بيىل قازاقستان رەسپۋبليكاسى ءۇشىن ايتۋلى مەرەكە – ەل تاۋەلسىزدىگىنىڭ 25 جىلدىعى. بۇل تاۋەلسىزدىك ءبىزدىڭ اتا-بابالارىمىزدىڭ جانكەشتى كۇرەسىنىڭ ناتيجەسى. قازاق مەملەكەتتىلىگىنىڭ ىرگەتاسىن قالاۋعا «الاش-وردا» قوزعالىسىنىڭ قايراتكەرلەرى  وراسان زور ۇلەس قوسقانى ءمالىم. حح عاسىر باسىنداعى قازاق ينتەلليگەنتسياسىنىڭ وزىق وكىلدەرى ءا.بوكەيحانوۆ، ا.بايتۇرسىنوۆ، م.دۋلاتوۆ، ح.دوسمۋحامەدوۆ جانە باسقا الاش ارىستارى قازاقستاننىڭ قازىرگى اۋماعىن كەڭەستىك بيلىككە مويىنداتىپ، مەملەكەتتىلىكتىڭ نەگىزىن قالاپ كەتتى.

وسىعان وراي، «دەگدار» قوعامدىق كەلىسىمدى قولداۋ قورى» قوعامدى قورى كورنەكتى قالامگەر، عالىم، پروفەسسور تۇرسىن جۇرتبايدىڭ «الاش» قوزعالىسى جونىندەگى زەرتتەۋلەرى نەگىزىندە 3 تومدىق باسىلىمدى جارىققا شىعاردى. باسىلىم مۇراعات دەرەكتەرىنەن، الاش قايراتكەرلەرىنىڭ سوت پروتسەسى ماتەريالدارىنان، تەرگەۋ حاتتامالارى مەن كورسەتىندىلەردەن، حاتتاردان تۇرادى. «الاش قوزعالىسى» 3 تومدىعى «Samruk-Kazyna Trust» الەۋمەتتىك جوبالاردى دامىتۋ قورىنىڭ تىكەلەي دەمەۋشىلىگىمەن باسىلىپ شىقتى.

ەڭبەكتىڭ تۇساۋكەسەرى جامبىل اتىنداعى قالالىق جاستار كىتاپحاناسىندا ءوتتى. وعان قوعام قايراتكەرلەرى، عالىمدار، تاريحشىلار، جازۋشىلار، باق وكىلدەرى قاتىستى. ولاردىڭ اراسىندا جوبا اۆتورى تۇرسىن جۇرتباي، تاريح عىلىمدارىنىڭ دوكتورى مامبەت قويگەلدى، «دەگدار» قوعامدىق كەلىسىمدى قولداۋ قورى» قوعامدىق قورىنىڭ توراعاسى داۋلەت ءاشىمحان جانە ت.ب. بولدى. قاتىسۋشىلاردىڭ ايتۋىنشا ء«ۇش تومدىقتى شىعارۋداعى ماقسات – تاۋەلسىزدىك قۇندىلىقتارىن ناسيحاتتاۋ، الاش قوزعالىسىنىڭ تاريحىن جۇيەلەۋ، الاش ارىستارىنىڭ ءومىرى مەن قىزمەتىن پاش ەتۋ».

بۇگىنگى تاڭدا الاش ارىستارىنىڭ عۇمىرى مەن شىعارماشىلىعىن، قىزمەتىن وسكەلەڭ ۇرپاققا ۇلگى-ونەگە قىلۋ –  ماڭىزدى مىندەت. الاش قايراتكەرلەرى تۋرالى ءاربىر دەرەك الاش يدەياسىنىڭ ءمانىن اشىپ كورسەتۋگە، ەل ەگەمەندىگى ءۇشىن ولاردىڭ قانداي قۇرباندىققا بارعانىن تەرەڭ ۇعىنۋعا مۇمكىندىك بەرەدى. الاش قوزعالىسىن جان-جاقتى زەرتتەۋ، تاريحي ۋاقيعالاردىڭ ءمان-ماڭىزىن اشىپ كورسەتۋ جاستاردى ۇلتتىق رۋحتا تاربيەلەۋ، جاڭا قازاقستاننىڭ ستراتەگيالىق مىندەتتەرىن ىسكە اسىرۋ مىندەتتەرىنە تولىق سايكەس كەلەدى.

اباي-اقپارات