الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قاشقىن بانكير مۇحتار ءابىليازوۆ پەن ونىڭ سىبايلاستارىنا قاتىستى قىلمىستىق ءىستى قاراۋ ودان ءارى جالعاسۋدا، - دەپ حابارلايدى inform.kz.

سوتتىڭ بۇگىنگى وتىرىسىندا مۇحتار ءابىليازوۆتىڭ مۇناي-گاز جابدىعىنا قاتىستى استىرتىن ارەكەتتەرى اشكەرەلەنگەن وقيعا قارالدى. مۇحتار ءابىليازوۆ جەتەكشىلىك ەتكەن ۇيىمداسقان قىلمىستىق توپ مۇنايگاز جابدىعىن ساتىپ الۋعا قاتىستى قۋلىق-سۇمدىعىنىڭ ناتيجەسىندە بتا بانكتىڭ 8,6 ميللياردقا جۋىق اقشاسىن ۇرلاعان.

مەملەكەتتىك ايىپتاۋشىنىڭ ايتۋىنا قاراعاندا، بتا بانكتىڭ باسشىلىعى مۇناي-گاز جابدىعىن ساتىپ الۋدى جەلەۋ قىلىپ، «پروپەرتي اكۆيزيشن كومپانياسى» جاۋاپكەرشىلىگى شەكتەۋلى سەرىكتەستىگىنە زاڭسىز جولمەن ميللياردتاعان تەڭگەنى نەسيەگە بەرگەن. الايدا، كەيىنىرەك ءمالىم بولعانىنداي، «پروپەرتي اكۆيزيشن كومپانياسى» جشس بتا بانكتىڭ اقشاسىن جىمقىرۋ ءۇشىن قۇرىلعان مۇحتار ءابىليازوۆتىڭ «ءبىر كۇندىك» كومپانياسى ەكەنى انىقتالدى.

بۇعان قوسا، جالعان قارىز الۋشىنىڭ بارلىق قۇجاتتارى ءابىليازوۆتىڭ ءوزى تىكەلەي باقىلاۋدا ۇستاعان، وسىنداي استىرتىن ارەكەتتەردى جۇزەگە اسىرۋ ءۇشىن قۇرىلعان №6 كورپوراتيۆتىك بيزنەس باسقارماسىندا دايىندالىپ، ساقتالعان. ادەتتەگىدەي، جالعان كومپانياعا نەسيە بەرەتىن كەزدە ەشقانداي ساراپتاما جۇرگىزىلمەيدى جانە كەپىلگە مۇلىك قويىلمايدى.

«پروپەرتي اكۆيزيشن كومپانياسى» جشس-ءنىڭ نەسيەلىك قۇجاتتاماسىندا كومپانيانىڭ قارجىلىق احۋالى، نەسيە كوميتەتىنىڭ ساراپتاماسى، كەپىلگە قويىلاتىن مۇلىكتى قابىلداۋ تۋرالى اكتى سياقتى قۇجاتتارى جوق،- دەدى سوتتا پروكۋرور ەركىن بايماعامبەتوۆ. ياعني، نەسيە بەرەتىن كەزدە بانكتىڭ بارلىق بەكىتىلگەن نورمالارى بۇزىلعان. وعان قوسا، ساراپتامالىق ەكونوميكالىق تۇيىندەمە جانە نەسيەلىك تاۋەكەلدەردى باسقارۋعا قاتىستى تالداۋ جاسالماعان.

قىلمىستىق ءىستىڭ ماتەريالدارىنان بەلگىلى بولعانىنداي، ەكونوميكالىق قاۋىپسىزدىك باسقارماسىنىڭ جانە زاڭ باسقارماسىنىڭ ساراپتاماسى باستى نەسيەلىك كەلىسىمگە قول قويىلعاننان كەيىن شىعارىلعان.

«نەسيەگە بەرىلەتىن قاراجات دايىن بولعاننان كەيىن: نەسيەنى قارجىلاندىرۋعا ءوتىنىش پەن كومپانيا ديرەكتورىنىڭ اتىنان بانككە ارىزحات دايىندالادى. ارىزحاتتا 8,6 ميللياردقا جۋىق تەڭگەگە قارجىلاندىرۋ جەلىسىن اشۋعا ءوتىنىش بىلدىرىلگەن. سونىمەن قاتار، باس نەسيەلىك كەلىسىمگە قوسىمشا كەلىسىم جاسالىپ، وندا جابدىقتاردى كەپىلگە قويۋ تۋرالى شارت قوسا تىركەلەدى»، - دەپ اڭگىمەلەدى سوت وتىرىسىندا پروكۋرور.

باسقاشا ايتقاندا، بتا بانكتىڭ قىزمەتكەرلەرى نەسيەنى ءىس بىتكەننەن كەيىن الۋ ءۇشىن بارلىق قاجەتتى قۇجاتتاردى دەر كەزىندە دايىنداپ قويىپتى. وسىلايشا ءوز قولدارىمەن جاسالعان قىلمىستىڭ ءىزىن جاسىرۋعا ۇمتىلعان.

تۇپتەپ كەلگەندە، بتا بانكتىڭ باسشىلىعى مۇناي-گاز جابدىعىن ساتىپ الۋ ءۇشىن قاراجاتتىڭ بانككە قايتىپ كەلمەيتىنىن بىلە تۇرا، 2008 جىلى 30 قازاندا 8,6 ميلليارد تەڭگەگە قايتارىمسىز جانە قامتاماسىز ەتىلمەگەن سەنىمدەمەنى (اقشا ساقتاۋشىلارعا ساقتىق كاسساسىنان بەرىلەتىن اقشا قۇجاتى) ىسكە قوسادى. الايدا، تەرگەۋ بارىسىندا ءمالىم بولعانداي، اتالعان جابدىق ساتىپ الىنباعان. ال ونى ساتىپ الۋعا بولىنگەن قاراجات مۇحتار ءابىليازوۆتىڭ لاتۆيالىق بانكتەگى شوتىنا تۇسەدى. كەيىنىرەك، ول ۇرلاعان قارجىنى قولما-قول اقشاعا اينالدىرىپ، ءوزىنىڭ جەكە باسىنىڭ قاجەتتىلىكتەرىنە جۇمسايدى. بۇگىنگى كۇنگە دەيىن بەرىلگەن نەسيە بانككە قايتارىلماعان.

Abai.kz