26 مامىردا اقوردادا قر پرەزيدەنتى اكىمشىلىگىنىڭ باسشىسى ءا.جاقسىبەكوۆتىڭ توراعالىق ەتۋىمەن قازاقستان رەسپۋبليكاسى پرەزيدەنتىنىڭ جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ ەكىنشى وتىرىسى ءوتتى.

كوميسسيا مۇشەلەرى «رۋحاني جاڭعىرۋ» قوعامدىق سانانى جاڭعىرتۋ باعدارلاماسىن ىسكە اسىرۋ اۋقىمىندا ورتالىق جانە جەرگىلىكتى مەملەكەتتىك ورگاندار اتقارعان جۇمىستاردىڭ ناتيجەلەرىن تالقىلادى. سونىڭ ىشىندە،     قر پرەمەر-ءمينيسترى كەڭسەسى باسشىسىنىڭ، الماتى قالاسى مەن قاراعاندى وبلىسى اكىمدەرىنىڭ باياندامالارى تىڭدالدى.

سونداي-اق، اتقارىلعان جۇمىستىڭ نەگىزگى ناتيجەلەرى، تۇجىرىمدامالىق ۇستانىمدار جانە ودان ءارى قىزمەتتى ۇيىمداستىرۋدىڭ ناقتى شارالارى اياسىندا، لاتىن قارپىنە كوشۋ، «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق»، «تۋعان جەر»، «قازاقستاننىڭ كيەلى جەرلەرىنىڭ گەوگرافياسى»، «جاھانداعى زاماناۋي قازاقستاندىق مادەنيەت»، «قازاقستاننىڭ 100 جاڭا تۇلعاسى» جوبالارى بويىنشا، جۇمىس توپتارىنىڭ جەتەكشىلەرى ەسەپ بەردى.

تالقىلاۋ بارىسىندا «رۋحاني جاڭعىرۋ» باعدارلاماسىن، ونىڭ ىشىندە ارنايى جوبالاردى جۇزەگە اسىرۋ جونىندەگى ۇسىنىستار تۇجىرىمدالدى.

وتىرىسقا قاتىسۋشىلار باعدارلاماداعى مىندەتتەردى ءتيىمدى ىسكە اسىرۋ ءۇشىن جوبالىق ۇستانىمدى ەنگىزۋدىڭ ماڭىزدىلىعىن ەرەكشە اتاپ ءوتتى.

سونىمەن قاتار، ۇلتتىق كوميسسيا مۇشەلەرىنە «رۋحاني جاڭعىرۋ» باعدارلاماسى بويىنشا ازىرلەنگەن ادىستەمەلىك ماتەريالدار، سونىڭ ىشىندە باق-قا ارنالعان ادىستەمەلىك قۇرال، جوعارى وقۋ ورىندارىنا ارنالعان ادىستەمەلىك ۇسىنىمدار، اقپاراتتىق-ءتۇسىندىرۋ جۇمىسى بويىنشا قۇرال، باعدارلاما تۋرالى ماڭىزدى سۇراقتاردىڭ 20 جاۋابى ۇسىنىلدى.

وتىرىس قورىتىندىسى بويىنشا شەشىمدەر قابىلدانىپ، مەملەكەتتىك ورگاندار مەن جۇمىس توپتارىنىڭ جەتەكشىلەرىنە تاپسىرمالار بەرىلدى.

***

مەملەكەت باسشىسىنىڭ جارلىعىمەن قۇرىلعان ۇلتتىق كوميسسيا قوعامدىق سانانى جاڭعىرتۋ باعدارلاماسىن ىسكە اسىرۋدى جانە ەلدىڭ مادەني-گۋمانيتارلىق دامۋىن جان جاقتى قامتاماسىز ەتۋدى كوزدەيدى.

كوميسسيا قۇرامىنا بەلگىلى قوعام قايراتكەرلەرى، عالىمدار، جازۋشىلار، جۋرناليستەر، پارلامەنت دەپۋتاتتارى، ۇكىمەت مۇشەلەرى، وبلىستاردىڭ، استانا جانە الماتى قالالارىنىڭ اكىمدەرى، قازاقستان حالقى اسسامبلەياسىنىڭ مۇشەلەرى، ساياسي پارتيالاردىڭ وكىلدەرى كىرگەن.

ارايلىم مەلدەشوۆا

 اباي-اقپارات