«قازاقيا 2015» بايقاۋىنا قاتىسۋشى بلوگەرلەر توبى ءوز «جورىقتارىن» اقسۋ قالاسىندا جالعاستىرۋدا. بۇل – بلوگ ساپار اياسىنداعى جەتىنشى ەلدى-مەكەن.

جوبانىڭ باستى ماقساتى – ەلىمىزدىڭ 12 نۇكتەسىنەن بلوگەرلەردىڭ قاتىسۋىمەن ازىرلەنگەن، الەۋمەتتىك جەلىگە ارنالعان قازاق ءتىلدى كونتەنتپەن تولىقتىرۋ ەدى. قازىردىڭ وزىندە الەۋمەتتىك جەلى قولدانۋشىلارى #qazaqia2015 ارنايى حەشتەگى ارقىلى – الماتى، سارىوزەك، ۇشتوبە، اياگوز، ريددەر، سەمەي جانە اقسۋدان دايىندالعان جالپى سانى 150-گە تارتا كونتەنت-جازبامەن تانىسا الادى.

ادەتتە، وڭىرلەردە بەلگىلى كەيىپكەرلەر مەن وقيعالار رەسپۋبليكالىق ماسشتابقا تارالماي جاتادى. «قازاقيا 2015» وسىنداي ەل ىشىندەگى قىزىقتى كەيىپكەرلەر مەن نىسانداردى ينتەرنەت-رەسۋرستار ارقىلى ناسيحاتتاۋعا، كورسەتۋگە مۇمكىندىك بەردى. كوپشىلىككە ءوندىرىس وشاعى رەتىندە كوبىرەك بەلگىلى ريددەر اۋماعىندا ەلىمىزدەگى ون قورىقتىڭ ەڭ ورماندىسى – باتىس التاي قورىعىنىڭ ورنالاسقانى اسا ءمالىم ەمەس. بلوگ-ساپار قاتىسۋشىلارىنا گيد قىزمەتىن جاساۋ بارىسىندا قورىقتىڭ ءبولىم باسشىسى «تاۋەلسىزدىگىن ەندى جاريالاپ جاتقان ەلدىڭ تۇرمىستىق پروبلەمالارمەن بەتپە-بەت كەلىپ جاتسا دا، 1992 جىلى قيىن-قىستاۋ كەزەڭدە وسىنداي قورىق قۇرۋ تۋرالى شەشىم شىعارۋ – ستراتەگيالىق قادام بولدى، سول كەزدە وسىنداي ءىس قولعا الىنباعاندا، مۇنداي تۇمسا تابيعات قازىر بولار ما ەدى، بولماس پا ەدى» دەپ اتاپ ءوتتى.

سونداي-اق، بلوگەرلەر ريددەر قالاسىنان «شاڭىراق» اتالاتىن جالعىز قازاق مەكتەبىنەن تولەگەن توقتاروۆ تۋىستارىنىڭ ۇيىنەن بەينەماتەريالدار ازىرلەپ، «ابايدى 60 جىل زەرتتەگەن ولكەتانۋشى»، «ريددەرلىك  اۋەسقوي ۆەلوسپورتشى اتا»، «ريددەر مۇراجايىنان قۇندى دەرەكتەر» تاقىرىپ-باعىتتارىندا ىزدەنىستەرىن الەۋمەتتىك جەلى پاراقشالارىندا ءبولىستى.

قازنەت «قازاقيا 2015» جوباسى ارقىلى سەمەي وڭىرىنەن ازىرلەنگەن «قازاقى مەشىت ارحيتەكتۋراسى»، «اباي مۇراجايى»، «ەرتىس اتىراۋىنداعى ارال»، «ق.رىسقۇلبەكوۆ. 21-كامەرا»، «مۇحتار اۋەزوۆ فۋتبولشى ما؟»، «ابايدىڭ قانشا مالى بولعان؟» جانە تاعى باسقا دا تانىمدىق، اقپاراتتىق جازبالارمەن تولىقتى.

جوبا ۇيىمداستىرۋشىسى راحات جاقسىبايدىڭ ايتۋىنشا، ساپارلاي ءجۇرىپ، شەكتەۋلى ۋاقىت ىشىندە جولجازبالارىن ازىرلەپ، سونىمەن قاتار ءوزارا سايىسقا تۇسەتىن مۇنداي بلوگ-ساپار بايقاۋ فورماتى ەلىمىزدە تۇڭعىش رەت جۇزەگە اسىپ وتىر.

ەستەرىڭىزگە سالايىق، قازاقستاندىق 4 G جەلىسىنىڭ وپەراتورى «التەل» كومپانياسىنىڭ قولداۋىمەن ىسكە اسقان جوبانىڭ جۇلدە قورى – 1 000 000 تەڭگە. بايقاۋدىڭ ناتيجەسى – ساپاردىڭ سوڭعى نۇكتەسى استانادا 22 ساۋىردە انىقتالادى.

اباي-اقپارات