قر پرەزيدەنتى نۇرسۇلتان ءابىشۇلى نازارباەۆقا

اسا مارتەبەلى نۇرسۇلتان ءابىشۇلى!

ءسىزدىڭ قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ ارقىلى بيلىك تارماقتارى اراسىندا وكىلەتتىكتەردى قايتا ءبولۋ تۋرالى باستاماڭىزدى تولىق قولدايمىن. سونىمەن بىرگە «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جاڭا جولداۋىڭىزدى دا تولىق قولداي وتىرىپ، ءوز ويلارىممەن بولىسكىم كەلەدى.

تاۋەلسىز، جاڭا، الەۋەتتى قازاق ەلىن قۇرۋ، بۇكىل دۇنيە جۇزىنە تانىتۋداعى ۇلى ەڭبەگىڭىزدى بۇل كۇندە الەم xالقى مويىندادى. 

تاۋەلسىزدىكتىڭ توبەسى كورىنە باستاعان سوناۋ ءبىر ەلەڭ-الاڭ تۇستا ءسىز باتىل شەشىم قابىلداپ، كورەگەندىكپەن جولعا قويعان كوشى-قون ساياساتى دا ءوز جەمىسىن بەرىپ ۇلگىردى، 25 جىلدا ميلليوننان اسا قانداسىمىز اتاجۇرتىنا ورالدى. مىنە بۇل ءسىزدىڭ جولداۋدا ايتقان «ساپالى ادام كاپيتالىن دامىتۋ» تۋرالى تاپسىرماڭىزعا سايادى. جولداۋدا كورسەتىلگەن 5 باسىمدىلىقتى جۇزەگە اسىرۋ ءۇشىن الدىمەن زاڭدىق نەگىز بەن  دۇرىس مەحانيزم كەرەك ەكەنى بەلگىلى!

سول تۇرعىدان العاندا «قازاقستار رەسپۋبليكاسىنىڭ شەتەلدەگى وتانداستاردى قولداۋ تۋرالى زاڭ جوباسىن» قابىلداۋ كەرەك دەپ ەسەپتەيمىن!

بۇل – ۇلتى قازاق قانداستارىمىز بەن تاريحي تاعدىرىن ەلىمىزبەن بايلانىستىراتىن وتانداستارىمىزدىڭ كوپتەن كۇتكەن ارمانى. ساپالى ادام كاپيتالىن قالىپتاستىرۋ جانە تارتۋ ءۇشىن ماڭىزدى زاڭدىق نەگىز جاسار ەدى. ونىڭ ۇستىنە ەلىمىزدىڭ تۋريستىك سالاسىن دامىتۋ، ينۆەستيتسيا تارتۋ، مامانداردى تارتۋ سىندى ۇزاق بولاشاقتىق دامۋىمىزعا ۇلتتىق قاۋىپسىزدىگىمىزگە زيان كەلتىرمەيتىن، ىڭعايلى ساياسات بولماق. بۇل ءسىزدىڭ «قانداستارىمىزدى قولداۋ» ساياساتىڭىزدىڭ جەمىستى جالعاسى بولار ەدى.

ءبىز ءوز تاراپىمىزدان «قازاقستار رەسپۋبليكاسىنىڭ شەتەلدەگى وتانداستاردى قولداۋ تۋرالى زاڭ جوباسىن» دايىنداپ قويدىق. ەگەر دە بۇل ءىس قولعا الىنىپ جاتسا، دايىن زاڭ جوباسىن پارلامەنت قاراۋىنا ۇسىنامىز.

اسا مارتەبەلى نۇرسۇلتان ءابىشۇلى!

ءبىز ءوزىڭىز باسشىلىق ەتكەن، دامۋدىڭ داڭعىل جولىنا تۇسكەن تاۋەلسىز ەلدىڭ جاستارى رەتىندە ءسىزدى قولدايمىز، تاۋەلسىز ەلدىڭ بولاشاعى ءۇشىن ايانباي ەڭبەك ەتۋگە بارمىز!

قۇرمەتپەن:  جۋرناليست، اقىن بەيسەن احمەتۇلى

Abai.kz