڭ جۇزەگە اسىرىلۋ اسپەكتىلەرى عانا ەمەس، مەملەكەتتىك قىزمەت سالاسىنداعى زاڭنامالىق جيناقتى ەندىرۋ ناتيجەلەرى تىڭدالدى. 

«Transparency International ۇكىمەتتىك ەمەس حالىقارالىق ۇيىمىنىڭ ءۇش جىلدا ءبىر جۇرگىزەتىن «الەمدىك جەمقورلىقتىڭ بارومەترى» زەرتتەۋ ناتيجەلەرى قازاقستاندا  جەمقورلىقپەن كۇرەستە وڭ وزگەرىستەردىڭ بايقالىپ، پارا بەرگەن ازاماتتاردىڭ سانى ازايىپ كەلە جاتقانىن كورسەتكەن. بۇل ەلىمىزدەگى سىبايلاس جەمقورلىقپەن كۇرەسكە قارسى باعىتتالعان ناتيجەلى جۇيەلى جۇمىستىڭ بار ەكەنىن تاعى دا دالەلدەيدى»، - دەدى ا.شپەكباەۆ. 

توراعا ورىنباسارى، سونداي-اق، وڭتۇستىكتەگى ءبىلىم بەرۋ، دەنساۋلىق ساقتاۋ جانە جەر قاتىناستارى سالالارىندا جەڭ ۇشىنان جالعاسقان جەمقورلىقتىڭ ازايماي وتىرعانىن مالىمدەپ، اگەنتتىكتىڭ وبلىستاعى دەپارتامەنتىنە، ۇلتتىق بيۋروعا اتى اتالعان سالا جەتەكشىلىگىنىڭ جۇمىسىن ادەپ جونىندەگى ۋاكىلدىكتە قاراۋ تاپسىرىلعانىن جەتكىزدى. 

جيىن قورىتىندىسى بويىنشا ءسوز العان وبلىس اكىمى وسىناۋ ماڭىزدى ءىس-شارا ءۇشىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆقا العىسىن ءبىلدىرىپ، وتىرىس بارىسىندا ايتىلعان ەسكەرتۋلەر مەن ۇسىنىستاردىڭ بارلىعى نازارعا الىنىپ، ولار بويىنشا ءتيىستى شەشىم قابىلداناتىن حابارلادى. 

سىبايلاس جەمقورلىق كورسەتكىشتەرى بويىنشا ءوڭىرىمىزدىڭ رەسپۋبليكادا 8-ورىندا ەكەنىن اتاپ وتكەن ايماق باسشىسى حالىقتىڭ الەۋمەتتىك جاعدايى تۇزەلىپ، وڭالعاندا اتالعان ولقىلىقتاردىڭ ازاياتىنىن جەتكىزدى. 

«وڭتۇستىك ءوڭىرى ءۇشىن بيزنەس باستاپ، اۋىل شارۋاشىلىعىن دامىتۋ ماڭىزدى شارۋا. سوندىقتان، وبلىستا كاسىپ باستايمىن دەگەن ازاماتقا قۇجات راسىمدەۋدە اكىمشىلىك جاعىنان ەشبىر كەدەرگى بولماۋى ءتيىس. ال بۇل تاپسىرمالاردى ورىنداماعان كەز كەلگەن قۇرىلىم باسشىسىنا كەشىرىم جوق ەكەنىن ەسكەرتەمىن. سوندىقتان، جەمقورلىقتىڭ الدىن الامىز دەسەك، ەلىمىزدىڭ كوركەيىپ، ونداعى حالىق تۇرمىسىنىڭ كوتەرىلۋىنە بىرلەسىپ قىزمەت ەتەيىك»، - دەدى ايماق باسشىسى. 

Abai.kz