پاۆلودار وبلىسىنىڭ اكىمى قانات بوزىمباەۆتىڭ (سۋرەتتە) باسىنداعى حال كوپكە تۇسىنىكسىز بولىپ تۇر. العاش ول تۋرالى اڭگىمەنىڭ شەتىن شىعارعان 31 ارنانىڭ جاڭالىعىنان دا جارىتىپ ەشتەڭە ۇعا الماعانبىز. تاقىرىپقا قايتا ورالعان اتالعان ارنا ەندى عانا ماسەلەنىڭ ءمان-جايىن اشىپ ايتا باستاعان سياقتى. قىسقاسى، وقيعا بىلاي: بوزىمباەۆتىڭ بالاسى اكەسى قىزمەت ەتەتىن مەملەكەتتىك رەزيدەنتسيانىڭ الدىندا ء بىر ايەلدى زورلايدى. ونى بىرەۋلەر بەينەتاسپاعا ءتۇسىرىپ الىپ «ۆەرسيا» گازەتىنىڭ رەداكتورى ياروسلاۆ گولىشكينگە بەرەدى. قولىنا ەلدى دۇرلىكتىرەتىن سەنساتسيالىق  بەينەكورىنىس تۇسكەن گولىشكين ەكى الاقاندى ىسىپ جىبەرىپ، قانات بوزىمباەۆتى بوپسالاپ 500 مىڭ دوللار سۇرايدى. الگى شاتاققا قاتىسى بار تاعى ءبىر جان: 18 جاستاعى ءالميرا كۋليەۆا بولسا، كۋاگەردەن كۇدىكتىگە اينالىپ، وبلىستىق ۇقك-ءنىڭ قاماۋىندا وتىر. بوزىمباەۆتىڭ بوزباسى (ۇلى) شاتىلعان وقيعانى قازىر ۇقك جەكە باقىلاۋىنا الىپ وتىر. ءالميرانىڭ اناسى  جۇلدىز كۋليەۆا: «پوليتسيا وعان (زورلانعان بويجەتكەنگە) اقشا ۇسىندى. كەلىسىمگە كەلۋلەرى ءۇشىن 10 مىڭ دوللار بەرەتىندەرىن ايتتى. مەنىڭ قىزىم ولارمەن سوزگە كەلىسە باستادى: «ول اقشالارىڭدى المايدى، وعان اقشا كەرەك ەمەس، كىنالىلەر تۇرمەگە قامالسىن» دەپ جاۋاپ قايتاردى. سول كەزدە ونى باسقا بولمەگە قاماپ، كەشكە دەيىن ۇستادى»، — دەيدى. ال، زاڭگەرلەر بولسا، ءالميرانىڭ  ۇقك قاماۋىنا الىنۋىنا امەريكالىق كۋاگەرلەردى قورعاۋ باعدارلاماسىنا ۇقساس زاڭ سەبەپكەر بولدى دەيدى. زاڭگەر سەرگەي ۋتكيننىڭ سوزىنە سەنسەك، ءالميرانى قاۋىپسىز جەردە ۇستاۋ ونىڭ ءوتىنىشى بويىنشا جاسالعان كورىنەدى. قىلمىستىق ءىس انىقتالىپ بىتكەننەن كەيىن،  ۇقك الميراعا قاۋىپ تونبەۋ ءۇشىن ونىڭ قۇجاتتارىن، ءتىپتى، كەلبەتىنە دەيىن وزگەرتە الادى ەكەن.

«ۆەرسيا» گازەتىنىڭ باس رەداكتورى  ياروسلاۆ گولىشكين قازىر «بوزىمباەۆتى  بوپسالادى» دەگەن كۇدىكتەن ارىلا باستاعانعا ۇقسايدى. گولىشكيننىڭ ادۆوكاتى دميتري كۋرياچەنكو:

«گولىشكيننىڭ سوزىنە سەنسەك، ونىڭ بوپسالاۋىشىلىققا ەش قاتىسى جوق.  گولىشكيننىڭ ەسىمى بوزىمباەۆتىڭ ارازىندا مۇلدەم اتالماعان»، — دەيدى.

بوزىمباەۆتى بوپسالاۋشىلاردىڭ قاتارىنا كەشەلى بەرى پاۆلودار اۋدانى اكىمىنىڭ ەكس-ورىنباسارى اسقار باحرالينوۆ تە ىلىكتى.   

بويجەتكەننىڭ زورلانعانى راستالعانىمەن، پوليتسەيلەر وعان اكىمنىڭ ۇلى قاتىستى دەگەن ايىپتى جوققا شىعارۋدا. وسىنىڭ ءبارىن سارالاي كەلگەندە، بوزىمباەۆتى بوپسالاپ جۇرگەندەردىڭ دە ارەكەتى تەگىن ەمەس-اۋ دەگەن ويعا قالاسىز... سوندا، ءدال قازىرگى جاعدايىندا بوزىمباەۆ كىم؟ بوپسالانۋشى ما، الدە، قىزمەتىن اسىرا پايدالانىپ، اينالاسىن بوپسالاۋشى ما؟  ارينە، بوپسالانۋشى  - بوزىمباەۆ. بىراق ول ۇلىنىڭ ۇياتتى ءىسىن جاۋىپ تاستاۋ ءۇشىن قولىنداعى بيلىگىن بىلگەنىنشە پايدالانىپ وتىرعانعا دا ۇقسايدى.

Abai.kz