قىرىعىز ەلى تاۋەلسىزدىگىن جاريالاپ جاتقان تۇستا مەملەكەتتەگى ءنومىرى ءبىرىنشى بيلىكتە بولعان اسقار اقاەۆ ايەل-بالا-شاعاسىمەن تۋعان وتانىنا قايتىپ ورالۋدى ويلاپ، ارمانداپ جۇرگەن كورىنەدى. الەۋمەتتىك جەلىلەردىڭ بىرىندەگى پاراقشاسىندا اسقار بايكە:  "مەنىڭ جانىم دا، قانىم دا - قىرعىز. اتا-انام مەن اتا-بابام قىرعىز حاندارى بولعان. نە سەبەپتى مەنىڭ تۋعان جەرىمە قايتىپ ورالۋعا قاقىم جوق؟ ارينە، كۇندەردىڭ ءبىر كۇنى قايتىپ ورالامىن. ازىرگە رەۆوليۋتسيالىق بيلىك مەنى ەلگە كىرگىزەر ەمەس. مەن ماڭگىلىككە قايتىپ ورالىپ، جامباسىمنىڭ تۋعان جەرگە تيگەنىن، تۋعان جەرىمدە جەرلەنگەنىمدى قالايمىن. قانشا دەگەنمەن، قىرعىزبىن عوي", - دەپ جازىپتى.

اتا-اناسى مەن اتا-باباسى قىرعىز جۇرتىنا  حاندىق بيلىگىن جۇرگىزگەن اسقار اقاەۆتىڭ ەلىنە قايتىپ كەلۋدى جان-جۇرەگىمەن قالايتىنىن بەرەمەت اقاەۆا (قىزى) دا راستاپ، قازتاگ-تىڭ تىلىشىسىنە بەرگەن سۇحباتىندا ايتىپ وتىر. ءبىر كەزدە ەلدىڭ ەركە توتايى اتانعان بەرمەتتىڭ سوزىنە سەنسەك، اقاەۆتار وتباسى ساياساتقا ارالاسپايتىن كورىنەدى. «ءبىز ەندى ساياساتقا ارالاسپايمىز، تەك قىرعىز مەملەكەتىنىڭ كۇشەيۋىنە، تاۋەلسىزدىگىنىڭ ىرگەسى بەرىك بولۋىنا بار كۇشىمىزدى سارپ ەتەمىز»، - دەيدى بەرمەت حانىم.

ەستەرىڭىزگە سالا كەتەيىك، اقاەۆتار 2005 جىلى ناۋرىز ايىندا قىرعىز رەسپۋليكاسىنىڭ بيلىگى مەن ەلدەن كەتۋگە ءماجبۇر بولعان ەدى. سول كەزدە قىرعىزستاندا «قىزعالداق توڭكەرىسى» جەڭىسكە جەتىپ، بيلىك باسىنا باكيەۆتەر كەلگەن بولاتىن. الايدا، قۇرمانبەك باكيەۆ پەن ونىڭ جاقىن تۋىستارى دا بيلىكتە ۇزاق وتىرا الماي، 2010 جىلى قازاقستان ارقىلى بەلارۋسسياعا قاشىپ كەتكەن-ءدى. ونىڭ دا تۇبىنە جەتكەن توڭكەرىسشىلەر ەدى. ايتپاقشى، ەكى ەكس-پرەزيدەنتكە دە «قىزعالداقتاردىڭ» تاراپىنان تاعىلعان ايىپ: ولاردىڭ ۇيەلمەنىمەن تۇتاس بيلىكتى بيلەپ-توستەپ، جەمقورلىققا بەلشەدەن باتقانى بولدى. اقاەۆ – قازىر ماسكەۋدە. ماسكەۋدەگى جوو-لاردىڭ بىرىندە قاتارداعى وقىتۋشى. باكيەۆ، بىلەتىندەردىڭ سوزىنە سەنسەك، بەلارۋسسياداعى قازاقستان ەلشىلىگىنىڭ عيماراتىندا تۇرىپ جاتقانعا ۇقسايدى. اقاەۆتىڭ الاتوودىڭ باۋىرىنا ورالىپ، عىلىم-بىلىممەن عانا شۇعىلدانىپ، تىنىش جۇرۋىنە قىرعىز ەلىنىڭ قالاي قارايتىنىن تاپ باسىپ ايتۋ قيىن. ال، باكيەۆتەردىڭ كەلۋىنە ايىر قالپاقتى اعايىن تۇتاس قارسى. ويتكەنى، باكيەۆتىڭ كەزىندە ەلدە ادام ۇرلاۋ، تۇتقىنداۋ، ساياسي وپپونەنتتەردىڭ كوزىن جويۋ سەكىلدى توتەنشە ءىس-قيمىلدار وتە كوپ بولدى.

Abai.kz