مەنىڭ پايىمداۋىم مەن ءدال بۇگىنگە دەيىن كوزىمنىڭ تىكەلەي جەتكەنى – قازاقستاندا سايلاۋ ناۋقانى مەيلىنشە بەلسەندى تۇردە ءجۇرىپ جاتىر. رەسمي ساناتتاعى بۇقارالىق اقپارات قۇرالدارى ءىس باسىنداعى مەملەكەت باسشىسىنىڭ سايلاۋالدى باعدارلاماسىن تانىستىرا وتىرىپ، بالامالى كانديداتتارعا دا ايرىقشا ءمان بەرىپ وتىر. بالامالى ول كانديداتتاردىڭ وزدەرىنىڭ ەلەكتروندى بۇقارالىق اقپارات قۇرالدارى دا بەلسەندى تۇردە قىزمەت اتقارۋ ۇستىندە.

ماسەلەن، ەل پرەزيدەنتتىگىنە كانديدات تۇرعىن سىزدىقوۆتىڭ «كوممۋنيست كازاحستانا» اتتى ءوزىنىڭ  داۋىسىن، ويىن، پىكىرىن جەتكىزەتىن ناسيحات مىنبەرى بار. قازاقستان كوممۋنيستەرىنىڭ ۆەب-سايتتارى دا تۇراقتى دا قارقىندى، توقتاۋسىز ناسيحاتتاۋ  ءىسىن اتقارىپ كەلەدى. وتكەن ۇگىت-ناسيحات ماۋسىمى كەزەڭىندە بارلىعى 11 مىڭنان استام ناسيحات ماتەريالدارى حالىقتىڭ كوزى مەن قۇلاعىنا جەتكەن. بۇل وتە جاقسى كورسەتكىش ءارى بايقاۋشىلار تالابى تۇرعىسىنان العاندا دا «جەتكىلىكتى» دەگەن باعا بەرۋگە بولادى.

الايدا، سايلاۋ ناۋقانى ءالى دە اياقتالماعانىنا وراي كانديداتتاردى ناسيحاتتاۋ شارالارى جالعاسا بەرەدى. سول سياقتى، جەرگىلىكتى جەردەگى سايلاۋ شتابتارىنىڭ مالىمەتىنە سۇيەنەر بولساق، ۇگىت-ناسيحات جۇمىستارىنىڭ ساندىق كورسەتكىشى ۇلعايىپ، ءالى دە وسە تۇسەتىنى انىق.

اندرەي چەبوتارەۆ،

تۇڭعىش پرەزيدەنت كىتاپحاناسىنىڭ ساراپشىسى.

جازىپ العان

تالعات ءسۇيىنباي،

«ەگەمەن قازاقستان».

نەوماركسيزمنىڭ بوي كورسەتۋى – قالىپتى قۇبىلىس 

بۇل سايلاۋدىڭ وزگەلەرىنەن ەڭ باستى ايىرماشىلىعى نەدە؟ مۇنىڭ الدىنداعى سايلاۋدا ۇمىتكەرلەر ساياسي كوزقاراستارعا باسىمدىق بەردى، باعدارلامالارىنا كونسەرۆاتيزمدىك شىراي بەرگەنى دە اقيقات. بۇگىنگى سايلاۋداعى ۇمىتكەرلەردىڭ باعدارلامالارىندا تىڭ ساياسي تانىمدار مەن كوزقاراستاردىڭ جيىنتىعى قامتىلعانى بايقالادى.  ن.نازارباەۆ ەركىن بولمىستاعى باعدارلاما ۇسىنىپ وتىر. بيزنەس دامۋىنا ەرەكشە كوڭىل اۋداردى، ول دەگەنىمىز، ەڭ الدىمەن جاڭادان اشىلاتىن جۇمىس ورنى. بۇل ارادا ەشقانداي دا الەۋمەتتىك بەدەلشىلدىك-پوپۋليزم  بەلگىلەرى بايقالمادى. ول بىرقاتار الىپ بيزنەس جوبالارىنىڭ نۇسقاسىن جاساپ تا بەردى. بۇل ارادا ەرەكشە نازار اۋداراتىن ماسەلە،  بۇل جولى ينفراقۇرىلىمدىق جوبادان گورى، ينستيتۋتتىق باعدارلاماعا ايرىقشا ءمان بەردى. قايتالاپ ايتايىن، بۇل ارادا ەشقانداي دا الەۋمەتتىك پوپۋليزم داقپىرتى جوق. بۇعان قوسىمشا، ەلدەگى تۇراقتىلىق ۇستانىمى دا سايلاۋشىلاردىڭ كوڭىلىنەن شىعارى حاق.

جاڭادان قوسىلعان ەكى ۇمىتكەرىمىزدىڭ ءبىرى – تۇرعان سىزدىقوۆتىڭ ەسىمى نەوماركسيزم ءىلىمىن قولداۋشى ءارى انتيگلوباليزم قاعيداتتارىن جاقتاۋشى رەتىندە بەلگىلى بولا باستادى. ونىڭ باعدارلاماسى باتىستىق ءتارتىپ پەن ونداعى مەملەكەتتىك جۇيەنى جوققا شىعارۋعا نەگىزدەلگەنى جاسىرىن ەمەس. بۇل دا ءبىزدىڭ سايلاۋشىلارىمىز ءۇشىن تاڭسىق قۇبىلىس.

ءۇشىنشى ۇمىتكەرىمىز –  ابىلعازى قۇسايىنوۆ ءتول باعدارلاماسىنىڭ نەگىزگى  ەكى باعىتىمەن سايلاۋشى نازارىن وزىنە اۋداردى. «جاسىلدار» قوزعالىسىنىڭ جەبەۋشىسى بولا ءجۇرىپ، ەكىنشى جاعىنان تەحنوفوبيانى، تەحنيكالىق قاۋىپسىزدىك ماسەلەسىن الدىڭعى شەپكە شىعاردى.

مارات شيبۇتوۆ،

قازاقستان شەكارا اۋماعىنداعى ىنتى­­­ماقتاستىق قاۋىمداستىعىنىڭ وكىلى.

مەملەكەت پەن قوعام ۇلكەن سىناق الدىندا 

بىرىنشىدەن، قازاقستانداعى پرەزيدەنتتىك سايلاۋ بۇل جولى كەزەكتەن تىس وتكەلى وتىر.  سايلاۋشىلاردىڭ دا، ورتالىق سايلاۋ كوميسسياسىنىڭ دا ورتاق ءبىر ماقساتقا جۇمىلۋى دا سوندىقتان دەپ ويلايمىن. سايلاۋعا قاتىستى زاڭ ەرەجەلەرى قاتاڭ ساقتالۋدا. ەكىنشىدەن، ەلىمىزگە اياق باسقان شەتەلدىك بايقاۋشىلاردىڭ تولاسسىز لەگى، سىرتتاي قاراعاندا، الەم جۇرتشىلىعى نازارىنىڭ قازاقستانعا اۋىپ وتىرعانىن بايقاتادى.  قازىر  پرەزيدەنتتىككە كانديدات ءۇش ازامات تا ەلدىڭ تۇكپىر-تۇكپىرىن ارالاپ، سايلاۋشىلارمەن كەزدەسۋدە.

كانديداتتاردىڭ ەلەكتورات الدىندا قويعان ايقىن ۇستانىمى مەن كوزقاراسى، باعدارلاماسى ايقىندالىپ تا قالدى. دەمەك، بەلگىلى كۇنى داۋىس بەرۋگە  باراتىن ەلىمىزدىڭ ءاربىر ازاماتىنىڭ كىمگە داۋىس بەرەتىنى – ءوز ەركىندەگى ءىس. حالىق – ءۇش ۇمىتكەردىڭ دە سايلاۋالدى باعدارلاماسىمەن بۇقارالىق اقپارات قۇرالدارى ارقىلى جاقسى تانىستى دەپ ويلايمىن. سايلاۋعا جاسى جەتكەن بارلىق ازاماتتارعا  ەلەكتروندى بۇقارالىق اقپارات قۇرالدارى ارقىلى ويلارىن اشىق ايتۋعا مۇمكىندىك بەرىلگەن. كەز كەلگەن سايلاۋ كەز كەلگەن مەملەكەت ءۇشىن عانا ەمەس، قوعام ءۇشىن دە ۇلكەن سىناق بولىپ قالا بەرمەك. سايلاۋشى كىمگە داۋىس بەرسە دە ەلىنىڭ بولاشاعى ءۇشىن داۋىس بەرەدى. مەنى سايلاۋشىلارىمىزدىڭ بۇگىنگى بەلسەندىلىگى قۋانتادى.

يۋري بۋلۋكتاەۆ،

قازاقستان ستراتەگيالىق زەرتتەۋلەر ينستيتۋتىنىڭ اعا عىلىمي قىزمەتكەرى.

 Abai.kz