تەلەديدار قاراي قويايىن دەپ اشسام، ءبىر ارنا توقال ماسەلەسىن كوتەرىپ جاتىر، ءبىر ارنادان وتباسىلىق ءومىر تۋرالى ۋاعىز ايتىلىپ جاتىر، فب-عا كىرسەم بىرەۋدىڭ كۇيەۋىنە، بىرەۋدىڭ ايەلىنە "عاشىق" بولعان جاندار. ءبىر بەدەلدى، باقۋاتتى اعام ء"بىرىنشى جارىم اۋىرىپ، توسەك تارتىپ جاتىپ قالعاندا قايتا تۇرمايدى دەدى مە، باسىمدى سۇيەۋگە جارامادى، جازىلىپ، ەتەك - جەڭىمدى جيىپ، بيزنەسىمدى باستاپ، ەل قاتارىنا قوسىلدىم، قالعان كوڭىل ورنىنا كەلمەي اجىراستىق، سوسىن ەكىنشى رەت ۇيلەندىم، ورتاق بالامىز بولمادى، سونىڭ بالالارىن باعىپ، جەتكىزدىم، شەتەلدە وقىتتىم، تۋعان-تۋىسىنان دا تۇگىمدى ايامادىم، مەنىڭ اقشام عانا كەرەك ەكەنىنە كوزىم جەتىپ، ودان دا اجىراستىم، قازىر جاس قىزعا ۇيلەندىم، سىيلار، تۇسىنەر، ەندى نەدە بولسا وسىمەن تۇرامىن. عازيزا، ەكى جاقسى قۇداي قالعىعاندا عانا قوسىلادى" دەپ اڭگىمەسىن اياقتادى. باقىتىنىڭ باياندى بولۋىن تىلەدىم. ء"بىز باياعىدا رەنجىسكەندە توركىنگە كەتپەي، اكەڭنىڭ تۋىسىنىڭ ۇيىنە بارىپ، اشۋ تارقاعاسىن تۇك بولماعانداي قايتىپ كەلەتىنبىز." دەيدى انام. ءبىر كۇيەۋبالام "بىرنارسە بولسا ەنەم دالادا جاتقان قىزىم جوق" دەپ شىعادى دەپ رەنجىپ وتىر. نەگىزى ءبىر الاقاننان شاپالاق شىقپايدى. ەكى جاقتان دا بار. ايەلدى سىيلاۋدىڭ ءجونى وسى ەكەن دەپ توبەلەرىنە شىعارىپ، ءتىپتى تۋعان شەشەسىن دە سىيلاتا الماي، اعايىننان سىرت ەتكەن ەركەكتەردى دە كورىپ ءجۇرمىز. ايەلدى سىيلاۋ مەن ونىڭ ساعان وكتەمدىك جۇرگىزگەنىن شاتاستىرىپ الىپ جاتامىز. ءبىراز ۋاقىت بۇرىن تۇرمىسقا شىققان ءبىر ءسىڭىلىم كەلدى، اياعى اۋىر، "قاتەلەسىپپىن، وڭباعان ەكەن، قىزعانشاق، اناسى ءتىپتى جامان" دەپ، مەنىڭ جانىم اشىپ، الگىلەردى تۇقىمدارىمەن جەك كورىپ، مەننەن كەيىنگى ءسىڭلىم "سەنى بايلاپ قوسقان ەشكىم جوق، اناسىمەن تۇرمايسىڭ ونىڭ، كىنا سەننەن دە بار شىعار" دەپ ءىش جىلىتا قويمادى. سۇراعان اقشاسىندا بەرمەدى. سودان قايتىپ ەتتى. قازىر ەكى بالاسى بار، تاتۋ - ءتاتتى ءومىر ءسۇرىپ جاتىر. ءتاۋبا. "ەركىندىككە ۇيرەنىپ قالعان باسىم، وتباسىلىق ومىرگە بىردەن كوندىگە الماعان مەن دە كىنالى ەكەنمىن" دەيدى كەيىن. ءبىر جاس كەلىنشەك: "كۇيەۋىم كوزىمە ءشوپ سالعانىن بىلسەم، ولەمىن" دەيدى. جىندىسىڭ، وندا، انا ەكى بالاڭ كىمگە قالادى دەدىم. ايتا بەرسەڭ وتباسىلىق ءومىردىڭ جىرى تاۋسىلمايدى.
"تابيعات ايەلگە بىلاي دەيدى: قولىڭنان كەلسە سۇلۋ بول، قالاساڭ دانا بول، ال، سانالى، اقىلدى بولۋعا مىندەتتىسىڭ" دەپ جازىپتى بومارشە. سابىرلى بولۋعا دا مىندەتتى دەر ەدىم. سىيلاستىق پەن سەنىم عوي باستىسى. قۇداي قوسقان قوساقتارىڭىزدان اجىراسپاي، باقىتتارىڭىز باياندى بولسىن.
پىسى: اقىلىم تاسىپ ەمەس، ويلانعان ءتۇرىم عوي...

عازيزا قۇدايبەرگەن.

(جازبا اۆتوردىڭ facebook-تەگى پاراقشاسىنان الىندى)