قر پارلامەنتى ءماجىلىس دەپۋتاتتارى نازارىنا!

الاش قاعيداسىن ەسكەرسەڭىزدەر ەكەن!

بيلىكتىڭ ايتۋىنشا قازىرگى پارلامەنت - ەلىمىزدەگى əلەۋمەتتىك-ەكونوميكالىق جاعدايعا توتەپ بەرەتىن، قىمباتشىلىقتى قۇرىق سالىپ توقتاتاتىن پارلامەنت.  بىراق، اسپاندى ايعا شىعارىپ، ماقتاعان ءمəجىلىسىمىزدىڭ نەشە جىل وتىراتىنى ءبىر قۇدايعا عانا ايان. بۇرىنعى شاقىرىلىمداعى بارلىق ماجىلىستەردىڭ ۋاقىتتارى مەرزىمىنەن اياقتالعانى بەلگىلى. سول سەبەپتى ماقتاۋلى ءمəجىلىستىڭ دە ءومىرى  قىسقا بولادى دەپ سەنىمدى تۇردە ايتا الامىن.

قانشا مەرزىمدە بولسا دا ەڭ باستىسى: دەپۋتاتتار ورىندارىندا قالعىپ-مۇلگىپ وتىرماي نەمەسە "سەن تيمەسەڭ، مەن تيمەيمىن" دەگەن پرينتسيپپەن اۋىزدارىن اشپاي وتىرماسا ەكەن دەپ ويلايسىڭ.  حالىق قالاۋلىلارى قالىڭ بۇقارانىڭ  جانايقايلارىن تىڭداي وتىرىپ، ەل-جۇرتپەن كەزدەسۋلەرىندەگى سايلاۋالدى باعدارلاماسىن ورىنداۋ كەرەك. 

كەزىندە الاشوردا ۇكىمەتىنىڭ ىرگەسى بەرىك قالىپتاسۋى ءۇشىن الاش زيالىلارى زاڭدىق-قۇقىقتىق بىلىمگە دە اسا ماڭىزدى ءمان بەرگەن ەكەن.  الاش ارىستارىنىڭ ءبىرى احمەت بايتۇرسىنوۆ «زاكوننىڭ اسىل ءتۇبى، اۋەلى، ۇكىمەت پەن حالىق اراسىنا سالاتىن جول; ەكىنشى، ۇكىمەتكە قاراعان ادامداردىڭ ارالارىنا سالاتىن جول. ءار حالىقتىڭ بۇرىننان ءجۇرىپ كەلە جاتقان داعدىلى جولى بار، ول جولدى تۇزەتكەندە جارامدى جەرىن تيمەي، جارامسىز جەرىن عانا وزگەرتۋى ءتيىس. ولاي ەتپەسە، كەيىن، ويىپ سالعان جولمەن جۇرتتىڭ كوبى جۇرمەي، بۇرىنعى داعدىلى جولىمەن كەتە بەرەدى... سوندىقتان زاكوننىڭ ءتۇپ ۇلگىسى ءبىر بولعانىمەن، اركىمنىڭ بويىنا قاراي كيىم پىشكەن سياقتى، ءار حالىقتىڭ قالپىنا، سالتىنا، مىنەزىنە قاراي زاكون شىعارىلادى. سولاي بولعان سوڭ دا، زاكون شىعارۋشىلار حالىقتىڭ قاعيدالى قالپىن، سالتىن، مىنەزىن جاقسى ءبىلۋى ءتيىس. ونى بىلمەي شىعارىلعان زاكون حالىقتىڭ تۇزەلۋىنە ەمەس، بۇزىلۋىنا سەبەپشى بولماقشى»، - دەپ بولاشاعىمىزدى بولجاپ، ۇلتىنىڭ قالىپتاسۋى مەن ەلىنىڭ دامۋىنا سارا جول سالىپ بەرىپتى.

بۇل الاش ارداقتىسىنىڭ وسىدان ءجۇز جىل بۇرىن ۇرپاقتارىنا وسيەتتەپ كەتكەن اماناتى ەدى. قانداي ۇلتجاناشىرلىق، ەلجاندىلىق شىنايى ءسوز. زاڭ شىعارۋشىلارعا ارنالعان وسى دانا ءسوزدى  ءماجىلىس عيماراتى الدىنا بيلبورد ەتىپ ءىلىپ جəنە ىشىنە دە جازدىرىپ قويۋ كەرەك. 

پارلامەنتى ءمəجىلىسى دەپۋتاتتارى  ۇلت تاعدىرى مەن حالىقتىڭ جاعدايىن جəنە ەلىمىزدىڭ بولاشاعىن ويلاسا،  الاش زيالىسىنىڭ وسى قاعيداسىن زاڭ شىعارۋدا باسشىلىققا الۋعا مىندەتتى.  حالىق قالاۋلىلارى ۇلتتىق قۇندىلىقتار مەن  مەنتاليتەتىمىزدى ەسكەرمەي شىعارعان زاڭدارى مەملەكەتتىڭ تەرىس باعىتقا كەتىپ قۇلدىراۋى مەن حالىقتىڭ كەدەيلەنۋىنە سەبەپشى بولۋى جəنە ۇلتىمىزدىڭ قالىپتاسۋىنا كەدەرگى بولۋى مۇمكىن!

قاتاۋوۆ تالعات تۇرسىنعاليۇلى

Abai.kz