بيلىك ۆەب-سايتتارعا پىكىر قالدىرۋشىلاردىڭ تەلەفوندارىن انىقتاعىسى كەلەدى
قازاقستاننىڭ اقپارات جانە كوممۋنيكاتسيا ءمينيسترى وتاندىق ينتەرنەت باسىلىمدارعا پىكىر قالدىرۋشىلاردىڭ بارلىعىن ولاردىڭ تەلەفون نومىرلەرى ارقىلى انىقتاۋدى كوزدەيدى. زاڭ اكتىلەرىنە وسىنداي وزگەرتۋلەر ەنگىزۋ ۇسىنىلدى.
اقپارات جانە كوممۋنيكاتسيا مينيسترلىگىنىڭ اقپاراتتىق كەڭىستىكتى باقىلاۋ باسقارماسىنىڭ باسشىسى ميحايل كوميسساروۆتىڭ مالىمدەۋىنشە، وقىرمان ۆەب-سايتقا پىكىر قالدىرماس بۇرىن تەلەفون ءنومىرىن تىركەۋى كەرەك، ارنايى كود العان سوڭ عانا ول پىكىرىن جاريالاي الادى.
"پىكىر باعانىندا كەيدە اقپاراتتىق سوعىس ءجۇرىپ جاتادى، ول جەردە ۇلتارالىق الاۋىزدىق تۋعىزاتىن پىكىرلەر دە ايتىلىپ قالادى. انىقتاۋ مەحانيزمىن ينتەرنەت رەسۋرستارعا ەنگىزۋ ارقىلى نەگاتيۆتى پىكىرلەردى ازايتۋعا بولادى", - دەيدى كوميسساروۆ.
زاڭ جوباسى پارلامەنت دەپۋتاتتارىنىڭ قاراۋىنا بيىل مامىر ايىندا جولدانادى.
اباي-اقپارات
