استانا قالاسىنىڭ تۇرعىنى جاندوس قۇرمانباەۆتى قازاقستاننىڭ كوك تۋىن كوكە كوتەرىپ، باسپاناسىنىڭ بالكونىنا ءىلىپ قويعانى ءۇشىن ايىپ سالىپتى.

بۇل ەستىگەن قۇلاققا ۇيات ەمەس پە! تاۋەلسىز مەملەكەتتىڭ، ءوز وتانىنىڭ تۋىن قاستەرلەگەنىنە بولا سول ازاماتتى جازالاۋ دەپ قابىلدادىم. امەريكالىقتار، قىتايلار مەن تۇرىكتەر، ت.ب. جەر جۇزىندەگى مەملەكەتتەردىڭ حالقى تۋلارىن اسپەتتەپ كولىكتەرىنە قاداپ، ۇيلەرىنىڭ تەرەزەلەرىنەن، بالكوندارىنان شىعارىپ جەلبىرەتىپ قويادى، بالالارىنىڭ قولىنا ۇستاتىپ كوشەدە جۇرەدى ۇلتتىق مەرەكەلەرىندە. ول – ازاماتتاردىڭ ەلىنە دەگەن شەكسىز سۇيىسپەنشىلىگىنىڭ بەلگىسى. وتاندى ءسۇيۋدىڭ ەڭ جوعارعى ۇلگىسى.

ءبىزدىڭ مىنا ايىپ سالۋىمىز وتە ماسقارا بولدى. قۇرمانباەۆ تۋدى اياقاستى ەتكەن جوق قوي. وتانعا دەگەن ماحاببات پەن ماسقارانى ايىرا الماعانىمىز با؟

قايتسەك جاستاردىڭ پاتريوتتىق سەزىمىن اسقاقتاتامىز، قايتسەك كەلەر ۇرپاققا وتاندى ءسۇيۋدىڭ ۇلگىسىن قالدىرىپ كەتەمىز دەپ جۇرگەندە مۇنىمىز نە؟ رامىزدەرگە ەرەكشە قۇرمەتپەن قاراۋدى دۇرىس ۇعىنباعانىمىز با؟ جوق زاڭدى دۇرىس تۇسىنە الماعانىمىز با؟

وسى ايىپتى سالعانداردى انىقتاپ، «قازاقستان رەسپۋبليكاسىنىڭ مەملەكەتتىك تۋى باسقا دا عيماراتتاردا ء(ۇي-جايلاردا) ولاردىڭ يەلەرىنىڭ ەركى بويىنشا تىگىلۋى مۇمكىن دەگەن جولداردى (قازاقستان رەسپۋبليكاسىنىڭ اكىمشىلىك قۇقىق بۇزۋ تۋرالى كودەكسىنىڭ 458 باپ، 1 تارماعى) دۇرىس تۇسىنۋگە بىلىكتىلىگى جەتپەگەنى، قۇقىقتىق ساۋاتسىزدىعى ءۇشىن وزدەرى جازالانۋعا ءتيىستى. زاڭ بۇزارلار الدا وسىنداي ارەكەتتەردى باسقاشا جاعىنان دا جاساۋى مۇمكىن. سالىنىپ وتىرعان 200 ايلىق ەسەپتىك كورسەتكىش ايىپ سولارعا سالىنۋى كەرەك دەپ ويلايمىن.

ساۋلە دوسجانوۆا،

جۋرناليست-زاڭگەر.

Abai. kz