18-ماۋسىم كۇنى  قوستاناي وبلىسى، جانگەلدين اۋدانىنا قاراستى ايىرقۇم اۋىلىنىڭ  سورەلى  دەگەن جەرىندە 5000 كيىكتىڭ ولىگى تابىلدى (ودان كوپ بولۋى دا مۇمكىن). بۇل تۋرالى كوكالات  اۋىلىنىڭ تۇرعىنى كاكىمجان كارىبوزوۆ مالىمدەدى. «بۇل وتكەن ايدىڭ باسىندا جاپپاي قىرىلعان كيىكتەردىڭ ءبىر بولگى بولۋى مۇمكىن»، - دەيدى ول. امانگەلدى جانە جانگەلدين اۋداندارى تۇرعىندارى ەرتەڭ تاڭەرتەڭ  كيىكتەردىڭ ولىگىن كومۋگە جىبەرىلمەك. كيىك قىرىلعان ايماقتارىنىڭ ءبارى كارانتيندى ايماق دەپ جاريالاعانىن العا تارتقان جەرگىلىكتى اكىمشىلىك باسشىلارى كيىك قىرىلعان ايماقتارعا ءبىزدىڭ بارۋىمىزعا رۇقسات ەتكەن جوق. سوندا دا، ءالى دە بولسا، سوڭعى 5000 كيىكتىڭ ولىگى تابىلعان ايماققا بارىپ، ءوز كوزىمىزبەن كورىپ قايتۋ نيەت بار.  

«شىندىق ەكسپەديتسياسىنىڭ» مۇشەلەرى  140 000 كيىكتىڭ، مالدىڭ، جابايى اڭداردىڭ جاپپاي قىرىلۋ سەبەبىن ءبىلۋ ماقساتىندا امانگەلدى اۋدانى اكىمىنىڭ ورىنباسارى تالعات كاربوزوۆپەن، سول اۋدان ءماسليحاتىنىڭ اپپارات جەتەكشىسى عالىم الشورينمەن، كوكالات اۋىلىنا قاراستى «سىما-ك» شارۋا قوجالىعىنىڭ جەتەكشىسى كاكىمجان كارىبوزوۆپەن، تاعى باسقا كوپتەگەن جەرگىلىكتى تۇرعىندارمەن كەزدەسىپ، سۇحباتتاسىپ، ءارتۇرلى اقپاراتتار الۋعا تىرىستى. وكىنىشكە قاراي، جانگەلدين اۋدانىنىڭ اكىمشىلىك باسشىلارىمەن سۇحباتتاسۋدىڭ ءساتى تۇسپەدى. اۋدان اكىمى مەن ونىڭ اۋىل شارۋاشىلىعى جونىندەگى ورىنباسارى كيىك ولىگى تابىلعان ايماققا كەتتى دەيدى سول جەردىڭ قىزمەتكەرلەرى. 

كەرىسىنشە، اۋىل تۇرعىندارىمەن كەڭىنەن سويلەسۋدىڭ ءساتى ءتۇستى. وزدەرىنىڭ اتى-جوندەرىن اتاۋدان ءۇزىلدى-كەسىلدى باس تارتقان ازاماتتاردىڭ مالىمدەۋىنشە، ۇستىمىزدەگى جىلدىڭ مامىر ايىنىڭ باسىندا  امانگەلدى جانە جانگەلدين اۋداندارىندا كيىكتەر جاپپاي قىرىلا باستاعان. سول كيىك قىرعىنى باستالعان كۇندەرى امانگەلدى اۋىلىنا رەسەيدىڭ اسكەري تەحنيكالارى، جۇك كولىكتەرى كوپتەپ كەلىپ، اق كومبينيزون كيگەن اسكەريلەر كيىكتەر قىرىلعان ماڭنان قۇلاعان زىمىراننىڭ قالدىقتارىن جيناپ الىپ كەتكەن. اتىن اتاۋدان باس تارتقان ازاماتتار ول زىمىران قالدىقتارىنىڭ  نە پروتوننىڭ نەمەسە اسكەري قارۋ ءتۇرىنىڭ قالدىعى ەكەنىن اجىراتا المادى. «قاپتاپ كەتتى عوي وزدەرى. اق كيىم كيگەن  ادامدار تەسىكتەرى بار تەمىر قالدىقتاردى جينادى. الگى قالدىقتاردى زىمىران قالدىقتارى-اۋ دەپ ويلادىق. بىراق قانداي زىمىران ءتۇرى ەكەنىن ايتا المايمىز.  ولار كەتكەننەن كەيىن دە ءبىر شار تارىزدەس تەمىر تابىلدى عوي» دەيدى ولار.

سونىمەن بىرگە مىڭ-مىڭداعان كيىكتەردىڭ ولىگىن جيناۋعا اتالعان ەكى اۋداننىڭ تۇرعىندارى جانە قازاقستاننىڭ اسكەريلەرى جۇمىلدىرىلعان كورىنەدى. ولار قاۋىپسىزدىك شارالارىنا اسا ءمان بەرمەگەن سىڭايلى. ماسەلەن،  ولاردىڭ كوبىندە  رەزىڭكە قولعاپ، ارنايى كيىم نەمەسە اۋا تازالايتىن قۇرىلعىلار بولماعان. سونىڭ سالدارىنان ەكى سولدات اياق استىنان كوز جۇمىپ، اۋىلدىڭ بىرنەشە تۇرعىنىنىڭ قولى، اياعى ءىسىنىپ بارىپ، ءتۇرلى ەم قابىلداعاننان كەيىن وڭالعان.  كەيبىر تۇرعىندار كيىك قىرىلار الدىندا جارىلىستىڭ بولعانىن، ونى ءوز كوزدەرىمەن كورگەنىن مالىمدەدى. الايدا جارىلىستىڭ نەدەن بولعانىن ءتۇسىندىرىپ بەرە العان جوق.

ال «سىما-ك» شارۋا قوجالىعىنىڭ جەتەكشىسى كاكىمجان كارىبوزوۆ مامىر ايىنىڭ ورتاسىنان باستاپ، ەكى اپتا كولەمىندە 51 باس ءىرى قارا مەن 16 جىلقى مالىنىڭ ولگەنىن ايتا كەلە،  ولاردىڭ ءبارى ءشوپ جەپ، سۋ ءىشىپ تۇرعان، قوڭدى مال بولعانىن اتاپ ءوتتى. «مال كوتەرەمنەن نەمەسە ارىقتىقتان ولگەن جوق. ولاردىڭ ءبارى ءبىر جارىم ايداي ورىسكە شىعىپ، كوك جەگەن، قوڭدى مال بولاتىن. قورا تازا، ءشوپ جەتەدى. ەگەر اۋداندىق، وبلىستىق مال دارىگەرلەرى دۇرىس جۇمىس ىستەسە، ءدال وسىلاي بولماس پا ەدى»، - دەپ كەيىستىك ءبىلدىردى.

اۋىل تۇرعىندارىنىڭ ايتۋىنا قاراعاندا، بيىلعى جىلى مال شىعىنى وتكەن جىلمەن سالىستىرعاندا ەداۋىر كوپ بولعان.

ارينە، اۋىل تۇرعىندارىنىڭ ايتقانىنىڭ ءبارى انىق اقيقات بولماۋى دا عاجاپ ەمەس، بىراق ءبىز ەستىگەنىمىزدى ەلگە جەتكىزۋدى ءوزىمىزدىڭ ازاماتتىق پارىزىمىز دەپ سانادىق. 

تاعى ءبىر ايتا كەتەتىن ماسەلە، امانگەلدى اۋدانىنىڭ ورتالىعى امانگەلدى اۋىلىندا دا، جانگەلدين اۋدانى ورتالىعى تورعاي اۋىلىندا دا پوليتسيا قىزمەتكەرلەرى سوڭىمىزدان قالماي، قۇجاتتارىمىزدى، جۇكتەرىمىزدى تەكسەرىپ، كولىكتى تىنتىگەنىن ايتا كەتكەن ءجون.

وبلىس كولەمىندە «انتيتەررور» شاراسى ءوتىپ جاتىر دەگەن جەلەۋمەن 4-5 رەت توقتاتىپ، قۇجاتتاردى قايتا-قايتا تەكسەرگەن پوليتسيا قىزمەتكەرلەرى ەشبىر حاتتاما تولتىرعان جوق. وزدەرىنىڭ قىزمەتىن اسىرا پايدالانعان پوليتسيا قىزمەتكەرلەرىنىڭ ۇستىنەن  جانگەلدين اۋداندىق پروكۋرورىنىڭ اتىنا شاعىم جازۋعا دا تۋرا كەلگەنىن ايتا كەتكەن ءجون. ال، اۋداندىق پروكۋروردىڭ مىندەتىن اتقارۋشى قوزىباق مەيرامگۇلگە ەكسپەديتسيا مۇشەلەرى ۇلكەن ريزاشىلىق بىلدىرەدى. ول ءوزىنىڭ سىپايىلىعىمەن جانە كاسىپقويلىعىمەن ەرەكەشەلەنىپ، بىزگە ناقتى كومەك قولىن سوزعانىن باسا ايتقان ءجون. سونىمەن بىرگە تورعاي اۋىلىنىڭ ۆەتەرينارى گاززەزوۆ جامبىلعا بىزبەن بىرگە شارۋا قوجالىقتارىن ارالاپ، جول كورسەتىپ، ءجون سىلتەگەنى ءۇشىن العىس ايتامىز.  

سونىمەن، «شىندىق ەكسپەديتسياسى» ءوز جۇمىسىن ودان ءارى جالعاستىرۋدا...

(جالعاسى بار. «شىندىق ەكسپەديتسياسىنىڭ» ساپارى جونىندەگى ماقالانىڭ باسى مىنا سىلتەمەدە: http://abai.kz/post/view?id=3714)

«شىندىق ەكسپەديتسياسىنىڭ» مۇشەلەرى:

ماقسات ءىلياسۇلى،

ەدىل ماكەن،

جەڭىس تىلەۋباي،

نۇرلان جاباەۆ،

اماندىق داۋلەتبەكۇلى

ارنايى Abai.kz اقپاراتتىق پورتالى ءۇشىن قوستاناي وبلىسىنان.