جۇما, 6 جەلتوقسان 2019
دەپ جاتىر 2509 0 پىكىر 27 قاڭتار, 2017 ساعات 12:13

لەوناردو دي كاپريو قازاقستانعا كەلمەك.

گولليۆۋد اكتەرى، بۇۇ-نىڭ كليمات پروبلەمالارى جونىندەگى بەيبىتشىلىك ەلشىسى، «وسكار» سىيلىعىنىڭ لاۋرەاتى لەوناردو دي كاپريو قازاقستان ۇكىمەتى مەن جولبارىستاردىڭ پوپۋلياتسياسىن قايتا قالپىنا كەلتىرۋ جونىندەگى جابايى تابيعات قورى اراسىنداعى كەلىسىمگە قول قويۋ راسىمىنە قاتىسادى. بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە «جاسىل ەكونوميكانى قولداۋ جانە G-Global-دى دامىتۋ كواليتسياسى» زاڭدى تۇلعالار بىرلەستىگىنىڭ باسقارما ءتورايىمى سالتانات راحىمبەكوۆا ءمالىم ەتتى. ونىڭ اتاپ وتۋىنشە، كواليتسيا «جاسىل كوپىر» سەرىكتەستىك باعدارلاماسى اياسىندا ۇلكەن كەلىسىمدى جۇزەگە اسىرۋعا كىرىستى. بۇل كەلىسىم ەلىمىزدە 30-40 جىل جۇمىس ىستەپ، ىلە-بالقاش وڭىرىندەگى ەكوجۇيەنى، جولبارىستاردىڭ پوپۋلياتسياسىن قايتا قالپىنا كەلتىرۋ باعىتىن جانداندىرۋى ءتيىس.

 ء«بىز جابايى تابيعات قورىمەن بىرلەسىپ، ءبىزدىڭ ۇكىمەت پەن قور اراسىندا اتالعان جوباعا 10 ملن. ەۋرو قارجى تارتۋ تۋرالى ۇلكەن كەلىسىم دايىنداپ جاتىرمىز. بۇل كەلىسىمگە 2017 جىلدىڭ 8-9 قىركۇيەگىندە، ياعني ەكسپو كورمەسىنىڭ جابىلۋى كەزىندە قول قويىلادى. جابايى تابيعات قورى اتىنان نيدەرلاندى حانشايىمى لاۋرەنتين كەلەدى. ول نيدەرلاندىنىڭ كليماتتىڭ وزگەرۋى جونىندەگى قورىنا باسشىلىق جاسايدى. بۇۇ-نىڭ كليماتتىڭ وزگەرۋى جونىندەگى ەلشىسى، WWF-ءتىڭ  جولبارىس باعدارلاماسىنىڭ ەلشىسى لەوناردو دي كاپريو دا كەلمەك. مۇنان بولەك، تانىمال عارىشكەرلەر دە بولادى», - دەدى ول.

 راحىمبەكوۆانىڭ اتاپ وتۋىنشە، قازىرگى ۋاقىتتا مينيسترلىكتەرمەن جانە «استانا ەكسپو-2017» كومپانياسىمەن بىرگە اتالعان شارا وتەتىن ايماقتى بەلگىلەۋ ماسەلەلەرى تالقىلانۋ ۇستىندە.

 «سوندىقتان ءبىزدىڭ وسىدان ەكى جىل بۇرىنعى كليماتتىڭ وزگەرۋى جونىندەگى ءبىرىنشى ءارى جالعىز ەلشى دي كاپريونى قازاقستانعا شاقىرۋ باستامامىز جۇزەگە اساتىن سياقتى. ويتكەنى، جابايى تابيعات قورى بۇل ساپاردىڭ بارلىق قارجىلىق شىعىندارىن ءوز موينىنا الادى»، - دەپ جەتكىزگەن بولاتىن.

 

سايتقا ازىرلەگەن نۇرسۇلۋ نايمانوۆا

Abai.kz

0 پىكىر