سەنبى, 18 قاڭتار 2020
جاڭالىقتار 6743 0 پىكىر 31 ناۋرىز, 2015 ساعات 11:49

30 تومدىق تەرمينولوگيالىق سوزدىك جارىق كوردى

 

26 ناۋرىز كۇنى قازاقستان رەسپۋبليكاسى ۇلتتىق كىتاپحاناسىندا مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىستار كوميتەتىنىڭ تاپسىرىسى نەگىزىندە دايىندالعان 30 تومدىق قازاقشا-ورىسشا، ورىسشا-قازاقشا تەرمينولوگيالىق سوزدىكتەر توپتاماسىنىڭ تۇساۋكەسەر ءراسىمى ءوتتى.

ءراسىمدى كوميتەت توراعاسىنىڭ ورىنباسارى سەرىك سالەموۆ مىرزا كىرىسپە ءسوز سويلەپ اشتى. سوزدىكتەر توپتاماسىنىڭ «قر تىلدەردى دامىتۋ مەن قولداۋدىڭ 2011–2020 جىلدارعا ارنالعان مەملەكەتتىك باعدارلاماسى» اياسىندا دايىندالعانىن، وسى جۇمىستى اتقارۋ نەگىزىندە ەلباسىنىڭ قازاق ءتىلىنىڭ تەرمينولوگيالىق قورىن جاساۋ جونىندەگى تاپسىرماسىنىڭ ابىرويمەن ورىندالعانىن ايتا كەلە، اۆتورلىق ۇجىم مۇشەلەرىنە ۇلكەن قاجىرلى ەڭبەكتەرى ءۇشىن مينيسترلىك اتىنىن العىس ايتتى.

العاشقى ءسوز وسى جوبانىڭ عىلىمي جەتەكشىسى، قازاقستان پەداگوگيكالىق عىلىمدار اكادەمياسىنىڭ پرەزيدەنتى اسقاربەك قۇسايىنوۆقا بەرىلدى. ول عىلىم مەن تەحنيكانىڭ، ءوندىرىس پەن مادەنيەتتىڭ بارلىق سالالارىن قامتيتىن سوزدىكتەر توپتاماسىن دايىنداۋ جۇمىستارى كوميتەتپەن جاسالعان شارت نەگىزىندە 2012-2014 جىلدارى جۇرگىزىلگەنىن، ونى دايىنداۋعا 52 مەكەمەدە – جوعارى وقۋ ورىندارىندا، عىلىمي-زەرتتەۋ ينستيتۋتتارىندا، اكادەميالاردا، مينيسترلىكتەر مەن پارلامەنتتە، سالالىق مەكەمەلەردە جۇمىس جاسايتىن 144 عىلىم دوكتورى، 120 عىلىم كانديداتى، جالپى 350-دەي ادام قاتىناسقانىن ايتتى. سالا تەرمينولوگياسىن قالىپتاستىرۋمەن شۇعىلدانىپ جۇرگەن سالا ماماندارى مەن عالىمدار، ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ عالىمدارى، رەسپۋبليكالىق تەرمينولوگيالىق كوميسسيا مۇشەلەرى بىرلەسە وتىرىپ اتقارعان جانە جالپى جۇرتشىلىق پىكىرى ەسكەرىلە وتىرىپ دايىندالعان وسىنداي كولەمدى جۇمىس نەگىزىندە قازاق ءتىلىنىڭ 250 مىڭنان اسا سالالىق تەرميندەر قورى جاسالىپ، قازاق ءتىلى تەرمينولوگياسىنىڭ عىلىمي نەگىزدە دامىپ، كەمەلدەنە تۇسۋىنە ناقتى نەگىز قالانعانىن ايتتى.

راسىمدە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى، تەحنيكا عىلىمدارىنىڭ دوكتورى التىنبەك شارىپباەۆ، قر ۇلتتىق عىلىم اكادەمياسىنىڭ اكادەميگى، تەحنيكا عىلىمدارىنىڭ دوكتورى بىرلەسبەك الياروۆ، ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى ءالىمحان جۇنىسبەكوۆ، فيلولوگيا عىلىمدارىنىڭ دوكتورى، پروفەسسور دانداي ىسقاقۇلى، ق.ساتپاەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ پروفەسسورى قالىبەك قونىسپاي، ءو.ا.جولداسبەكوۆ اتىنداعى مەحانيكا جانە ماشيناجاساۋ ينستيتۋتىنىڭ اعا عىلىمي قىزمەتكەرى، تەحنيكا عىلىمدارىنىڭ كانديداتى ارلوپ احمەتوۆ، ق.ساتپاەۆ اتىنداعى ۇلتتىق تەحنيكالىق ۋنيۆەرسيتەتىنىڭ پروفەسسورى، تەحنيكا عىلىمدارىنىڭ دوكتورى ناسىپقالي سەيىتوۆ، قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پروفەسسورى رىسباي ساتىمبەكوۆ، س.ج.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ پروفەسسورى جاۋباستى احمەتوۆ اۆتورلىق ۇجىم مۇشەلەرىنىڭ كوپ ىزدەنىپ، ۇلكەن جاۋاپكەرشىلىكپەن جۇمىس جاساعاندارىن، سوزدىك جاساۋدا ورتاق تۇجىرىم (پرينتسيپ) ۇستانعاندارىن، تەرميندەردى بىرىزدەندىرۋ ماقساتىندا جۇرگىزىلگەن ورتاق تالقىلاۋ جۇمىستارىنىڭ ماڭىزىن، تەرميندەردى قازاق تىلىندە دۇرىس جازۋدا ءتىلشى عالىمداردىڭ جاقسى جۇمىس اتقارعاندارىن ايتا كەلە، الداعى ۋاقىتتاردا وسى تەرميندەردى كەڭىنەن قولدانۋدىڭ ماڭىزدىلىعىنا، اسىرەسە مەكتەپ وقۋ ادەبيەتىن جازاتىن اۆتورلاردىڭ وسى سوزدىكتەردى باسشىلىققا الۋ قاجەتتىگىنە جانە سوزدىكتەر جاساۋدىڭ باسقا ماڭىزدى پروبلەمالارىنا ەرەكشە توقتالىپ ءوتتى.

ءۇش جىل بويى «انا ءتىلى» گازەتىنىڭ 23 سانىندا «وقىرمانمەن ويلاسۋ» اتتى ايدارمەن «تەرمينجاسام: ۇسىنىس. پىكىر» دەگەن تاقىرىپپەن مىڭداعان تەرمين جاريالانعان. اكادەميا سايتىنا 30 توم سوزدىك تەگىس ءىلىنىپ، ول تۋرالى «ەگەمەن قازاقستان» جانە «انا ءتىلى» گازەتتەرىنە ارنايى حابارلاما بەرىلگەن. سويلەگەن اۆتورلار وسى جۇمىستار ارقىلى ۇسىنىس-پىكىر ايتقان ءتىل جاناشىرلارىنا العىس ايتىپ، ەلباسى ن.ءا.نازارباەۆتىڭ مەملەكەتتىك ءتىلدى دامىتۋدا كورەگەندىك ساياسات ۇستانىپ وتىرعانىنا ريزاشىلىق سەزىم ءبىلدىردى.

سوزدىكتەردى باسىپ شىعارعان قازاقپارات كورپوراتسياسىنىڭ پرەزيدەنتى قونىسبەك بوتپاي ولاردى ساپالى جانە ۋاقتىلى شىعاۋعا باسپا قىزمەتكەرلەرىنىڭ اكادەميا قىزمەتكەرلەرىمەن بىرگە ۇلكەن ىجداعاتتىقپەن ەڭبەك ەتكەندەرىنە توقتالدى.

اباي-اقپارات

0 پىكىر