استانا قالاسى اكىمدىگىنىڭ قولداۋىمەن ساكەن سەيفۋللين مۇراجايى جانە قازاقستان جازۋشىلار وداعى استانا فيليالى قازاق حاندىعىنىڭ 550 جىلدىق مەرەكەسىنە وراي «ۇلىتاۋ ۇلاعاتى – ۇلت تاريحى» اتتى رەسپۋبليكالىق ءمۇشايرا جاريالايدى. 

بۇعان دەيىن «تاۋەلسىزدىككە تارتۋ»، «بايتاق ەلىم – باقىتىم»، «جارقىرا، جاينا، استانا!»، «ماڭگىلىك ەل – ۇلت مۇراتى» دەگەن ايدارلارمەن تاۋەلسىزدىك، استانا جانە تۇڭعىش پرەزيدەنت كۇندەرى قۇرمەتىنە وراي رەسپۋبليكالىق جىر سايىستارى وتكەنى جۇرتقا بەلگىلى.

حالقىمىزدىڭ عاسىرلار قويناۋىنان جەلى تارتقان ۇلان-اسىر تاريحىنىڭ ءتورت قۇبىلاسىن تۇگەندەپ، كەتىگىن بۇتىندەپ، كەمتىگىن تولتىرىپ، ۇلتىمىزدىڭ كوكىرەگىن كەرنەگەن مۇڭ-شەرىن تارقاتىپ، ارمان-مۇراتىن اسقاقتاتار كۇن ەلىمىز تاۋەلسىزدىك تۇعىرىنا قونعاننان كەيىن عانا تۋدى. ءتاۋبا، ەل بولىپ، ەڭسە كوتەرىپ، كوك تۋىمىزدى ەركىندىك اسپانىندا جەلبىرەتىپ، ارقا توسىنە ازات استانامىزدى ورناتىپ، اقوردالى مەملەكەتكە اينالدىق! ىرگەلى ەلدەرمەن ۇزەڭگى قاعىستىرىپ، ات قۇلاعىن تەڭەستىردىك. بۇل كەشەگى كەرەي مەن جانىبەك باستاعان، ابىلاي قوستاعان ءيىسى قازاقتىڭ اڭساپ كۇتكەن ارمانى ەدى. سول ارمان ۇلى كوشىمىزدىڭ تىزگىنىن ۇلتىمىزدىڭ ماڭدايىنا بىتكەن دارا پەرزەنتى، تاۋەلسىز قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆ قولىنا العان كەزەڭدە جۇزەگە استى. قوي ۇستىنە بوزتورعاي جۇمرىتقالاعان بەيبىت زامان ورنادى. كوپ ۇلتتى قازاقستان بىرلىك پەن بەرەكەنىڭ ورداسىنا اينالدى. الەم الدىندا باۋىرمال قازاق ەلىنىڭ مەرەيى ۇستەم بولىپ، مارتەبەسى بيىكتەدى. وسىنىڭ ءبارى – حالقىمىزعا ءتاڭىر سىيلاعان باقىت!

ءمۇشايرانىڭ باستى ماقساتى – حالقىمىزدىڭ وسىناۋ بايتاق باقىتىن جان-جاقتى  جارقىراتا جىرلاۋ ارقىلى جاس ۇرپاقتىڭ جۇرەگىنە وتانشىلدىق رۋحتى ۇيالاتۋ.  جىر بايگەسىنىڭ تاقىرىپ اياسى مەيلىنشە كەڭ. كەرەي مەن جانىبەكتەن - حان كەنەگە، جيرەنشە شەشەننەن – ءىلياس ەسەنبەرلينگە دەيىنگى قازاق حالقىنىڭ باسىنان وتكەن سان قيلى كەزەڭدەر تولعاي بىلگەن تالانتقا، جىرلاي بىلگەن اقىنعا ۇشان-تەڭىز الەم.

«ابىلايدىڭ اسىندا شاپپاعاندا، اتاڭنىڭ باسىندا شاباسىڭ با؟!» دەگەن ەكەن بابالارىمىز. ءوز تاۋەلسىزدىگىمىزدى، ءوز تاريحىمىزدى، ءوز وتانىمىز بەن ءوز استانامىزدى، ءوز تۇلعالارىمىزدى ءوزىمىز جىرلاماعاندا كىم جىرلايدى؟! قازاق حاندىعىنىڭ بەس جارىم عاسىرلىق تويىندا شاپپاعان جۇيرىك جۇيرىك پە، تولعانباعان اقىن اقىن با؟! مىنە، ارعىماق-جىردىڭ الامانى باستالدى. ەندەشە، انشەيىندە ءدۇبىر شىقسا دەلەبەسى قوزاتىن ارقالى اقىندار، ساليقالى جىر سىزدەردەن، سالماقتى جۇلدە بىزدەردەن!

باس جۇلدە – ءبىر ميلليون تەڭگە.

ءبىرىنشى ورىن – بىرەۋ

ەكىنشى ورىن  - ەكەۋى

ءۇشىنشى ورىن  - ۇشەۋ

ىنتالاندىرۋ سىيلىعى – بەسەۋ

مۇشايراعا ەش جەردە جارىق كورمەگەن پوەمالار، تولعاۋلار، توپتاما ولەڭدەر ماۋسىم ايىنىڭ 15-ىنە دەيىن قابىلدانادى.

ءمۇشايرا قورىتىندىسى استانا كۇنى قارساڭىندا جاريالانىپ، ماراپاتتاۋ سالتاناتى وتەدى.

ۇمىتكەرلەر شىعارماسىن كومپيۋتەردە تەرىپ، 5 داناسىن تومەندەگى مەكەن-جايعا جىبەرۋ كەرەك نەمەسە astanakalamger@mail.ru ەلەكتروندىق پوشتاعا جولداۋعا بولادى. اۆتوردىڭ اتى-ءجونى، مەكەن-جايى، بايلانىس تەلەفونى، ەلەكتروندىق پوشتاسى (بار بولسا) مىندەتتى تۇردە كورسەتىلۋى كەرەك.

يندەكس: 010000, استانا قالاسى، اۋەزوۆ كوشەسى، 20 «ا» ساكەن سەيفۋللين مۇراجايى. تەل: 32-15-90, 32-84-67

جۇلدەگەرلەردىڭ استاناعا كەلىپ-كەتۋدەگى بارلىق شىعىنىن ۇيىمداستىرۋشى تاراپ موينىنا المايدى.

اباي-اقپارات