الماتىدا بەلگىسىز جىگىتتەر ارۋجان سايننىڭ قورىنىڭ وكىلىمىز دەپ جۇرتتان اقشا جيناعان.

“دوستار! ءبىزدىڭ قور قولما-قول اقشا جينامايدى. ءبىز تەك قايىرىمدىلىق قاراجاتىن بانك، سمس، تەرمينال جانە online-تولەم ارقىلى قابىلدايمىز”، – دەپ جازدى ول.

ەلەنا كۋكەلە ەسىمدى قولدانۋشىنىڭ جازۋىنشا، بەيتانىس جىگىتتەر الماتىنىڭ ورتالىق كوشەلەرىندە جۇرتتان اقشا جيناعان. وزدەرىن ارۋجان ساين قورىنىڭ وكىلدەرىمىز دەپ تانىستىرعان جىگىتتەر، سۋرەتكە تۇسۋدەن دە ەش قاشپاعان. ولار كۇن سايىن ءارتۇرلى قۇرامدا، بىراق ءدال وسى كيىممەن جۇرتتان اقشا سۇرايدى ەكەن.

قايىرىمدىلىق قورىنىڭ باسشىسىنىڭ ايتۋىنشا، ولار قايىرىمدىلىق ماقساتتاعى اقشانىڭ بارلىعىن زاڭ اياسىندا جيناپ، سول زاڭ اياسىندا عانا جۇمسايدى. سول سەبەپتى قوردىڭ جۇمىس جۇيەسى تولىقتاي دەرلىك بانك ەسەپشوتى جۇيەسىنە ۇيلەستىرىلگەن.

“ەشبىر ادامعا ءبىزدىڭ قوردىڭ اتىنان قازاقستاننىڭ قالالارىندا، بيزنەس-ورتالىقتاردا، كافەلەردە، كوشەلەردە اقشا جيناۋعا وكىلەتتىلىك بەرىلمەگەن”، – دەدى ارۋجان ساين.

نۇرسۇلۋ نايمانوۆا

Abai.kz