وڭتۇستىك قازاقستان وبلىسىنىڭ اكىمدىگىندە ءوڭىر باسشىسى جانسەيىت تۇيمەباەۆتىڭ توراعالىعىمەن اكىمدىكتىڭ كەزەكتى ءماجىلىسى ءوتتى.

كۇن تارتىبىندە مال شارۋاشىلىعىن، مادەنيەت سالاسىن، ءتۋريزمدى دامىتۋ ماسەلەلەرى مەن پەرسپەكتيۆالارىن، مەملەكەتتىك جاستار ساياساتىن جۇزەگە اسىرۋ جايى مەن كوممۋنالدىق مەنشىكتىڭ ساقتالۋى جانە پايدالانۋىن باقىلاۋ سىندى 5 ماسەلە قارالدى.

جيىندا جوعارىدا اتالعان ءبىرىنشى ماسەلە بويىنشا بايانداما جاساعان وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆ مال شارۋاشىلىعى بويىنشا سوڭعى ەكى جىلدا ءىرى قارا مال سانى 35 مىڭعا ارتىپ 865 مىڭ باستى قۇراعانىن، قوي-ەشكى 155 مىڭنان 3 ملن. 893 مىڭعا وسكەنىن، ال جىلقى 16 مىڭعا ارتىپ 230 مىڭعا جەتكەنىن ايتتى.

سونىمەن قاتار، ول مال شارۋاشىلىعى ونىمدەرىن وندىرۋدە جوعارى كورسەتكىشتەرگە قول جەتكىزىلگەنىن اتاپ ءوتتى. ماسەلەن، ەت ءوندىرۋ  111,4%-عا، ءسۇت ءوندىرۋ – 104,8 %-عا، جۇمىرتقا ءوندىرۋ – 112,1 %-عا، ءجۇن ءوندىرۋ 110,1 %-عا ارتقان.

دەگەنمەن، وبلىستا مال سانى مەن ونىمدەرى ارتقانىمەن كەلەسى اۋدانداردا تومەن كورسەتكىش بايقالۋدا. اتاپ ايتقاندا، اعىمداعى جىلدىڭ 10 ايىنىڭ قورىتىندىسىمەن ىقم سانى بايدىبەك، ورداباسى، قازىعۇرت اۋداندارىندا، ۋاق مال بايدىبەك، ورداباسى، سوزاق، تولەبي اۋداندارىندا، جىلقى بايدىبەك، تۇلكىباس اۋداندارىندا، تۇيە بايدىبەك، سارىاعاش، تۇلكىباس اۋداندارىندا، قۇس سانى بايدىبەك، قازىعۇرت، سايرام، تۇلكىباس اۋداندارىندا كەمىگەن.

وسى جايتتاردى ەسكەرگەن وبلىس اكىمى جالپى مال شارۋاشىلىعىن دامىتۋ بويىنشا جۇيەلى شارالار ازايعانىنا توقتالدى.

«وسى باعىتتاعى ەڭ باستى ماقسات – ازىق-تۇلىك قاۋىپسىزدىگىن قامتاماسىز ەتۋ بولىپ تابىلادى. تابيعاتى قولايلى ءوڭىر بولا تۇرا، ءبىز 25 جىلدا ىشكى نارىقتى مال شارۋاشىلىعى ونىمدەرىمەن تولىق قامتاماسىز ەتە الماي كەلەمىز. بىزدە شىعارىلاتىن ونىمدەر باسەكەگە كابىلەتى تومەن، سوندىقتان باسقا وبلىستاردى بىلاي قويعاندا، ءبىزدىڭ تۇتىنۋشىلار شەت ەلدىڭ ونىمدەرىن ساتىپ الۋعا ءماجبۇر»،-دەدى ج.تۇيمەباەۆ.

سونىمەن قاتار، مال شارۋاشىلىعىن دامىتۋدىڭ باستى ماسەلەسى - بۇل ۆەتەريناريالىق قاۋىپسىزدىك ەكەنىن ايتقان اكىم بۇل ماسەلە بويىنشا ءتيىستى جۇمىستار جۇرگىزىلمەي وتىرعاندىعىنا توقتالدى.

ماسەلەن، بىلتىرعى جىلمەن سالىستىرعاندا ادامدى كەنە شاعۋ فاكتىسى  40,4 پايىزعا وسكەن.  بۇل زالالسىزداندىرۋ جۇمىستارىنىڭ  ۋاقىتىلى جۇرمەۋىنەن بولىپ وتىر.

كۇن تارتىبىندەگى ەكىنشى ماسەلە بويىنشا مادەنيەت باسقارماسىنىڭ 2017-2020 جىلدارعا ارنالعان دامۋ جوسپارى بويىنشا  باسقارما باسشىسى نۇربولات احمەتجانوۆ مالىمدەمە جاسادى. 

ونىڭ ايتۋىنشا، جىل باسىنان بەرى وڭىردەگى مادەنيەت جانە ونەر مەكەمەلەرىندە 23021 ءارتۇرلى مادەني  ءىس-شارالار وتكىزىلگەن. ال، تاۋەلسىزدىكتىڭ 25 جىلدىعىنا ارنالعان بىرقاتار جاڭا ءىس-شارالار قولعا الىنعان.

سونداي-اق، ول سارىاعاش اۋدانىندا 5 اۋىلدىق مادەنيەت ءۇيى مەن شاردارا اۋداندىق مۋزەيىنىڭ جاڭا عيماراتى پايدالانۋعا بەرىلگەنىن جەتكىزدى.

جاسالعان بايانداماعا قاناعاتتانباعان وبلىس اكىمى ءاربىر ءىس رۋحاني تۇرعىدان جاسالۋ قاجەتتىگىنە توقتالدى.

-        مادەنيەت باسقارماسى وكىنىشكە وراي، اۋدان، قالالارداعى ماسەلەلەرگە تىپتەن كوڭىل بولمەيدى. قازىر، كوپتەگەن اۋىلداردا مادەنيەت وشاقتارى مۇلدەم جوق،  ال بارلارى قاڭىراپ بوس تۇر. قاراپايىم حالىق ءۇشىن مادەني ءىس-شارالار ۇيىمداستىرىلمايدى. تۇرعىنداردىڭ كوممەرتسيالىق كونتسەرتتەردەن باسقا باراتىن مادەني ءىس-شارالارى جوقتىڭ قاسى، - دەدى ءوڭىر      باسشىسى.

سونىمەن قاتار، مادەنيەت باسقارماسى ۇرپاقتار ساباقتاستىعى بويىنشا تاربيەلىك ءمانى بار، ءداستۇرلى مادەنيەت پەن ادەت-عۇرىپتى بولاشاق ۇرپاققا جەتكىزۋ بويىنشا جۇمىستار جۇرگىزىلمەي وتىرعاندىعىن ايتقان اكىم قازىرگى جاستارعا ءتول مادەنيەتىمىزدى، ءداستۇرىمىزدى جەتكىزۋ – ءبىزدىڭ تاريحى جاۋاپكەرشىلىگىمىز ەكەنىن اتاپ ءوتتى.

وڭتۇستىك قازاقستان وبلىسىنىڭ ءتۋريزمى ينفراقۇرىلىمدى دامىتۋ، ماركەتينگ، قىزمەت كورسەتۋ ساپاسىن ارتتىرۋ بويىنشا 3 باعىتتا دامىتىلىپ وتىر. بۇل جونىندە وبلىستىق كاسىپكەرلىك، يندۋستريالدى-يننوۆاتسيالىق دامۋ جانە تۋريزم باسقارماسىنىڭ باسشىسى مارات قاراباەۆ بايانداما جاسادى.

وسى باعىتتارعا سايكەس، ول ۇزاق جانە قىسقا مەرزىمدى ءىس-شارالار جوسپارى جۇزەگە اسىرىلىپ كەلەتىنىن ايتقان ول اتالعان جۇمىستاردى  جانداندىرۋ ماقساتىندا بىرقاتار ۇسىنىستارىن جەتكىزدى. 

وڭتۇستىك قازاقستان تۋريستىك ايماققا اينالۋى ءۇشىن بارلىق مۇمكىندىكتەر قاراستىرىلعانىن ايتقان ايماق باسشىسى 5 ميلليون حالقى بار انكارا قالاسىنىڭ از ۋاقىت ىشىندە جوعارى دەڭگەيدە دامىعانىن ۇلگى ەتتى. سونداي-اق، ول اتالعان جۇمىستار ءۇشىن ولاردىڭ مەملەكەتتەن قارجى الماعانىن، ونى كاسىپكەرلەرى، سول جەردىڭ تۇرعىندارى بيلىكتىڭ ۇيىمداستىرۋىمەن بارلىعى بىرلەسە وتىرىپ شەشكەنىن جەتكىزدى. 

ء«بىزدىڭ تۋريستىك وڭىرگە اينالۋعا تولىق مۇمكىندىكتەرىمىز بار، بىراق، وكىنىشكە وراي ءبىز تۋريستەر كەلەتىن كلاستەر جاساي الماي وتىرمىز.تۋريستىك ورىنداردا قاجەتتى قوناقۇيلەر جوق، تۋريستەر ءۇشىن جول بويىندا قاجەتتى سەرۆيس جوق. تۋريستەر ءۇشىن جول كورسەتەتىن سىلتەمەلەر جوق، ينتەرنەت، ءموبيلدى بايلانىس سىن كوتەرمەيدى، كولىك ينفراقۇرىلىمى ناشار. سونداي-اق، تۋريستىك ورىنداردىڭ سانيتارلىق جاعدايى تومەن»،-  دەدى اكىم.

وبلىستا 3 ميلليونعا جۋىق حالىقتىڭ 26,8 پايىزىن جاستار قۇرايتىنىن ەسكەرگەن جەرگىلىكتى بيلىك جاستار ماسەلەسىن كۇن تارتىبەنەن تۇسىرگەن ەمەس. 

   وسى جىلدىڭ 10 ايىندا كامەلەتكە تولماعاندار اراسىنداعى قىلمىس 35,5 پايىزعا،  جاستار اراسىنداعى جۇمىسسىزدىق دەڭگەيىمەن ناشاقورلىقتىڭ وسكەنىنە توقتالعان ايماق باسشىسى وبلىستىق جاستار ساياساتى ماسەلەلەرى جونىندەگى باسقارما باسشىسى بولات جانابىلگە جاستاردى ەڭبەككە باۋلۋ كەرەكتىگىن ايتتى.

جيىندا سونىمەن قاتار، كوممۋنالدىق مەنشىگىنىڭ ساقتالۋى مەن پايدالانۋىنا باقىلاۋ بويىنشا اتقارىلعان جۇمىستار جونىندە وبلىستىق قارجى باسقارماسىنىڭ باسشىسى كەڭەسبەك مەندەباەۆ باياندادى.

ءماجىلىس سوڭىندا وبلىس اكىمى ج.تۇيمەباەۆ ءتيىستى باسقارۋ ورگان باسشىلارى مەن اۋدان، قالا اكىمدەرىنە كوممۋنالدىق مۇلىكتىڭ ساقتالۋى مەن ءتيىمدى پايدالانىلۋىنا باقىلاۋدى كۇشەيتۋدى جانە مەملەكەتتىك مۇلىككە نەمقۇرايلى قاراعان ءاربىر باسشىعا زاڭ اياسىندا قاتاڭ شارا كورۋدى تاپسىردى.

سونىمەن بىرگە مۇنداي ءماجىلىس دۇنيەنىڭ ەشبىر مەملەكەتىندە جوق دەگەن اكىم، بارلىق جاسالعان بايانداماعا كوڭىلى تولماعانىن جەتكىزىپ، بايانداما جاساۋدىڭ جاڭاشا باعىتىنا كوشۋدى، ياعني ناقتى ءىس-شارا جوسپارى جاسالىپ، ءماجىلىس وتكىزۋدىڭ ءتارتىبىن وزگەرتۋ قاجەتتىگىن مىندەتتەدى.

Abai.kz