«استانا ەكسپو -2017» كورمەسىنىڭ ارحيتەكتۋرالىق سيمۆولىنا اينالعان «نۇر الەم» نىسانى، الەم ەلدەرىنىڭ 115 پاۆيلونى، وعان قوسا امفيتەاتر، كونگرەسس ورتالىعى، مەديا ورتالىق، باسقا دا تولىپ جاتقان كەشەندەر... 174 گەكتار جەردى الىپ جاتقان حالىقارالىق كورمە اۋماعىندا ورنالاسقان نىساندار بۇل. كۇنىنە مىڭداعان ادامدى قارسى الۋ،تىركەۋدەن وتكىزىپ، بيلەت تەكسەرۋ،  حالىقارالىق جۇمىسشىلارعا باعدار، وسى سياقتى 16 فۋنكتسيونالدى باعىتتاعى جۇمىس. بۇل - قازاقستاننىڭ تۇپكىر-تۇپكىرىنەن جينالعان 4500 ەرىكتىنىڭ كۇندەلىكتى مىندەتى. ولاردىڭ ەكى مىڭنان استامى استانالىق بولسا، دەنى وڭىرلەردەن كەلىپتى.

ماسەلەن، قاراعاندىدان كەلگەن لاۋرا عانيەۆا ءۇشىن ەكسپو كورمەسى ءبىلىمىن جەتىلدىرۋگە مۇمكىندىك بەرىپتى. قاراعاندى مەملەكەتتىك ۋنيۆەرسيتەتىنىڭ 2- كۋرس ستۋدەنتى، بولاشاق اۋدارماشى لاۋرا شەت تىلدەرىن ءبىلۋىنىڭ ارقاسىندا جۇزدەگەن ستۋدەنتتىڭ ىشىنەن تاڭدالىنىپتى. «ەكسپو -2017» كورمەسىنە كەلىپ، مەن كۇندەلىكتى تەوريا جۇزىندە العان ءبىلىمىمدى ەندى تاجىريبە جۇزىندە پايدالانۋدامىن.  مەن بولاشاق اعىلشىن، قىتاي تىلدەرىنىڭ مامانى بولعاندىقتان، وسى جەرگە كەلگەلى تىلدىك ورتا قالىپتاستىرىپ الدىم. بىرقاتار شەتەل عالىمدارىمەن تانىسىپ، اڭگىمەلەستىم» دەيدى ول.

ال، كاۋسار بەيسەنباەۆا  ماماندىعىنا كورمەگە ەرىكتى بولۋى ايتارلىقتاي پايدا اكەلمەسە دە، ەسەسىنە تانىم كوكجيەگىن كەڭەيتىپ، جان-جاقتى دامۋىنا سەپتىگىن تيگىزگەنىن ايتادى. كورمەنىڭ اشىلعانىنا كوپ بولا قويماسا دا، كاۋسار پاۆيلونداردىڭ دەنىن ارالاپ، ءبىراز دۇنيەگە قانىق بولىپتى، الايدا، كوپ جاعدايدا، پاۆيلون ارالاپ، كونتسەرت تاماشالاۋعا ۋاقىتىمىز ازدىق ەتەدى، دەگەنمەن، وزىمە بەرىلگەن ءبىر اي مەرزىم ىشىندە بارلىعىن ارالاپ، كورىپ شىعامىن دەپ ماقسات قويدىم» دەيدى.  ءيا...ءۇش اۋىسىمدا جۇمىس ىستەيتىن ەرىكتىلەردىڭ كورمە تاماشالاپ جۇرۋگە قولدارى تيە بەرمەيتىنىنە كوزىمىز جەتتى. الايدا، قاربالاسقا تولى كۇندەرى تەك قوناق قارسى الىپ، قىزمەت كورسەتۋمەن عانا ەمەس، سونىمەن قاتار الەۋمەتتىك جەلىنىڭ بەلسەندى پايدالانۋشىسى اسەت قايراتۇلى  جەكە پاراقشالارىندا ءوتىپ جاتقان شارالار تۋرالى اسەرلەرى مەن سۋرەتتەرىن جاريالاپ وتىرادى ەكەن. ال، باستىسى، قاراعاندىلىق ستۋدەنت ءوزىنىڭ الداعى جىلى جازاتىن عىلىمي جوباسىنىڭ تاقىرىبىن ەكسپو كورمەسىن تاماشالاعاننان كەيىن تاڭداپ، وعان قاجەت ماتەريالداردى دا جيناۋعا ۇلگەرىپ جاتقانىن ايتىپ اعىنان جارىلدى.

قازاقستاندىقتاردان بولەك كورمەدە قىزمەت كورسەتەتىن ەرىكتىلەر قاتارىندا وزبەكستان، يسپانيا، فرانتسيا، كانادا، فرانتسيا مەن اقش-تان  كەلەتىندەردىڭ قاراسى قالىڭ ەكەن. اي سايىن استاناعا الەمنىڭ قىرىققا جۋىق ەلىنەن ەلۋدەن استام ەرىكتى كەلەتىن كورىنەدى.

ايتا كەتەرلىگى، قازاقستاندىق ەرىكتىلەردىڭ دەنى جاستار، ونىڭ ىشىندە ستۋدەنتتەر. الايدا، ەلىمىز ءۇشىن ايتۋلى شاراعا قاتىسىپ، قىزمەت كورسەتەمىز دەگەندەر قاتارىندا ەرەسەكتەر، ەگدە تارتقاندار  دا كوپ ەكەن. «شەت ءتىلىن ءبىلۋ باستى تالاپتاردىڭ ءبىرى بولعاندىقتان، ۇمىتكەرلەردىڭ دەنى سىناقتان وتپەدى»- دەيدى ۇيىمداستىرۋشىلار.  دەسە دە، قالىڭ جاستىڭ اراسىندا بەلسەندى جۇمىس ىستەپ جۇرگەن، اعىلشىن ءتىلىن بىلەتىن زەينەت جاسىنداعى كىسىلەردى دە  كەزدەستىرۋگە بولادى.

ۇيىمداستىرۋشىلار «ەكسپو 2017» كورمەسىنىڭ ەرىكتىلەرىنە قاجەت جاعدايدىڭ بارلىعى جاسالعانىن ايتادى. تاماقتاندىرۋ، ترانسفەر، ارنايى جاتاقحانا، ۇيالى بايلانىس شىعىندارى، ەكسكۋرسيا – بارلىق ەرىكتى قامتامامىز ەتىلگەن.  كەيبىرى ءتىپتى، ەڭبەكاقى الادى. ول جۇمىس ناتيجەسىنىڭ كورسەتكىشىنە بايلانىستى. نازارباەۆ ۋنيۆەرسيتەتىنىڭ 1-ءشى كۋرسىن بيىل تامامداعان  ايدانا  بيلەت تەكسەرۋ بولىمىندە ىستەيدى. باسىندا ەرىكتى رەتىندە كەلگەن ول اعىلشىن ءتىلىن جەتىك ءبىلۋىنىڭ ارقاسىندا بيلەت تەكسەرۋشى ەتىپ الىنىپتى، ءۇش اي ۋاقىتتا تاپقان ناپاقام وقۋىما قاجەت جابدىقتارىمنىڭ شىعىنىن وتەيتىن بولدى دەپ قۋاندى ول.

ەرىكتىلەردىڭ ارقايسىسى ءتۇرلى باعىتتا مىندەتتەرىن اتقارۋدا. ءبىرى: قوناق قارسى الىپ جاتسا، ءبىرى بيلەت تەكسەرەدى، ءبىرى كورمەنى ارالاتسا، ءبىرى مەديتسينالىق جاردەم كورسەتەدى، ءبىرى ويىن-ساۋىق شارالارىنا جاۋاپتى بولسا، ءبىرى اۋدارماشى. بۇل ءتىزىم وسىلايشا جالعاسىپ كەتە بەرەدى. الايدا، ولاردى بىرىكتىرەتىن ءبىر مۇددە. ايتۋلارىنشا، كورمەنىڭ ءساتتى، جوعارى دەڭگەيدە وتۋىنە تەڭىزگە تامعان تامشىداي  ءوز ۇلەستەرىن قوسۋ. «ءبىز كورسەتكەن قىزمەت پەن قۇرمەتتەن ءبىزدىڭ ەل تۋرالى ەستەلىك قالادى» دەيدى ولار.

زارينا ادىلبەك

Abai.kz