الماتىداعى «رۋح بگ» باسپاسىنان جازۋشى بەيبىت قويشىباەۆتىڭ «ادەبيەت مۇددەسى» اتتى پۋبليتسيستيكالىق حرونيكا كىتابى جارىققا شىقتى. اۆتور بۇل جيناعىنا 1969 جىلدان 2016 جىلعا دەيىنگى كەزەڭدە ادەبيەت پەن ادەبي شارۋاشىلىق حاقىندا، سونداي-اق مەملەكەتتىك تاۋەلسىزدىكپەن قول ۇستاسا كىرگەن قوعامداعى وزگەرىستەرگە، جاڭا ەكونوميكالىق قاتىناستارعا بايلانىستى جازۋشىلار ۇيىمدارى باستان وتكەرگەن دامۋ ساتىلارى جونىندە جازعان ماقالالارىن، بەرگەن سۇحباتتارىن، بىرقاتار باسقا دا ماڭىزدى قۇجاتتاردى توپتاستىرعان.

كىتاپ جازۋشىنىڭ قىرىق شاقتى جىلداي ىلگەرىدە جازىلعان، جاستىق شاعىنداعى ۇستانىمىن بىلدىرەتىن شاعىن ماقالامەن باستالادى.  ودان كەيىن حرونولوگيالىق بىرىزدىلىكپەن جيناقتالعان پۋبليتسيستيكالىق ماقالالار قالامگەردىڭ سول ۇستانىمدى ارقاۋ ەتە كەلە، ءوز بويىندا قالىپتاستىرعان جۇمىسكەرلىك فيلوسوفياسىنىڭ، شىعارماشىلىققا كوزقاراسىنىڭ كەي كورىنىستەرىنەن،  ادەبيەت  تۋرالى  ويلارىنان سىر شەرتەدى. جيناققا اۆتوردىڭ  بىرقاتار ادەبي-سىني جۇمىستارى، سونداي-اق ءومىر مەن ادەبيەت جايىنداعى پايىمدارىن، وي-پىكىرلەرىن بىلدىرەتىن  ماقالالارى دا ەنگەن. پۋبليتسيستيكالىق حرونيكا تۇرىندە قۇراستىرىلعان بۇل كىتاپتا ايقىن اڭعارىلاتىن تاعى ءبىر جەلى بار. ول قالام قايراتكەرلەرىنىڭ شىعارماشىلىق ۇيىمى تاريحىنا ارنالعان. مۇنداعى ماقالالار، سۇحباتتار مەن قۇجاتتار جازۋشىلار وداعىنىڭ دامۋ تاريحىنان، ونىڭ كوپشىلىككە بەيمالىم تۇستارىنان حاباردار ەتەدى. اتاپ ايتقاندا، ءتورت بولىمنەن تۇراتىن پۋبليتسيستيكالىق حرونيكانىڭ العاشقى ءبولىمى جازۋشىلار وداعىنىڭ تاۋەلسىزدىك قارساڭىنداعى  احۋالىنا اۆتوردىڭ سىنشىلدىق كوزقاراستاعى سوزدەرىمەن تامامدالادى.

ال ەكىنشى بولىمىندە تاۋەلسىزدىكتىڭ العاشقى جىلدارىندا  جازۋشىلار وداعى قابىرعاسىندا اتقارىلعان كەيبىر ىستەر، زامانا تۋعىزعان وزگەرىستەر جانە سوعان وراي وداقتا جاسالعان رەۆوليۋتسيالىق شارالار، ۋاقىت تالابىنا ساي جۇرگىزىلگەن رەفورما، سول ورايدا شىعارماشىلىق ۇيىم دۋشار بولعان شىرعالاڭ جايىندا اڭگىمەلەنەدى. ءۇشىنشى، ءتورتىنشى بولىمدەردە جازۋشىلار ۇيىمدارىندا ورىن العان كەرى رەفورما سيپاتتى شارالاردىڭ بەل الىپ، ورنىعۋى باياندالادى. ارىپتەستەردىڭ قوعامىمىزداعى دەموكراتيالىق ۇدەرىس تابيعاتىنا جات ءىس-ارەكەتتەرى سىنالادى.

قىسقاسى، جيناقتاعى ماقالالار مەن سۇبحاتتار اۆتوردىڭ قوعامدىق-ساياسي جانە ادەبي-سىني وي-پىكىرلەرىمەن قوسا، قالامگەرلەر ۇيىمدارىنىڭ ىشكى ءومىرىن ۇيىمداستىرۋعا قاتىستى پايىمدارى مەن ۇسىنىستارىن، ناقتى احۋال جانە جول بەرىلگەن كەمشىلىكتەر جونىندە ادىلەتتىلىك تۇرعىسىنان جاسالعان قورىتىندىلار، وداق  قۇرىلىمى تاريحىنان باسقا دا  ماڭىزدى ماعلۇماتتار بەرەدى.  

كىتاپ قالامگەرلەرگە، ادەبيەتشىلەر ۇيىمدارى تاريحىن زەرتتەۋشىلەرگە، ادەبيەت سۇيەر قاۋىمعا، قالىڭ كوپشىلىككە ارنالعان.

«ادەبيەت مۇددەسى» پۋبليتسيستيكالىق حرونيكاسىن ساتىپ العىسى كەلەتىن ازاماتتار (8727) 374-83-42, 8701 746 33 01 تەلەفوندارىنا حابارلاسۋىنا بولادى. 

Abai.kz