گەرمانيانىڭ گارميش-پارتەنكيرحەن قالاسىندا ءوتىپ جاتقان ۇلكەن جەتىلىك ەلدەرىنىڭ سامميتىنە قازاق قوعامىنىڭ بەلسەندى، سەرگەك ازاماتتارى دا ەرەكشە ءمان بەرىپ كوز تىگۋدە. جەتىلىكتىڭ جيىنى ءبىز ءۇشىن دە ماڭىزدى. سەبەبى، سانكتسيالاردىڭ سالقىنى ءتيىپ رەسەي كسرو-نىڭ كەبىن كەشسە، ءبىزدىڭ بيلىكتىڭ دە كورشى ەلگە قاتىستى ساياساتى وزگەرەدى. قازاق قوعامىنىڭ قايراتكەر ۇلدارىنىڭ ءبىرى مۇحتار تايجان الەۋمەتتىك جەلىدەگى پاراقشاسىندا وسىلاي دەدى. مۇحتاردى ارىقاراي وقيىق:

دوستار، بەرليندە G7 ءسامميتى اشىلدى. سامميت تالقىلايتىن ءبىرىنشى ماسەلە - ۋكراينا مەن رەسەي. ۇلكەن جەتىلىك ەلدەرى ماسكەۋگە قارسى قوسىمشا سانكتسيالار جايلى كەلىسىمگە كەلۋى كەرەك. تاعى ءبىر ماسەلە - ۋكرايناعا قارۋ مەن قاراجاتتى كوبىرەك بەرۋ. كەزەكتى سۇراق - فيفا ۇيىمىنىڭ جەمقورلىعى.

بۇل – الەمنىڭ ەڭ كۇشتى، ەڭ باي ەلدەرىنىڭ ءسامميتى. G7 دەپ اتالاتىن اقش، گەرمانيا، فرانتسيا، ۇلى بريتانيا، يتاليا، كانادا جانە ياپونيا ادەتتە قابىلداعان شەشىمدەرىن ناقتى، اشىق تۇردە جاريا ەتپەيدى. بىراق ستراتەگيالىق تۇرعىدا ورتاق كەلىسىمدەرگە كەلىپ، سوسىن كەيىن بىرىگىپ جۇزەگە اسىرادى.

وداقباسىمىز رەسەيدىڭ بولاشاعى بۇل ءسامميتتىڭ ناتيجەسىنە قاتتى تاۋەلدى دەپ بىلەمىن. ەگەر باتىس ەلدەرى ەكونوميكالىق سانكتسيا تۇرلەرىن كوبەيتىپ، پارمەندى قيمىلداسا،   رەسەي شىداي المايدى. كسرو سەكىلدى ىدىراپ كەتۋى ابدەن مۇمكىن.

بۇنداي ءۇردىس باستالىپ جاتسا، ءبىزدىڭ بيلىگىمىزدىڭ كوزقاراسى وزگەرەدى، امالى جوقتان ۇلتشىلدارعا جاقىن بولا باستايدى، ال شوۆينيستەردىڭ رۋحى بىردەن ءوشىپ بىتەدى.

سوندىقتان, بۇگىن-ەرتەڭگى G7 ءسامميتى دۇنيە ءجۇزىنىڭ ساياساتى ءۇشىن (جانە ءبىز ءۇشىن) ەرەكشە قىزىق جانە ماڭىزدى بولۋى كەرەك. باقىلايىق.

Abai.kz