قر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ 2017-2021 جىلدارعا ارنالعان اگروونەركاسىپ كەشەنىن دامىتۋ باعدارلاماسىن تانىستىردى، - دەپ xابارلايدى قازاقپارات ءتىلشىسى ۇكىمەت ۇيىنەن.

باعدارلاما اياسىندا استىق القاپتارىنىڭ كولەمىن 2,3 ملن. گەكتارعا ازايتۋ جوسپارلانعان. وسىنىڭ ناتيجەسىندە جىل سايىن 3 ملن. تونناعا از بيداي جينالاتىن بولادى. سەبەبى بۇگىندە ەلىمىزدە 2,9 ملن. توننا بيداي ارتىعىمەن قالىپ وتىرادى. ەندى، سونىڭ ورنىنا مايلى داقىلداردى كوپتەپ ءوسىرۋ كوزدەلىپ وتىر. ويتكەنى وسى ساناتتاعى ونىمدەردىڭ تاپشىلىعى بار. ماسەلەن، ارپا (1,2 ملن. توننا), قانت قىزىلشاسى (1 ملن. تونناعا جۋىق), جۇگەرى جانە تاعى باسقا ءداندى-داقىلدارعا سۇرانىس جوعارى بولىپ تۇر. سونىڭ بارلىعى سىرتتان جەتكىزىلەدى. ال جاڭا باعدارلاما اياسىندا اتالعان ونىمدەردى وزىمىزدە ءوندىرىپ، ىشكى نارىقتى بارىنشا تولتىرۋ جوسپارلانعان. بۇدان بولەك، ەت پەن ءسۇت ءوندىرىسىن دامىتۋ جۇمىسىنا باسا نازار اۋدارىلادى. ول ءۇشىن اۋىلدى جەرلەردە كووپەراتيۆتەردى كوپتەپ اشۋ جوسپارلانعان.

"بۇگىنگى تاڭدا اۋىل شارۋاشىلىعى ونىمدەرىنىڭ 70-90 پايىزى قوسالقى شارۋاشىلىقتاردا وندىرىلەدى. ال ول ءونىمنىڭ ءبارى زاۋىتتارعا جەتكىزىلمەيدى. سونىڭ  سالدارىنان قايتا وڭدەۋ كورسەتكىشى 30 پايىزدان اسپاي وتىر. ماسەلەن، قازىر ەلىمىزدە 400-دەن استام قايتا وڭدەيتىن كاسىپورىن بار. ولاردىڭ بارلىعى تەك 20-60 پايىزعا عانا جۇمىس ىستەپ تۇر. سوندىقتان جاڭا باعدارلاما اياسىندا قايتا وڭدەۋدى ۇلعايتىپ، ىشكى نارىقتى دايىن ونىمدەرمەن بارىنشا تولتىرۋ جوسپارلانىپ وتىر. ول ءۇشىن رەسپۋبليكا بويىنشا 1200 كووپەراتيۆ قۇرىلادى. ولار قايتا وڭدەۋگە قاجەتتى ءونىمدى دايارلايتىن بولادى. ءبىزدىڭ ەسەبىمىزگە سايكەس، وسى شارالاردىڭ ارقاسىندا اۋىل xالقى ءوز ونىمدەرىن ساتىپ، شامامەن 300 ملرد. تەڭگە كولەمىندە تابىس تابا الادى", - دەيدى ا.مىرزاxمەتوۆ.

ونىڭ ايتۋىنشا، جاڭا باعدارلاما اياسىندا مەملەكەت مال شارۋاشىلىعى سالاسىنىڭ تيىمدىلىگىن 40 پايىزعا، ال وسىمدىك شارۋاشىلىعىن 30 پايىزعا دەيىن ارتتىرماقشى.

مينيسترلەر كابينەتى جاڭا باعدارلامانىڭ ەنگىزىلۋىن قولدادى. الايدا رەسمي تۇردە ماقۇلداعان ءجون. پرەمەر-مينيستر ب.ساعىنتاەۆ اتالعان قۇجاتتى تولىعىمەن پىسىقتاپ، جەلتوقسان ايىندا ماقۇلداۋدى ۇيعاردى. "جاڭا جىلدان باستاپ ءبىز جاڭا باعدارلاما بويىنشا جۇمىس ىستەۋىمىز كەرەك",- دەدى ول.

اباي-اقپارات