استانا. 12 قازان. قازتاگ – ايناگۇل بەكەەۆا. استانانىڭ №2 سارىارقا اۋداندىق سوتىنىڭ سۋدياسى گالينا بىلكيلوۆا ەكونوميكالىق قىلمىسپەن جانە سىبايلاس جەمقورلىقپەن كۇرەس اگەنتتىگىنىڭ بۇرىنعى دەنساۋلىق ساقتاۋ ءمينيسترى جاقسىلىق دوسقاليەۆتى قاماۋدا ۇستاۋ مەرزىمىن 2 ايعا ۇزارتۋ تۋرالى ءوتىنىشىن قاناعاتتاندىردى. بۇل تۋرالى قارجى پوليتسياسىنىڭ رەسمي وكىلى مۇرات جۇمانباي ءمالىم ەتتى.

«ۇستىمىزدەگى جىلدىڭ 11 قازانىندا قارجى پوليتسياسىنىڭ ورگاندارى دوسقاليەۆكە بيلىكتى اسىرا پايدالاندى جانە اسا ءىرى كولەمدە پارا الدى دەگەن ايىپ تاقتى. 12 قازاندا ايىپتالۋشىعا قاتىستى قاماۋعا الۋ تۇرىندە بۇلتارتپاۋ شاراسىن قولدانۋ تۋرالى ءوتىنىش ەنگىزىلدى، ونى پروكۋراتۋرا ورگاندارى تولىقتاي قولدادى. وسى كۇنى استانانىڭ سارىارقا اۋداندىق سوتى دوسقاليەۆتى قاماۋعا الۋعا سانكتسيا بەردى. ايىپتالۋشى استانانىڭ تەرگەۋ وقشاۋلاعىشىنا اۋىستىرىلادى»، - دەپ ءمالىم ەتتى ول سەيسەنبى كۇنى قازتاگ اگەنتتىگىنە.

بۇرىن حابارلانعانداي، قارجى پوليتسياسى بۇرىنعى دەنساۋلىق ساقتاۋ ءمينيسترىن 21 قىرقۇيەكتە ۇستاپ، سول كۇنى وعان قاتىستى قىزمەت بابىن اسىرا پايدالانۋ فاكتىسى بويىنشا قىلمىستىق ءىس قوزعالدى. ۆەدومستۆونىڭ مالىمەتىنشە، 25 قىرقۇيەكتە ج. دوسقاليەۆ كۇدىكتى رەتىندە استانا ءىىد-ءنىڭ ۋاقىتشا وقشاۋلاعىشىنا قامالدى، ول جەردە ونىڭ قان قىسىمى كوتەرىلىپ، 26 قازاندا ينسۋلت الدى دەپ ۇلتتىق عىلىمي-مەديتسينالىق ورتالىعىنا جەتكىزىلدى. دارىگەرلەر ونىڭ جاعدايىن وتە اۋىر دەپ باعالادى. وسىعان بايلانىستى 27 قىرقۇيەكتە سارىارقا سوتىنىڭ سۋدياسى قارجى پوليتسياسىنىڭ ج. دوسقاليەۆتى قاماۋعا الۋ تۋرالى ءوتىنىشىن قاناعاتتاندىرعان جوق.

كەيىن قارجى پوليتسياسى كۇدىكتى جاۋاپكەرشىلىكتەن قۇتىلۋ ماقساتىندا وتىرىك اۋىرعان بولىپ جاتقانى تۋرالى مالىمدەمە جاسادى.

ەكس-ءمينيستردىڭ پالاتاسىنا ورناتىلعان جاسىرىن بەينەكامەرامەن جاسالعان بەينەتاسپانىڭ نەگىزىندە اۋداندىق سوتتىڭ سۋدياسى ونى 10 تاۋلىككە قاماۋعا الۋعا سانكتسيا بەردى.

ج.دوسقاليەۆ 2005-2006 جىلدارى قازاق مەديتسينالىق اكادەمياسىنىڭ رەكتورى بولعاندا جول بەرگەن بۇزۋشىلىقتارى ءۇشىن ايىپتالىپ وتىر.

تەرگەۋ مالىمەتىنە سايكەس، ج. دوسقاليەۆ جەكە مۇددەلەرىن كوزدەپ، اكادەميانىڭ جەر تەلىمدەرىندە تۇرعىن ءۇي كەشەندەرىن سالۋ تۋرالى كەلىسىمشارتقا وتىرعان. قۇرىلىستى اياقتاعان كومپانيا ج. دوسقاليەۆتىڭ باس سەنىمحاتى بويىنشا پاتەرلەردى اكادەمياعا قاتىسى جوق ادامدارعا نارىقتىق باعامەن ساتقان. ج. دوسقاليەۆتىڭ ءوزى ەكى پاتەر مەن كوتتەدجگە يە بولعان. اتالعان جەر تەلىمدەرى اكادەميانىڭ وقىتۋشىلارىنا ارنالعان.

مۇنىڭ الدىندا قارجى پوليتسياسى ءمينيستردىڭ تاعى ءبىر زاڭسىز ارەكەتىن جاريالادى. 2009 جىلدىڭ قاراشاسىندا ج. دوسقاليەۆ سىيىمدىلىعى 240 ورىن، قۇنى ت8,5 ملرد بولاتىن جەدەل جاردەم عىلىمي-زەرتتەۋ ينستيتۋتىن ىسكە قوسۋعا بۇيرىق بەرگەن. نىساننىڭ قۇرىلىسى ساپاسىز ورىندالىپ، جابدىقتارى مەن جيھازدارى جەتىسپەگەن. وسىعان قاراماستان ول حالىقارالىق ستاندارتتارعا جاۋاپ بەرەدى دەپ ىسكە قوسىلعان.

سونداي-اق، قارجى پوليتسياسى ج. دوسقاليەۆكە قاتىستى اسا ءىرى كولەمدە پارا الۋ فاكتىسى بويىنشا تاعى ءبىر قىلمىستىق ءىس قوزعادى. ول پارا رەتىندە 6 پاتەر الىپ، بىرەۋىن جاقىن تۋىسىنىڭ اتىنا راسىمدەپ، بەسەۋىن ساتىپ جىبەرگەن.