بىزدە مەملەكەتتىك ساتىپ الۋ تەك جوعارعى جاقتىڭ، ياعني ءىرى قالالار مەن وبلىس ورتالىقتارىنىڭ پايداسى ءۇشىن جاسالعان. تومەنگى اۋدان ورتالىقتارى مەن ولارعا قاراستى الشاق جاتقان ەلدى مەكەندەردىڭ قول جەتىمدىلىگى مەن ولارعا ءتيىمدى تۇستارى مۇلدە جوق.

ماسەلەن، قوستاناي، اقتاۋ، اتىراۋ، اقتوبە، ورال، تاعى دا باسقا وبلىستارعا قاراستى اۋداندارمەن ەلدى مەكەندەردەگى بيۋدجەتكە قاراستى مەملەكەتتىك ساتىپ الۋعا، ولاردان تىسقارى جاتقان، الماتى، شىمكەنت، قاراعاندى، ت.ب. ءتىپتى كەيدە جوعارىدا اتالعان وبلىستارداعى مەكەمەلەر مەن كاسىپكەرلەر قاراما قارسى شىعىپ، باعانى ءتۇسىرىپ، تەندردى جەڭىپ الىپ جاتادى. باسقا وبلىستاردان تەندەردى ۇتىپ العان مەملەكەتتىك تاپسىرىستى ورىنداۋشىلار، بالا-باقشاسى، مەكتەپ، مادەنيەت سالالارى، اۋىلدىق اكىمدىكتەرگە تاسىمالداۋ شىعىنىنا قوماقى قارجى جۇمسالاتىنىن ەسەپتەي كەلە، ساپاسىز، ساقتاۋ مەرزىمى وتۋگە جاقىن قالعان ارزان تاۋاردى ۇسىناتىندىعى دا سوندىقتان.  

ءتىپتى جەرگىلىكتى باق-قا جاريالاناتىن اۋداندىق بيۋدجەت، اقپاراتتار مەن ماقالالار بويىنشا تەندەرگە باسقا وبلىستارمەن الماتى قالاسىنان ءتۇسىپ جاتادى. ال باسقا وبلىستار مەن الماتى قالاسىنىڭ گازەتىن بوگدە وبلىستىڭ، اۋدان جانە اۋىل تۇرعىندارى جازدىرىپ الىپ وقىمايتىنى ايدان انىق. ال تەندەردى جەڭىپ العان جەڭىمپاز، باسقا اۋداننىڭ جەرگىلىكتى باسپاسىن سول جەرگىلىكتى جەردىڭ بيۋدجەتتىك قارجىسىنا جالداپ، ۇستىنەن پايدا كورىپ، جاتىپ الىپ اقشا تابادى. بۇنداي قيسىنسىز جايلار وتە كوپ.

سوندىقتان جەرگىلىكتى ماڭىزداعى مەملەكەتتىك ساتىپ الۋدى ايرىقشا بەلگىلەمەسە، ەشبىر ۇيلەسىمى جوق جايلاردان ارىلۋ مۇمكىن ەمەس.

اۋىلداعى ەلدىڭ تۇسىنبەيتىن جانايقايىنا قۇلاق سالار بولسا، ايتارى كوپ. سىرتتان تەندەردى ۇتىپ العاندارمەن تەلەفون ارقىلى سويلەسپەسەڭ، وزدەرىن كورۋ قيىن. سەبەبى ولار تەندردى ۇتىپ الادى دا، جالدامالى ءبىر ديۋانانى ورتاعا قىستىرادى دا جىبەرەدى.

سابىرتاي مۇقانوۆ

Abai.kz