مۇسىلماندار الداعى ءساۋىر ايىندا بولاتىن پرەزيدەنت سايلاۋىنا ءوز ۇمىتكەرلەرىن تاڭدادى، دەپ حابارلايدى NewTimes.kz سايتىنىڭ اقپاراتتار قىزمەتى. ال، مۇسىلمانداردىڭ ۇمىتكەرى – مۇرات تەليبەكوۆ ەكەن.

«پرەزيدەنت سايلاۋى – بۇل پاتريوتتىق اكت، ەكونوميكانىڭ تۇراقتىلىعىنا پارمەن بەرەتىن، ەلىمىزدىڭ وركەندەپ ءوسۋى مەن ازاماتتاردىڭ جاقسى تۇرمىسىن قامتاماسىز ەتۋ ءۇشىن حالىقتىق شەشىمدەر قابىلداۋدىڭ مۇمكىندىگى. سوندىقتان ءبىز، كوكتەمنىڭ العاشقى كۇنىندە، ءسىزدى بارلىق قازاقستاندىقتار قالاپ وتىرعان قادام جاساۋعا شاقىرامىز»، - دەپ جازىلعان تەليبەكوۆتىڭ اتىنا جولدانعان ۇندەۋدە.

تەليبەكوۆتى پرەزيدەنت سايلاۋىنا شاقىرعان بۇل ۇندەۋدى ەلىمىزدەگى ءيسى مۇسىلماننىڭ ۇندەۋى دەپ ءتۇسىنۋ ارتىقتاۋ بولار... ويتكەنى، ول – قمدب-نىڭ ەمەس، مۇسىلماندار قاۋىمداستىعى دەپ اتالاتىن ۇيىمنىڭ عانا توراعاسى. ۇندەۋدەگى «بارلىق قازاقستاندىقتار قالاپ وتىر» دەگەن ءسوز دە اسىرىپ ايتىلعان. سەبەبى، تەليبەكوۆ ەلىمىزگە اسا تانىمال تۇلعالاردىڭ قاتارىنا جاتپايدى. ايتكەنمەن دە، سايلاۋعا ۇمىتكەر رەتىندە قاتىسۋعا ونىڭ تولىق قاقىسى بار.

ء«سىز مۇسىلمان قاۋىمىنىڭ اقىل-ويىن كەمەل مەڭگەرگەندىكتەن ونى اقىل-پاراساتتىڭ شەگىندە پايدالانىپ، قازاقستان مۇسىلماندارىن بارلىق سىناقتان الىپ شىقتىڭىز» دەلىنگەن الگى ۇندەۋدە.

ۇندەۋشىلەردىڭ سوزىنە قاراعاندا، تەليبەكوۆتى الەم جۇرتى اقىلدى، بەدەلدى تۇلعا رەتىندە تانيدى ەكەن. تەليبەكوۆتىڭ ۇسىنىستارى جاھان جۇرتىنىڭ تاراپىنان قولداۋ تاۋىپ، ميلليونداردىڭ جۇرەگىنەن جول تاۋىپتى.

Abai.kz