ينستاگرام پاراقشاسىندا ولەڭ جولدارىمەن ەكىنشى ايەل الۋ تۋرالى پىكىرىن جەتكىزگەن تانىمال ايتىسكەر اقىن بالعىنبەك يماشەۆ جەلى قولدانۋشىلارىن ءوزارا قىرقىستىرىپ قويدى.

ناقتىراك ايتساق ايتىسكەر اقىن ەكىنشءى ايەل العىزبايتىن ايەلدەرگە ارناپ ولەڭ شىعارعان بولاتىن. ول ەل اۋزىندا جۇرگەن مىسالدى نەگىزگە الا وتىرىپ "مىنا مىسال  Whatsapp ارقىلى كەلىپ ەدى. وقىپ الىپ ۇيالدىم، سوسىن ولەڭمەن ورنەكتەدىم", - دەپ جازعان بولاتىن.

جاراتقان جۇپ-جۇبىمەن ءتامام زاتتى،

تاراتقان ەر-ايەلدەن ادامزاتتى.

ءبىر كۇنى اشۋلانعان ەركەك بايعۇس،

تاياقپەن ءوز قاتىنىن ساباپ جاتتى.

بولسا دا ايەل زاتى ءسال كىنالى،

كورگەندەر ءجون كورمەدى ءدال مىنانى.

ءبىر عالىم اقىل ايتتى: "ەي، باۋىرىم،

تاياقپەن ادامدى ەمەس، مالدى ۇرادى.

بولسا دا كەيبىر ءسوزى زاپىران، ۋ؟

قاتىن ساباۋ - ساۋاپتان قاپى قالۋ.

ايەلدى تۇزەيتۇعىن جاقسى سوققى -

ۇستىنەن تاعى دا ءبىر قاتىن الۋ".

جادىراپ جانى بىردەن جابىرقاعان،

اينىماي اقشا بەتى اق ۇلپادان:

نە دەيسىز؟ ءسوزىڭىزدى ۇقپادىم، - دەپ،

الگى ەركەك ءجۇز تانىتتى تاڭىرقاعان.

قۇتىلۋ جولىن ىزدەپ ودان وڭاي،

جاۋاپتى ايەل تاپتى سوعان وراي:

ءسوزىن تىڭداپ قايتەسىڭ اقىماقتىڭ،

ساباي بەر، - دەدى ەرىنە، - مەنى اياماي.

شىعاتىن بۇل قيسسادان قورىتىندى:

بولادى جاقسىلىقتىڭ جولى ءتۇرلى.

ۇيلەنۋ شاما جەتسە ءتورت ايەلگە -

باقىتتىڭ توتە جولى ەڭ ۇتىمدى.

ەرلەردىڭ ءبىر ايەلمەن كوبى جۇدەپ،

كۇناعا سەلت ەتپەيدى ءولى جۇرەك.

الايدا يمانى ءالسىز ايەلدەرگە،

جان بەرگەن باي بەرگەننەن جەڭىلىرەك.

بۇل ولەڭدى وقىعان جەلى قولدانۋشىلارى اقىندى سىننىڭ استىنا الدى.

""يمانى ءالسىز" ايەلدەر دەپ كوپكە توپىراق شاشپاڭىز. يماندى ەركەكتەر كوپ ەمەس. زينانى جاساپ ۇيىنە دىم بولماعانداي بارىپ، ايەلگە قول كوتەرەتىن ەركەكتەرگە نە دەيسىز؟ ايەل دەيتىن ءوزىڭىزدىڭ اناڭىز، ايەلىڭىز، قىزىڭىز، قارىنداسىڭىز ەمەس پە؟ ءسىزدى مەن تۇسىنبەدىم", ء"سىزدىڭ ولەڭ جولدارىڭىز ورىنسىز. ايەلدى نەگە ۇرادى ەركەك؟ شاريعاتتا دا ايتىلعان عوي "ايەلدەرگە قول كوتەرمەڭدەر دەپ. سوسىن ايەل ەركەكتىڭ قابىرعاسىنان جاراتىلعان، ونى تۇزەيمىن دەپ ۇرىپ، بولماسا توقال الىپ، بايبىشەنى تاربيەلەيمىن دەيسىز با؟ ودان دا سول عالىمدى سابىرعا شاقىرعانىڭىز دۇرىس بولار ەدى. "ايەلدەر ءالسىز جاندار، ولارعا قول كوتەرمەڭدەر" دەپ ولەڭ شۋماقتارىن شىعارمايسىز با؟", - دەپ كوپشىلىك ايەل قاۋىمى نارازى بولدى .

سايتقا ازىرلەگەن نۇرسۇلۋ نايمانوۆا

Abai.kz