اۋىت مۇقيبەك. دانا شەشىم
قازاقستان رەسپۋبليكاسىنىڭ تۇڭعىش پرەزيدەنتى
نۇرسۇلتان ءابىشۇلى نازارباەۆقا!
ءبىزدىڭ ەل بولا الادى اينا وزگەگە،
جۇرگەن جوق كيىپ حالقىڭ جاي كەزدەمە!
جۇرتىم كەپ تىرەلگەندە ءبىر وتكەلگە،
جاسايسىڭ باتىل شەشىم قاي كەزدە دە!
ءبىر جىلدىڭ نەگە كەرەك ار-بەرىسى،
ءۇڭىلۋ كەرەك شىعار مانگە كىسى.
ازاتتىق تۋى قولدان ماڭگى تۇسپەي،
قازاقتىڭ تولسا بولدى مالعا ءورىسى!
جيىلعان ارمانداستار بۇل ماڭعا كىل،
تىلەۋى بولاتۇعىن جىلدام قابىل!
ءبىر جىلدىڭ ار-بەرىسى ءسوز بولىپ پا،
ۇيىعان بەيبىت ءومىر تۇرعاندا بۇل!
اقىلىن تىڭداپ وسكەن ەسكىنىڭ كوپ،
تانىدى ءسىزدى قازاق تەكتى ۇلىم دەپ!
ءبىر جىلدىڭ ار-بەرىسى كىمگە كەرەك،
تۇرسا ايتەۋ بولدى بىزگە كوش دۇرىلدەپ!..
الىپسىڭ ارداقتاعان جۇرت ەسىمىن،
بىتەدىڭ قاراشا ءۇيدىڭ مىڭ تەسىگىن!
تاعى ەلىڭ وتىر، مىنە، ءسىزدى قولداپ،
نۇرەكە، دۇرىس بولدى بۇل شەشىمىڭ!
سىنادى ءسىزدى ءومىردىڭ كىلەڭ ءورى،
جۇرەك تە سىزگە بىتكەن، جۇرەك ەدى!
قولدايمىز نۇرەكەڭدى ءبىر اۋىزدان،
دەپ جاتىر قانداستارىڭ ىلەدەگى!
ساپاردان كورىپ پەكين، شاڭحايداعى،
قازاقتىڭ دۇركىرەدى قانشا ايماعى!
شاۋەشەك شاشۋ شاشتى قۋانعاننان،
كەرەيلەر كوكپار تارتتى التايداعى!
تالاپقا بولارى حاق ساي ەرتەڭىڭ،
ەلىڭنەن جوق-اۋ، ءسىرا، ايار تەرىڭ!
ايتاتىن شىعار ءوزى داۋلەتكەرەي،
سالەمىن سىزگە دەگەن بايولكەنىڭ!
وسى عوي بولاشاققا كوز جەتكەنى،
ورالدى ارقانىڭ دا تەز كوكتەمى!
قازاقتار بوركىن اتتى ورىستاعى،
بيلەدى تۋىستارىڭ وزبەكتەگى...
شاشىلعان جەر بەتىنە اندىزدالىپ،
ءبىز شىعار ەلگە پانا جالعىز حالىق!؟
نەگە ەرتە قامدانبادىم دەپ ىشىمنەن،
وتىرمىن باشماكوۆتان ءسال قىزعانىپ!
اقىندىق جىلجىپ بارام تورىنە مەن،
جازۋعا ەش حاقىم جوق جەڭىل ولەڭ.
ءسۇرتتىڭ كەپ شەكپەنىڭنىڭ ەتەگىمەن،
«كوش-كوش!» دەپ كوز جاسىمدى ەڭىرەگەن!
ىشىندە ويلاردىڭ ءبىر ءجۇزدىڭ دە ابات،
قاقتىڭ سەن بولاشاققا قىزعىن قانات.
جول اشام دەگەنىڭ دە قانداستارعا،
جادىراپ سالا بەرگەن ءبىزدىڭ قاباق!
كوزىن كەپ، اشىپ ەدىڭ سوردان بۇلاق،
جايقالدى ارقاداعى ورمان، قۇراق!
زاڭىنا قانداستاردىڭ قول قويساڭىز،
ار قاراي كەتكەلى تۇر جول داڭعىراپ!
وتانىن دەيتىن ەلگە قۇلپىرتام كەپ،
اكىمدەر جاتقان شىعار جۇرتىن ساندەپ.
ەرتەڭ-اق اعىلادى ارقاعا كوش،
سوعادى بۇكىل جۇرەك نۇرسۇلتان دەپ!
جۇكتىڭ دە كوتەردىڭ عوي سان اۋىرىن،
جوق بۇگىن ەرىنشەك قىز، ناراۋ ۇلىڭ.
جۇرتىم كەپ تولتىرادى سايگۇلىككە،
بوس جاتقان سولتۇستىكتىڭ بار اۋىلىن!
جۇرتىڭدى بولمايدى عوي تىڭداماساڭ،
حالقىسىز شىعىپ ەدى ەر شىڭعا قاشان؟!
جوقتىعىن تۇماعامنىڭ بىلدىرمەي مەن،
اسىرىپ ايبىنىڭدى جىرعا قوسام.
نە ويلار كەلمەس دەيسىڭ باسىڭا ءداۋ،
سول ويلار ءبىزدى باعىپ، اسىرادى-اۋ!
ءبىز سىزگە ريزامىز، ءدان ريزا،
امان جەت جامبىل اتاڭ جاسىنا اناۋ!!!
استانا. 26.02.2015
Abai. kz
