نۇرلان نوعاەۆ تورت ساتىپ العان اۋىل دۇكەنىنىڭ جۇمىسى ءجۇرىپ كەتتى.

وسىدان بىرنەشە اي بۇرىن نۇرلان نوعاەۆ اتىراۋ وبلىسىنىڭ اۋداندارىن ارالاپ شىعىپ، حالىقپەن كەزدەسىپ، مۇڭ-مۇقتاجىن تىڭداعان ەدى. سول ساپارىنىڭ بارىسىندا وبلىس اكىمى تۇششىقۇدىق اۋىلىنداعى ءتاتتى تاعامدار ساتاتىن دۇكەنگە باس سۇققان بولاتىن. ايماق باسشىسىنىڭ قانداي كومەك كەرەك دەگەن ساۋالىنا كاسىپ يەسى رايحان ەرمۇحانوۆا (سۋرەتتە) جاڭادان ساتىپ العان پەشتەرىن ىسكە قوسۋ ءۇشىن قۋاتى 380 ۆولت توق كەرەك ەكەنىن ايتىپ، وسى ماسەلەنى شەشۋگە جاردەمدەسۋىن سۇراعان بولاتىن.

وسى اڭگىمەدەن سوڭ بىرنەشە كۇننەن كەيىن توق تارتىلىپ، كاسىپكەر جۇمىسىن جاڭا قارقىنمەن باستادى. ونىڭ ايتۋىنشا، ءوندىرىستى كەڭەيتىپ، جاڭا جۇمىس ورىندارىن اشۋ جوسپارلانىپ وتىر. 

اۋىلدىق كاسىپكەر "جۇمىسپەن قامتۋ 2020" باعدارلاماسى اياسىندا 3 ميلليون تەڭگە نەسيە العان. ول كەيىن وسى اقشاعا تسەح سالىپ، قاجەتتى قۇرال-جابدىقتارىن ساتىپ الىپتى. 

ايتا كەتەلىك، جازعى ساپارىندا نۇرلان نوعاەۆ وسى تسەحتان 2 مىڭ تەڭگەلىك تورت ساتىپ العان ەدى.  "شاعىن جانە ورتا بيزنەسكە قولداۋ ءبىزدىڭ باستى جۇمىسىمىز. كاسىپكەرلەرگە كومەكتى ايامايمىز", -  دەگەن ەدى سوندا ايماق باسشىسى.

Abai.kz