ورتا سالماقتا WBA (Super), WBC, IBF جانە IBO تۇجىرىمدارى بويىنشا الەم چەمپيونى قازاقستاندىق بوكسشى گەننادي گولوۆكيننىڭ كومانداسى The Steppe سايتىندا قازاقستانداعى جەكپە-جەكتىڭ ءوتۋ-وتپەۋى ءالى بەلگىسىز ەكەنىن، ال جاڭالىقتاردا تەك قاۋەسەت ايتىلىپ جاتقانىن مالىمدەدى، - دەپ حابارلايدى tengrinews.kz سايتى Vesti.kz-كە سىلتەمە جاساپ.

GGG ءوزىنىڭ تۋعان ەلىندە جۇدىرىقتاسۋعا قۋانا-قۋانا كەلىسىم بەرەتىنىن بىرنەشە مارتە ايتقان ەدى. بۇل جەكپە-جەك ءتىپتى الەم بوكسىنىڭ جىلناماسىنا جازىلادى دەپ ەسەپتەلە باستادى، سەبەبى بۇل سوڭعى ون جىلدا الەمنىڭ ابسوليۋت چەمپيونىن انىقتايتىن، بارلىق تيتۋل تىگىلەتىن كەزدەسۋ بولادى دەلىنەدى. ال گەنناديدىڭ ءوزى قازاقستان تاريحىندا پوستكەڭەستىك ەلدەردىڭ تاريحىندا، قۇرلىقتا تۇڭعىش رەت، الەم بوكسى تاريحىندا ءۇشىنشى بولىپ بارلىق نەگىزگى ءتورت تيتۋلدى جەڭىپ الۋ مۇمكىندىگىنە يە بولا الادى.  ء"ۇشىنشى تۇلعالاردىڭ وسى جەكپە-جەككە قاتىستى بارلىق مالىمدەمەسى - گولوۆكين ارقىلى ءوزىن جارنامالاۋ. GGG كومانداسى قولدان كەلگەندى جاسادى، بىراق بوكس كەشىن وتكىزۋ ءالى دە شەشىلمەگەن ماسەلە، مۇنىڭ بارلىعى نەگىزىنەن قازاقستاندىق تاراپتىڭ ۇيىمداستىرۋ ماسەلەلەرىنە قاتىستى بولىپ وتىر. كاسىپقوي بوكستا ءار ءىستى ءوز ۋاقىتىندى ىستەۋ وتە ماڭىزدى. استانا بوكس الەمىنىڭ ءىرى وقيعالارى وتەتىن الەمدىك قالالارىڭ تىزىمىنە قازىر ەنبەسە، شىنىن ايتايىق، مۇنداي مۇمكىندىك تاياۋدا بولا قالمايدى. بولا ما ەكەن ءوزى؟!", - دەپ جازادى باسىلىم.

ال ءوز كەزەگىندە WBO تۇجىرىمى بويىنشا ورتا سالماقتا الەم چەمپيونى بيللي دجو سوندەرستىڭ پروموۋتەرى جەكپە-جەك وتكىزۋ بويىنشا گولوۆكيننىڭ كومانداسىنا دەدلاين قويىپ وتىر.

"بۇل جەكپە-جەكتىڭ شارتتارىنا قاتىستى ەشقانداي پروبلەمامىز جوق. بۇل گولوۆكينگە قانشالىقتى كەرەك بولىپ تۇرعانىنا بايلانىستى. ءبىز ەكىۇشتى جاعدايدا ۇزاق بولا المايمىز، ۋاقىت شەكتەۋى بولۋى كەرەك. ءبىز وسى اپتادا گولوۆكينمەن نە كەلىسىمگە كەلۋىمىز كەرەك، نە كەلىسىمگە كەلمەيمىز", - دەپ كەلتىرەدى ۋوررەننىڭ ءسوزىن Behind The Gloves.

اباي-اقپارات