جۇما, 29 ناۋرىز 2024
اتتەڭ... 6240 1 پىكىر 27 ءساۋىر, 2017 ساعات 09:10

دوسىم ساتپاەۆ زەينەتاقى قورىنىڭ جانىنان قۇرىلعان قوعامدىق كەڭەستەن كەتتى

بىرىڭعاي جيناقتاۋشى زەينەتاقى قورىنىڭ جانىنان قۇرىلعان قوعامدىق كەڭەستى باسقارعان ساياساتتانۋشى دوسىم ساتپاەۆ ورىننان كەتتى، - دەپ حابارلايدى 31 ارنا ءتىلشىسى جانار جولتاەۆا.

زەينەتاقى جۇيەسىنىڭ ولقىلىقتارىن تىزبەكتەپ، قوعامدىق تالقىلاۋ ۇيىمداستىرىپ، حالىق قاراجاتىنىڭ تاعدىرىنا جاۋاپتىلاردى ىزدەگەن توراعانىڭ قانداي سەبەپتەرمەن بۇنداي قادامعا باردى؟

زەينەتاقى قورى جانىنان قۇرىلعان قوعامدىق كەڭەسكە 3 اي بويى توراعالىق ەتكەن ساياساتتانۋشى شەندىلەرگە شەگەلەپ سۇراق قويىپ، ساۋال حاتتار جاۋدىرىپ، زەينەتاقى جۇيەسى جارالارىنىڭ بەتىن تىرمالاي باستاعان ەدى. دوسىم ساتپاەۆ "باسشىلار قوعامدىق كەڭەس قور جۇمىسىن رەتتەۋ ءۇشىن عانا قۇرىلعانىن ايتىپ، زەينەتاقى جۇيەسىنىڭ كەم-كەتىكتەرىنە ارالاسۋىمىزدى شەكتەمەك بولدى. سول سەبەپتەن ءوز ەركىممەن كەڭەستەن شىعىپ كەتتىم" - دەيدى.

دوسىم ساتپاەۆ، ساياساتتانۋشى تەلەارناعا بەرگەن سۇحباتىندا "بۇكىل اعزا ناۋقاس بولسا، ءبىر قولدى ەمدەگەننەن نە پايدا؟ ياعني زەينەتاقى جۇيەسى كۇيرەپ جاتقاندا، قوردىڭ ماسەلەلەرىمەن عانا شەكتەلۋ دۇرىس ەمەس. مەن ءۇشىن قور اقشاسىنا جاۋاپتى مەملەكەتتىك قۇرىلىمداردىڭ جۇمىس جاساۋ جۇيەسى قاعيداسىن جاساپ شىعارۋ ماڭىزدى ەدى. مىسالى ۇلتتىق بانك قانداي شارتتاردى نەگىزگە الا وتىرىپ ءبىزدىڭ جيناقتارىمىزدى بانكتەرگە ۇلەستىرەدى؟ ۇكىمەت ءبىزدىڭ جيناقتارىمىزدى قانداي كريتەريلەر بويىنشا نەندەي ءبىر مەملەكەتتىك جوبالاردى قارجىلاندىرۋعا بەرەدى؟ ونىڭ كەلىم-كەتىم پايداسى قانداي؟ بۇنى حالىق اشىق كورىپ وتىرۋ كەرەك" دەگەن.

دوسىم قوعامدىق كەڭەستەن كەتكەن جالعىز ادام ەمەس. ونىمەن بىرگە ەكس ۆيتسە-مينيستر راحىم وشاقباەۆ، ەكونوميست عالىم قۇسايىنوۆ پەن ساراپتاماشى بوتا جۇمانوۆا دا بىرگە كەتتى. الايدا زەينەتاقى قورىنىڭ باسقارما ءتورايىمى ءنۇربيبى ناۋرىزباەۆا ءبىردى-ەكىلى ادامنىڭ كەتكەنىن ۇلكەن ماسەلە سانامايتىنىن اشىق ايتتى.

ءنۇربيبى ناۋرىزباەۆا، «بىرىڭعاي جيناقتاۋشى زەينەتاقى قورى» اق باسقارماسىنىڭ ءتورايىمى:

- قازىرگى كەزدە 29 ادام بار. ەكى-ءۇش ادامنىڭ شىققانى مەنىڭ ويىمشا قوعامدىق كەڭەستىڭ جۇمىسقا كەرى اسەرىن تيگىزبەس. ءبىز وسى ۋاقىتقا دەيىن قالاي قوعامدىق كەڭەسپەن جۇمىس ىستەسەك، قولعابىس كورسەتسەك سول جاعدايىمىزدا ارى قاراي جۇمىس ىستەي بەرەمىز.

ساياساتتانۋشى تەمىر جولدى قولداۋ ءۇشىن زەينەتاقى قاراجاتىنان 50 ميلليارد تەڭگە ءبولۋ ماسەلەسىن كوتەرىپ، زەينەتاقى اقشاسىنا ەمدەلۋ، پاتەر الۋ ماقساتتارىنا بولشەكتەپ الۋ جونىندە ايتقان ەدى. ول ۇسىنىستاردىڭ ەندىگى تاعدىرى بەلگىسىز.

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3541