«قازاقستاننىڭ تاۋەلسىزدىك العانىنا 25 جىل وتسە دە، پەتروپاۆل تەمىر جول بولىمشەسى ءالى كۇنگە دەيىن رەسەيگە باعىنادى. مۇندا جۇمىس ۋاقىتى دا، پويىزداردىڭ ءجۇرۋ كەستەسى دە ماسكەۋدىڭ ۋاقىتىمەن ەسەپتەلەدى» دەپ حابارلادى وتكەندە 31 ارنانىڭ سولتۇستىك قازاقستان وبلىسىنداعى ءتىلشىسى. راسىنا، قىزىلجارداعى تەمىر جول ۆوكزالىنىڭ "تەرىس قاراپ" تۇرعانى كوپتەن بەرى ءسوز بولىپ جۇرگەن. بۇل ۆوكزالدا جولاۋشىلار تەك رەسەي رۋبلىمەن بيلەت ساتىپ الىپ، رەسەيدىڭ زاڭى بويىنشا ءجۇرىپ-تۇراتىنى كوپتەن بەرى ايتىلىپ كەلەدى.

ۆوكزالدىڭ الدىندا رەپورتاج جاساعان ارنا ءتىلشىسى: «پەتروپاۆل تەمىرجول بەكەتى ماسكەۋ ۋاقىتىمەن جۇمىس ىستەيدى. ىشكى زاڭدىلىقتارى دا رەسەي تارتىبىنە باعىنادى. بيلەت قۇنى باسقا قالالارمەن سالىستىرعاندا الدەقايدا قىمبات. ۆاليۋتا باعامىنا بايلانىستى ەڭبەك ەتەتىن ادامداردىڭ دا جالاقىسى مىڭ قۇبىلادى ەكەن. جانە مۇندا رەسەي تەمىر جولىنىڭ كارتاسى ءىلۋلى تۇر» دەگەندى ايتتى. وسىنى اشىق ايتىپ كورسەتكەن ءتىلشى وكىنىشكە قاراي ۆوكزالدىڭ ىشىنە كامەراسىن ارقالاپ كىرە المايتىندىعىن دا ءمالىم ەتتى. نەگە؟ ويتكەنى، رف تاراپىنان رۇقسات جوق. ول ءۇشىن رەسەيدىڭ قۇزىرلى ورىندارىنا حات جازىپ، مۇرسات الۋى كەرەك.

مىنە، وسىنداي كەپ. ماسەلەنىڭ ءمان-جايىن جاداعايلاپ تۇسىندىرۋگە تىرىسقان قر يدم كولىك كوميتەتى توراعاسىنىڭ ورىنباسارى دميتري پوتلوۆ:

- 2009 جىلى كەلىسىمگە ەنگىزىلگەن وزگەرىستەرگە سايكەس پەتروپاۆل بولىمشەسى تۇگەل تەمىرجول ينفراقۇرىلىمىمەن بىرگە رەسەي تەمىرجولىنىڭ جەكە مەنشىگىنە ءوتتى. سايكەسىنشە، رەسەي اۋماعىنداعى يلەتسك جانە شىعىس تەمىر جول ستانتسيالارى قازاقستان تەمىرجولىنىڭ يەلىگىندە. ەكى جاققا دا ءتيىمدى شەشىم بولىپ قابىلدانعان، - دەدى.

پوتولوۆتىڭ «يلەتسك» دەپ وتىرعانى ءوزىمىزدىڭ ورىنبور ولكەسىندەگى – ەلەك. ەلەك وزەنى. اقتوبەگە تاياۋ ماڭداعى شاعىن بەكەت. ونىڭ وبلىس ورتالىعى – پەتروپاۆل قالاسىنداعى تەمىر جول ۆوكزالىنداي ستراتەگيالىق ماڭىزى ەرەكشە ەمەس. ال، پەتروپاۆل قالاسىنداعى تەمىر جول ۆوكزالى ول – قازاقستاننىڭ سولتۇستىگىندەگى جۇك جانە جولاۋشىلار تاسىمالىن ۇزدىكسىز اتقارىپ تۇرعان اسا ماڭىزدى نىسان. ۋكراينا سياقتى ەلدىڭ تاۋەلسىزدىگى مەن قاۋىپسىزدىگىنە كەپىلدىك بەرە وتىرىپ، ۋكرايناداعى جىكىشىل، شوۆينيست ورىستاردىڭ قولتىعىنا دىم بۇركىپ، اسكەري قيمىلداردى قولعا العان رەسەيگە وسىنداي ماڭىزدى نىساندى قاراتىپ قويعان قازاقستاندىق بيلىكتىڭ قامسىزدىعىنا قايران قالماسقا امالىڭ كەم. ويتكەنى بۇل ستانتسيادا قوس ازاماتتىعى بار ادامدار ءجۇر. وسى جايتتىڭ اشىپ ايتقان قر پارلامەنت ءماجىلىسى  IV شاقىرىلىمىنىڭ دەپۋتاتى جاراسباي سۇلەيمەنوۆ مىرزا:

- وسى ارادان بيلەت الساڭىز استاناعا، الماتىعا. ول بيلەت استانا، الماتىدا العان باعادان الدەقايدا قىمبات. ال پويىز قازاقستاننىڭ پويىزى. بىزدە قوس ەلدىڭ ازاماتتىعىن العان ادامدار ۇستالىپ جاتىر. مىنە، سولاردىڭ كوبى وسى تەمىرجول اۋماعىندا جۇرگەن ادامدار. پەتروپاۆل بولىمشەسىندە جۇمىس ىستەيتىن ادامدار. سول جەردە قىزمەت ىستەگەننەن كەيىن، ەڭبەكاقى العاننان كەيىن سولاردىڭ ايتۋىنان شىعا الماي، قوس پاسپورتتى قالتالارىنا سالىپ ءجۇر، - دەدى 31 ارنا تىلشىسىنە.

بىزدە «اۋەلى – ەكونوميكا» دەيتىن قاتاڭ قاعيدا بار. سول قاعيدا بويىنشا  كولىك كوميتەتىنىڭ وكىلدەرى  كەرەكۋدەگى تەمىر جول ۆوكزالىنا قاتىستى ماسەلەدە ەكونوميكالىق تيىمدىلىك جاعىنا باسا ءمان وتىرعان سياقتى.  پەتروپاۆل ستانتسياسى ارقىلى وتەتىن پويىزداردىڭ 95 پايىزى رەسەيدىڭ تەمىر جول كولىگى كورىنەدى. سولاي ەكەن دەپ ستراتەگيالىق نىساندى كورشى ەلدىڭ جەكەمەنشىگىنە بەرىپ قويۋعا بولا ما؟  پوەزداردىڭ ءجۇرۋ كەستەسىن، ساعات ءتىلىن، ستانتسيا قىزمەتكەرلەرىن وزىنە قاراتىپ العان كرەملدىڭ كولەڭكەسى قىزىلجار ۆوكزالىنىڭ ۇستىندە قويۋلانىپ تۇر. بۇعان بىراق قازاق بيلىگى، ءتىيىستى ورگاندار جەتە ءمان بەرەر ەمەس. 

ءشارىپحان قايسار

Abai.kz