12–13 مامىردا شىمكەنتتە كورمەگە قاتىسقان كاسىپكەر سالوحيددين زاينۋديننوۆتىڭ ايتۋىنشا، ساۋداگەرلەر ونىمدەرىن قازاقستاندا قىمباتقا ساتا الدى. "مىسالى، بىزدە 85 مىڭ سۋم (شامامەن جەتى مىڭ تەڭگە) تۇراتىن سۋۆەنيردى شىمكەنتتە 450 مىڭ سۋمعا ساتۋعا بولادى. شىمكەنتتە كورمە وتەتىنىن ەستىپ، ءبىز قاتتى قۋاندىق", - دەدى ول.

باعدارشام جانە جول بەلگىلەرىن ءوندىرۋشى سەرگەي تراحتەنبەرگ وزبەك پرەزيدەنتى شاۆكات ميرزياەۆتىڭ ساياساتى "قازاقستانمەن ساۋدا قاتىناسىن دامىتادى" دەپ ۇمىتتەنەدى.

بۇل ۋاقىتتا وڭتۇستىك قازاقستان وبلىسى كاسىپكەرلەر باسقارماسىنىڭ ءبولىم باسشىسى حيكماتۋللا رايىمبەكوۆ وزبەك تاۋارلارىنىڭ باعاسى ارزان ەكەنىن، بىراق ىشكى نارىقتى دا قورعاۋ قاجەتتىگىن مالىمدەدى. "وزبەكستاندىق تاۋارلاردى قازاقستاندىق نارىققا جىبەرسەك، وتاندىق تاۋار وندىرۋشىلەرگە قيىن بولادى. وزبەك تاۋارى - ارزان", - دەدى شەنەۋنىك.

بيىل ناۋرىزدا قازاقستان مەن وزبەكستان اراسىندا كەلىسىم قابىلدانعالى بەرى ەكى ەل اراسىنداعى تاۋار اينالىمى شامامەن 30 پايىزعا وسكەن.

اباي-اقپارات