قازاقستان تاۋەلسىزدىگىنىڭ 25 جىلدىعىنا ارناپ ەلىمىزدەگى ءبىر وبلىستا 25 تال ەگىپتى. بۇل تالدى كۇشى تاسىعان جاس جىگىتتەر دە ەمەس، ەلدىڭ بەت ۇستار بيلىك يەلەرى دە ەمەس، ىسكەرلىگى شىڭدالعان بيزنەسمەندەردە ەمەس ءوزىمىزدىڭ اق جاۋلىقتى انالارىمىز، قارتايعاندا قۇرمەتكە بولەنىپ توردە وتىرۋعا ءتيىستى اجەلەرىمىز وتىرعىزدى.

اپپاق كيمەشەگىن جەلبىرەتكەن بۇل انالاردىڭ ءبىرىنىڭ ارتىنان ءبىرى ءتىزىلىپ قولدارىنا كوشەت پەن اۋىر كۇرەك ۇستاپ، كۇزدىڭ قوڭىر سۋىعىندا قارا جەردىڭ بالشىعىن باسىپ باۋدىڭ ورتاسىندا جۇرگەنى جانە ولاردى اكىمدەر مەن اكىمگە جاقىن اتپالداي ازاماتتاردىڭ ەكى قولىن قۋسىرىپ، تەلەۆيزيا شاقىرىپ تاماشالاپ تۇرعاندارى... قالاي ويلايسىز ناسيحاتقا لايىق، ۋاعىزداۋدى ءجون كورەتىن شارا بولدى ما؟

ۇياتتان جەرگە كىرەتىن، ناعىز جەكسۇرىن شارا بولدى دەسەم ارتىق ايتقانىم بولماس. ەندىگى قالعانى وسى اق جاۋلىقتى اجەلەرىمىز اتپالداي جىگىتتەردىڭ ورنىنا اسكەرگە بارىپ قىزمەت ەتۋى عانا قالىپ تۇرعانداي. ىزادان جارىلىپ كەتۋگە بولار!

ايتسە دە بۇل كورىنىس بۇگىنگى قازاق قوعامىنىڭ ەڭ ءبىر ءالسىز تۇسىن سيپاتتاپ بەردى. اقيقاتتى مويىندايىق. ەلىمىزدە اۋىر جۇمىس ىستەپ، ەر ازاماتتىڭ ءرولىن ءبىر كىسىدەي اتقارىپ وتىرعان ايەل جولداستار از ەمەس. بالا-شاعانى تۋىپ، اس-اۋقاتىن بەرىپ اسىرىپ قانا قويماي، ءۇيدىڭ بارلىق بەل اۋىراتىن جۇمىستارىن اتقارىپ، قاراجاتىن قامداپ، ناپاقا تابۋدى دا موينىنا العان ايەلدەر كوپ. ايەلدەردىڭ مۇنداي بولمىسىن سوناۋ كەڭەستىك زاماننان قالعان ايەل مەن ەر تەڭدىگىنە سىلتەپ وتىرا بەرەتىن ەدىك. «كومباين مەن تراكتوردى ايداۋدى ايەلدەرگە ۇيرەتكەن كەڭەس وداعى، ەندەشە بار تاۋقىمەتتى دە سولارعا ارقالاتا سالايىق» دەگەن سىڭارجاق پىكىرلەردەن ارىلا الماي قالدىق. سول داتتاعان كەڭەستىك زامان كەلمەسكە كەتتى دەلىك، ال ەندىگى تاۋەلسىزدىك العانىمىزعا باقانداي 25 جىل وتسە دە ۇلتتىق قۇندىلىقتارىمىزدى العا تارتا وتىرىپ، قوعامداعى انا مەن بالا، ەر مەن ايەل ءرولىن ءالى كۇنگە نەگە رەتتەي الماي ءجۇرمىز؟!

ءيا، ءومىردىڭ قاتال سىناعىندا ەردىڭ ورنىن ايەل الماستىرۋعا تۋرا كەلەتىن جاعدايلار بولادى. الايدا ول ايەلدىڭ ەسىرگەنىن، يا بولماسا بيلىكتى كوكسەگەنىنەن ەمەس، تىرشىلىكتىڭ تىنىسىن ءۇزىپ الماۋ ءۇشىن، ارپالىسقان شاقتاردا تاعدىردان جەڭىلىپ قالماۋ ءۇشىن جاسالاتىن امالدار. ونداي تىعىرىقتار قازاق ۇلتىنىڭ تاعدىرىندا از بولعان جوق. اشارشىلىق، سوعىس، كۇيزەلىسكە تولى قيلى زاماندار بىرىنەن كەيىن ءبىرى ءوتىپ جاتتى. وسى ۋاقىتتاردا قيىندىقتان قاجىرلىعىمەن الىپ شىققان انالاردى ءالى كۇنگە دەيىن اۋىر جۇمىستان اراشالاي الماي وتىرمىز-اۋ!

دەسە دە بۇگىنگى بەيبىت زاماندا بەل اۋىرتاتىن جۇمىستاردى بىلەگى مىقتى جىگىتتەرگە بەرۋگە بولماس پا ەدى. ءاۋ باستان ادام اتا، حاۋا انا جەر بەتىنە تۇسكەلى ەردىڭ ءجونى ناپاقا تابۋ داعى، ايەلدىڭ ءجونى دۇنيەگە ءسابي اكەلىپ، سونىڭ دەنى-قارنىن ساۋ ەتىپ ءوسىرۋ ەمەس پە ەدى. ءاربىر ەر ازامات ءۇي سالۋعا، اعاش ەگۋگە، بالاسىنا دۇرىس تاربيە بەرۋگە مىندەتتى دەمەۋشى مە ەك.

ەندەشە، ءبىزدىڭ كەيبىر شەندىلەرىمىز ەل تاۋەلسىزدىگىنىڭ 25 جىلدىعىنا ارناپ تال ەگۋ كەزىندە اتقارىلعان شارانىڭ يدەولوگيالىق ءمان ماعىناسىن ۇمىتقان سىڭايلى. وسى شارانى ۇيىمداستىرۋشىلاردىڭ اراسىندا ءبىر اقىلدى باس تابىلىپ: «اق جاۋلىقتى انالارىمىزعا كۇرەك ۇستاتىپ قويعانىمىز ۇيات بولادى. مۇنداي جەر قازاتىن جۇمىستاردى ازاماتتار ىستەۋگە ءتيىستى» دەمەگەن سياقتى. ەسەسىنە تەلەديدار الدىندا وتىرعان جۇرتشىلىقتىڭ بۇل اقىلسىز شاراعا اشۋ ىزاسى كەلگەنى بار دا، ەندى ءبىر ەسەرلەرى «انە تال ەگۋ اجەلەردىڭ جۇمىسى ەكەن، مەن دە اجەمە تال ەككىزەيىن» دەگەندەرى دە بار شىعار. ءبىرىنشى توپقا قاراعاندا ەكىنشى پىكىردەگى ادامداردىڭ كوبىرەك بولماسىنا كىم كەپىل.

ەندەشە، قۇرمەتتى اكىمدەر مەن اكىمگە جاقىندار، ەندىگى شارالاردى ۇيىمداستىرۋدا باستى نازاردا ۇلتتىق قۇندىلىقتار مەن قوعامدىق يدەولوگيانى ۇستاۋلارىڭىزدى سۇرايمىن. سىزدەردىڭ ءاربىر جاساعان قوعامدىق ءىس-شارالارىڭىزدىڭ ارتىندا كوزدەرىن تىگىپ ەل تۇرعانىن جانە وسى شارالاردان ولار وزدەرىنە ءاردايىم ساباق الۋعا تىرىساتىنىن ەسكەرتكىم كەلەدى. لايىم جاقسى ۇلگىلەردى عانا كورسەتەيىك.

گۇلجان ءىزتاي

Abai.kz