وڭتۇستىك وڭىردە جەردىڭ ءتيىمدى يگەرىلىپ، شارۋالار سانىنىڭ ارتۋى بۇل وڭىردەگى جۇمىسسىزدىق ماسەلەسىنىڭ شەشىلۋىنە دە مۇرىندىق بولىپ وتىر. وسى ورايدا ايتا كەتەر جايت، 1999 جىلدىڭ اياعىندا بۇرىنعى 182 ۇجىمشار-كەڭشار جانە مەملەكەتتىك شارۋاشىلىقتار بازاسىندا جەكە مەنشىككە نەگىزدەلگەن 20 مىڭنان استام اۋىل شارۋاشىلىعى قۇرىلىمدارى پايدا بولعان. ال بۇگىنگى كۇنى ولاردىڭ سانى 70 مىڭنان استى.

جالپى اۋىل شارۋاشىلىعى سالاسىندا ەل تۇرعىندارىنىڭ جارتىسىنا جۋىعى جۇمىس ىستەيدى. سوندىقتان، ماڭىزدى ەكونوميكالىق تەتىك بولىپ سانالاتىن جەر ەلدى مەكەندەردە ەڭبەك ونىمدىلىگىن ارتتىرىپ، الەۋمەتتىك-تۇرمىستىق جاعدايدى جاقسارتۋدا شەشۋشى ءرول اتقاراتىنى بەلگىلى.

جەر سەنىمدى ءارى تۇراقتى كىرىس كوزى بولعاندىقتان، بوس جاتپاۋى ءتيىس. جەر ەڭبەك ەتۋگە، ءونىم الۋعا مۇمكىندىك بەرەتىنىن جاقسى بىلەمىز. جەر جونىندە ايتىلعاندا جەردىڭ باستى ماسەلەسىن شەشەتىن شارۋالار جايىن ۇمىتپاۋىمىز كەرەك. ولاردىڭ ءومىرى جەرمەن تىعىز بايلانىستى بولعاندىقتان، جەر جونىندە ءبارىن بىلەدى. مول ءونىم الۋ ءۇشىن تابيعات پەن اۋا رايىنىڭ بارلىق مۇمكىندىكتەرىن پايدالانا الادى. جەردى ءتيىمدى يگەرۋ ارقىلى ەلدى مەكەندەردىڭ الەۋمەتتىك-ەكونوميكالىق دامۋىنا جانە حالىقتىڭ تۇرمىسىن جاقسارتۋعا بولادى.

ەگەر اركىم جەردى ءوزىنىڭ اسىراۋشىسى رەتىندە باعالاي بىلسە، ونىڭ توزۋىنا جول بەرمەس ەدى. وسى ورايدا وڭتۇستىكتەگى شارۋالاردىڭ قارىس قادام جەردى، ءتيىمدى يگەرە باستاۋى ۇلكەن مۇمكىندىك. جەردى يگەرىپ قانا قويماي ونىڭ بار مۇمكىندىگىن پايدالانۋ جەردىڭ توزىپ كەتپەۋىنە جول اشادى. سوندىقتان شارۋالاردىڭ كوبەيىپ، جەرلەردىڭ يگەرىلە باستاۋى قۋانتادى.

ونىڭ ىشىندە شارۋالاردىڭ دا ەڭبەگىن دۇرىس باعالاپ، ءونىمىنىڭ ءتيىستى باعاسىنا ءوتىپ كەتۋى، يگەرىلمەي جاتقان جەرلەرگە تارتۋ، مەملەكەت تاراپىنان ءتۇرلى جەڭىلدىكتەر جاسالۋى الداعى ۋاقىتتا سالاداعى باسقا دا ماسەلەلەردى شەشەتىنىنە كۇمان جوق.

Abai.kz