«1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنى» مەرەكەلىك شاراسىن وڭتۇستىكقازاقستاندىقتار سالتاناتتى تۇردە اتاپ ءوتتى.

«تۇركىستان» سارايىنداعى «1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنى» مەرەكەلىك جيىنىنا قاتىسىپ، ءسوز باستاعان وبلىس اكىمى جانسەيىت تۇيمەباەۆ بارشا وبلىس تۇرعىندارىن اتاۋلى كۇنمەن قۇتتىقتاپ، مەملەكەتتىك مەرەكەنىڭ ەلىمىز ءۇشىن ماڭىزى تەرەڭدىگىنە توقتالدى.

«قازاقستاننىڭ الەمدە وزىندىك ورنى بار ەل بولىپ ورنىعۋىنا، قارقىندى دامۋىنا ەلىمىزدىڭ سىرتقى جانە ىشكى ساياساتىنداعى جەتىستىكتەرىنە ۇلت كوشباسشىسى نۇرسۇلتان ءابىشۇلى نازارباەۆتىڭ سىڭىرگەن ەڭبەگى زور. مەملەكەتتىڭ سىرتقى ساياسي باعىتىن ءدال ايقىنداپ، شەتەلدەرمەن دوستىق قارىم-قاتىناس ورناتا ءبىلدى. ەلباسىنىڭ جان-جاقتى سارالانعان ىشكى جانە سىرتقى ساياساتىنىڭ ارقاسىندا ەلىمىز ەشبىر ساياسي جانە الەۋمەتتىك-ەكونوميكالىق قيىندىقتارعا ۇشىراعان جوق. دەربەس دامۋدىڭ وتپەلى كەزەڭىندەگى سىناقتاردى ءساتتى ەڭسەردى. داعدارىستار كەزىندە دە توقتاپ قالمادى. العا قاراي ىلگەرىلەۋ مەن وركەندەۋ جولىنا شىقتى»، - دەدى ج.تۇيمەباەۆ.

مۇنان سوڭ، ايماق باسشىسى وبلىستىڭ الەۋمەتتىك-ەكونوميكالىق دامۋىنا ۇلەس قوسقان 15 سالا ۇزدىگىن وبلىس اكىمىنىڭ العىس حاتىمەن ماراپاتتادى.

ءىس-شارادا وپەرا جانە بالەت تەاترىنىڭ انشىلەرى قازاقستان رەسپۋبليكاسىنىڭ تۇڭعىش پرەزيدەنتىنە ارنالعان «ەلباسى» تۋرالى ءاندى ورىندادى.

سونىمەن قاتار، مەرەكەلىك دۋمان قازاقستان رەسپۋبليكاسى پرەزيدەنتىنىڭ ءومىرى مەن قىزمەتىنە ارنالعان «ەلباسى جولى» كينوەپوپەياسىنىڭ جالعاسى بولىپ تابىلاتىن «جۇلدىزدار توعىسقاندا» كوركەم فيلمىمەن جالعاسىن تاپتى.

جاڭا فيلم ن.نازارباەۆتىڭ ومىرىندەگى اسا قىزىقتى كەزەڭدى - ەلباسىنىڭ 1984 جىلعى قازاق كسر مينيسترلەر كەڭەسىنىڭ توراعاسى قىزمەتىنە تاعايىندالىپ، تاۋەلسىز قازاقستان رەسپۋبليكاسىنىڭ پرەزيدەنتى بولىپ سايلانعانعا دەيىنگى ۋاقىتتى جانە ودان كەيىنگى العاشقى كەزەڭدى قامتيدى.

Abai.kz