بۇگىن قر ورتالىق سايلاۋ كوميسسياسىندا قازاقستان رەسپۋبليكاسىنىڭ پرەزيدەنتتىگىنە كانديدات ەسەنبەك جاپارۇلى ۇكتەشباەۆتىڭ مەملەكەتتىك ءتىلدى مەڭگەرۋ دەڭگەيىن انىقتاۋ جونىندەگى لينگۆيستيكالىق كوميسسيانىڭ وتىرىسى بولدى. لينگۆيستيكالىق كوميسسيانىڭ شەشىمىمەن قازاقستان رەسپۋبليكاسىنىڭ پرەزيدەنتتىگىنە كانديدات ەسەنبەك جاپارۇلى ۇكتەشباەۆ مەملەكەتتىك ءتىلدى ەركىن مەڭگەرمەگەن دەپ تانىلدى.

«تاڭداعان تاقىرىپتى اشۋ تالاپ ەتىلەتىن جازباشا تاپسىرمادا كانديدات ءوز ويىن قيسىنىنا كەلتىرىپ جەتكىزە المادى، ءسوز تىركەستەرىنىڭ ادەبي نورمالارىن بۇزا وتىرىپ، سويلەمدەردى ستيليستيكالىق جاعىنان دۇرىس قۇرعان جوق. جازباشا تاپسىرمانىڭ كولەمى تالاپ ەتىلەتىن ەكى پاراقتان كەم بولدى»، - دەدى ول تۋارلى لينگۆيستيكالىق كوميسسيانىڭ توراعاسى مىرزاتاي جولداسبەكوۆ.

سونداي-اق، قر پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا الدىندا سىناق تاپسىرعان ءوزىن-ءوزى ۇسىنۋشى ەرجان سەرعازين دە سىننان وتپەي قالدى.

ول تاپسىرماداعى ءبىرىنشى جازبا جۇمىسىن «كونستيتۋتسيا - تۇراقتى دامۋ كەپىلى» دەگەن تاقىرىپتا ورىنداعان. مازمۇندىق جاعىنان كوميسسيا كوڭىلىنەن شىقپاعان جازبا جۇمىسىندا 24 قاتە كەتىپتى. ال، ابايدىڭ پوەزياسى مەن قارا سوزدەرىنەن الىنعان 3 بەتتىك ءماتىندى ەجىكتەپ ارەڭ وقىعان. سونداي-اق، ءۇشىنشى كەزەڭدە «قازاق ونەرىنىڭ بەل-بەلەستەرى» دەگەن تاقىرىپتا 15 مينۋت سويلەگەن ە.سەرعازين ءوز ويىن انىق جەتكىلزە الماپتى...

ايتپاقشى، قر پرەزيدەنتتىگىنە تاعى ۇمىتكەر قايرات مايشەۆ كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسياعا سىناق تاپسىرۋ ءۇشىن كەلمەي قالدى. ول بۇگىن كۇندىزىگى ساعات 15.00-دە مەملەكەتتىك تىلدەن سىناق تاپسىرۋى ءتيىس بولاتىن.

اباي-اقپارات.