جەكسەنبى, 9 تامىز 2020
COVID-19 قازاقستاندا. جۇقتىرعاندار — 97829. جازىلعاندار — 71609. قايتىس بولعاندار — 1058
قۇيىلسىن كوشىڭ 4284 23 پىكىر 23 ماۋسىم, 2017 ساعات 13:42

قازىر قيمىلداماساق، قازاقتى اكەلۋ قيىن بولادى!..

«ورالماندارىڭدى ۇرعانى بار!» ماماشوۆتار وتىرعاندا، سەڭ قوزعالمايدى…

---------------------------------------------------------------------------------------------------------

«اسار» قالاشىعى – قازاقتىڭ باسىن قالاي قوسۋدىڭ جارقىن جولى!

---------------------------------------------------------------------------------------------------------

ءارى كاسىپكەرلىكتىڭ تاپتىرماس ۇلگىسى

…1960-جىلداردىڭ ورتاسىندا تاۋەلسىزدىك العان الجيردەگى 6 ملن.فرانتسۋز وتارشىلارىنىڭ جاعدايى قيىنداي ءتۇستى. سول كەزدە پرەزيدەنت شارل دە گولل ىسكەر، ءبىلىمدى، ۇلتشىل كادرلارىنىڭ بىرىنە (اتى-ءجونى ەسمە تۇسپەي تۇر) 2 جىلدىڭ ىشىندە 6 ملن.فرانتسۋزدى كوشىرىپ اكەلۋ، جۇمىس جانە باسپانامەن قامتاماسىز ەتۋ باعدارلاماسىن جاساۋدى تاپسىرادى. باعدارلاما جاساپ اكەلگەن جىگىت ءوزىن پرەمەر-ءمينيستردىڭ ورىنباسارى ەتىپ تاعايىنداۋىن جانە ونىڭ باسپانا مەن كولىك سۇراعان وتىنىشتەرى توقتاۋسىز شەشىلەتىن بولۋىن تالاپ ەتەدى. دە گولل ونىڭ سۇراعان بار قۇزىرەتىن بەرەدى. 2 جىل ەمەس، تۋرا 1,5 جىل وتكەندە ۆيتسە-پرەمەر «تاپسىرماڭىز ورىندالدى، مەنى قىزمەتتەن بوساتۋىڭىزدى وتىنەم» دەپ راپورت بەرەدى…

ءبىز دە سىرتتاعى تارىداي شاشىلعان 5 ميلليون قازاقتىڭ ەڭ بولماسا 5 جىلدا كوشىرىپ اكەلە الامىز با؟ وراز جاندوسوۆ 2004 جىلى  وسى جولدار اۆتورىنا بەرگەن سۇحباتىندا: «زا 5 لەت 5 ميلليونوۆ؟ دليا پراۆيتەلستۆا ەتو نە ۆوپروس. ليش بى بىلا نا تو پوليتيچەسكايا ۆوليا رۋكوۆودستۆا گوسۋدارستۆا…» دەپ جاۋاپ بەرگەن ەدى…

وزبەكستاندا قانى ەشكىممەن ارالاسپاعان 100 پايىز قازاق 3 ملن. باۋىرلارىمىز بار.  بىراق، قۇجاتتارى 100 پايىز وزبەك بولىپ جازىلعان. سالت-ءداستۇرى – قازاقتىكى، ءتىلدىڭ 70-80-پايىزى – وزبەكتىكى. مەكتەپتە ءبىلىمدى وزبەكشە العان، ۇيدە – قازاقشا سويلەسەدى. رۋى – قازاقتىڭ رۋى، بىراق، ۇلتىم «وزبەك» دەيدى. مىنە، ولاردىڭ قانشاسىن اكەلۋگە بولادى، ول بەلگىسىز…

ال، قۇجاتى دا قازاق، ءتىلى دە قازاق، «قازاقستانعا جەتسەم!» دەپ قۇلشىنىپ، ۇشارعا قاناتى بولماي وتىرعان قانداستارىمىزدىڭ سانى – 2 ملن. ادام. قىتايدا رەسمي 1,3ملن.، بەيرەسمي 3 ملن. قازاق بار. موڭعوليا مەن رەسەيدەگىنى قوسساق، وسى ءۇش ەلدەن ەڭ كەمى 3 ملن.قازاق كەلەدى. سوندا بارلىعىن قوسقاندا – 5 ملن.ادام بولادى.

قالاي اكەلەمىز؟

             1-باعىت: سول مەملەكەتتەردەگى ەلدى سوڭىنا ەرتىپ كەلە الاتىن ەرلەردى تارتۋ، ولارمەن ۇگىت-ناسيحات جۇمىسىن جۇرگىزۋ.

2-باعىت. وزبەكستانداعى قازاق جاستارى جوو-نا تۇسە المايدى، ويتكەنى قازاق مەكتەپتەرى كيريلليتسادا قالعان. سولارعا 2-5 پايىز كۆوتا ءبولۋ كەرەك. باسقالارىن بۇگىنگى كوللەدجدەردە  (بۇرىنعى سپتۋ، گپتۋ)  6 ايلىق يا 1 جىلدىق كۋرس تۇرىندە بولسا دا وقىتىپ، ەرتەرەك كاسىبي مامان ەتىپ دايارلاپ شىعارۋ قاجەت. ونسىز دا ول جاقتاعى ءار وتباسى ەڭ بولماعاندا ءبىر بالاسىن وسى جاققا جىبەرىپ، «پلاتسدارم» جاساپ جاتىر. بىراق، ولار قر ازاماتى بولماعان سوڭ، ءتۇرلى قيىنشىلىققا تاپ بولۋدا. شەكارادا ولارعا «باۋىرىم، قوش كەلدىڭ!» دەگەن ءبىر اۋىز جىلى ءسوزىمىزدىڭ ءوزى نەگە تۇرادى؟! ونىڭ ورنىنا «ءوي، وزبەك!» دەگەن ءسوزدى ەسىتكەن ونىڭ، تۋرا بىرەۋ وڭمەنىنەن تەپكەندەي بولاتىنى ءسوزسىز… قانشا ايتقاندا ول جاقتىڭ قازاعى بۇل جاققا كەلۋدى اڭساپ تۇرادى.ول جاقتا ەل رۋعا بولىنبەيدى. ولاردىڭ پاتريوتتىق سەزىمى بىزدىكىنەن الدەقايدا كۇشتى، ولار قازاقستاننىڭ تيتتەي دە ءبىر جەتىستىگىنە ەرەكشە ءماز بولادى، بوكسەرلارىمىز جەڭسە، كادىمگىدەي توي جاسايدى!..

مىنە، وسى 2 باعىتتا قاتار جۇمىس ىستەۋ قاجەت. بارىنەن بۇرىن قازاق ەلىنىڭ يدەولوگياسىنىڭ بەتىن وسىعان جۇمىس ىستەۋگە بۇرۋعا ءتيىسپىز. ولار كەلسە – ەلدە قازاق كوبەيەدى. سان – ساپاعا اينالادى. «قازاققا قازاقتىڭ قوسىلعانى بىزگە نە بەرەدى؟» دەگەن ماسەلەنى اشىپ ايتۋىمىز، كورمەيتىن، كورگىسى كەلمەيتىندەردىڭ كوزىنە شۇقىپ كورسەتۋىمىز قاجەت. يدەولوگيا تۇزەلسە، بۇل جاقتاعى قازاقتىڭ دا سىرتقى قازاققا دەگەن، بيلىكتەگى ۇيرەنشىكتى كومفورت ومىرىنەن ايرىلىپ قالماۋ ءۇشىن عانا ۇلت مۇددەسىن ساتىپ وتىرعان ورىسشىلداردىڭ تاپسىرماسىن ورىنداۋ سالدارىنان پايدا بولعان تەرىس كوزقاراسى كۇرت وڭالاتىنى دا ءسوزسىز!

شىمكەنتتەگى 20 مىڭعا جۋىق تۇرعىنى بار «اسار» شاعىن اۋدانىندا (بۇل ءوز الدىنا كەرەمەت قالاشىق) مەملەكەتكە قايتپايتىن مەكتەپ، بالا باقشا، جول سەكىلدى ءتۇرلى شىعىن سوماسى 5 ملرد. تەڭگەنى قۇرايدى. بىراق، سول «اساردى» سالعان، نەگىزىنەن كوشىپ كەلگەن ورالمانداردان قۇرالعان «اق ورداسى» كومپانياسىنىڭ  (پرەزيدەنتى يبادۋللا قالىبەكوۆ) ءوزى مەملەكەتكە 10 جىلدا 6 ملد.تەڭگە سالىق تولەپ قويدى!.. كومپانيادا 3 مىڭ جۇمىس ورنى بار بولسا، ونىڭ كەم دەگەندە ۇشتەن ءبىرى جەرگىلىكتى تۇرعىندار. ودان بولەك  «اسارداعى» 20 مىڭ حالىق تاعى سالىق تولەپ جاتىر عوي! سالىقتان بولەك قانشا ەلگە پايدا، تابىس اكەلىپ جاتىر. وسىنى ناسيحاتتاۋ جوق بىزدە…   

ياعني، سىرت قازاقتى اكەلگەندە تاباتىن پايدامىز بەن ولاردى اكەلمەگەندە ۇتىلاتىن جاعىمىزدى سالىستىرۋ كەرەك. ۇتىلعاندا ەشقانداي باعامەن ولشەۋگە بولمايتىن ەڭ قىمبات قۇندىلىقتان – قازاقتىڭ تۇتاس ءبىر بولىگىنەن ايرىلاتىنىمىزدى ءتۇسىندىرۋ كەرەك.

بىزدە سول وزبەكستاننان كەلگەن «گاستاربايتەرلەر» از با؟ سولاردىڭ ورنىنا ءوز باۋىرلارىمىزدى اكەلۋگە بىزگە كىم كەدەرگى، نە بوگەت؟ ۇلكەن كومپانيالار، كورپوراتسيالار جالعا بەرەتىن جۇزدەگەن، مىڭداعان پاتەرلەردى نەگە سالمايدى

جۇمىس پەن باسپانا

جالپى، ادام بالاسىنا ءومىر ءسۇرۋ ءۇشىن ەڭ ءبىرىنشى كەرەگى ەكى-اق نارسە – قولىنا جۇمىس پەن باسىنا باسپانا!

قازاقستاندا بۇل ماسەلەنى 4 باعىتتا بىلاي شەشۋگە بولادى.

  1. وڭتۇستىكتە – باۋ-باقشا، كوكونىس باعىتى. كىشكەنە پاتەر + جىلىجاي.

بىزگە 180 ملن.تۇرعىنى بار تمد بازارى اشىق. «اساردا» كورەيالىق ليتسەنزيامەن «جىلىجاي» جاساپ شىعاراتىن زاۋىت سالىندى. اۋىل شارۋاشىلىق ءونىمىن ساقتايتىن قويما سالىندى. «اسار» تۇرعىندارى 3 سوتىق جەردەن جىلىنا ورتا ەسەپپەن 10 مىڭ دوللار تاۋىپ وتىر.

2-باعىت. ورتالىق قازاقستان. استانا، كوكشەتاۋ، قوستاناي، سقو، پاۆلودار. قۇنارلى توپىراق. ءسابىز، كارتوپ ەگۋگە تاپتىرمايتىن ولكە. ول ءونىمدى تەك رەسەيگە قاراي ەمەس، بەرى قاراي دا، ورتالىق ازيا ەلدەرىنە دە ساتۋعا بولادى. (ال، ءبىز ازىرشە ماسقارا بولىپ، پاكىستاننان كارتوپ تاسىپ جاتىرمىز!..) ارقادا وسىرىلەتىن كارتوپ پەن ءسابىزدىڭ وزىندىك قۇنى وتە ارزان. سول وڭىرگە كوشىپ بارعان ءار وتباسىعا 2 گا جەر بەرۋ كەرەك. ءبىر اۋىلداعى 1000 وتباسىعا – 2000 گا جەر. ماشينو-تراكتور پاركىن قۇرىپ،  جەر جىرتۋدى، ەگۋ مەن جيناۋدى سونىڭ موينىنا ارتىپ، كارتوپ پەن ءسابىز ۇرىعىن اۆانسپەن تەگىن جەتكىزىپ بەرىپ (كەيىن ءونىمنىڭ باعاسىنان ۇستاپ قالىپ), قاسىنا قىستاي ساقتايتىن قويمانى سالىپ بەرسەك، سونىڭ ارقاسىندا 2 گەكتاردان ءار وتباسى 30-40 مىڭ دوللار تابۋىنا بولادى.

3-باعىت. شىعىس قازاقستان. مال شارۋاشىلىعىنا سۇرانىپ تۇرعان ايماق.

ەت باعىتى. ەۆروستاندارتقا ساي، سانيتاريالىق تالاپقا ساي ەتىپ، ەت كومبيناتىن سالساق، سونىڭ اينالاسىنداعى 50-100-200 مىڭ وتباسى ەت وندىرۋگە ماماندانادى.  ءار ۇيگە 10-20-30-40 باس كىشكەنتاي بۇزاۋ اۆانسقا بەرىلەدى. جارتى جىل، 1 جىل، 2 جىلدان كەيىن ولاردى ەت كومبيناتقا وتكىزەسىڭ. كومبينات سول كەزدە بۇزاۋ مەن جەم-ءشوپتىڭ اقشاسىن ۇستاپ قالادى. 20 باس بۇقادان كەمى 10 مىڭ دوللار تابىس تاباسىڭ.

ياعني، ءبىر وقپەن ەكى قوياندى اتىپ الۋعا بولادى، بۇل جۇيە ءارى حالىققا جۇمىس كوزى، ءارى مەملەكەتكە ەكسپورت كوزى.حالىقتىڭ قامىن ءسال دە بولسا ءسوز جۇزىندە ەمەس، ءىس جۇزىندە ويلاعان كەڭەس وكىمەتى كەزىندە ەتتى 2,5 سومنان ساتىپ الىپ، حالىققا 1,90 سومنان ساتاتىن. نەگە؟ اقىماق پا؟ ەسەپ بىلمەي مە؟ جوق، ەتتى ارزان ساتقانمەن قىمبات باعامەن ەكسپورتقا كەتەتىن ءمۇيىز، تۇياق، ىشەك، تەرى، قان – بۇنىڭ ءبارى ەتتىڭ شىعىنىن ەسەلەپ جاباتىن. ءتىپتى،  ىشەك-قارىنداعى بوقتان تىڭايتقىش جاسالاتىن.

ءسۇت باعىتى. بۇل جەردە ءسۇت زاۋىتىمەن كەلىسىم-شارت جاسالادى. «مولوكوۆوز» ءسۇت جينايدى. ءسۇت زاۋىتى نەشە ءتۇرلى ءونىم شىعارادى. باسىمدىق – قازاقتىڭ ۇلتتىق تاعامدارىنا بەرىلىپ، ولار ەكسپورتقا جىبەرىلەدى. ءبىز ءازىر بيداي، تارى، ارپا، جۇگەرىگە مينەرالدىق تىڭايتقىشتاردى (كالي، فوسفور، ازوت) الەمدىك دەڭگەيدەن كەمى ەكى ەسە از بەرەمىز. ەسەسىنە ەكولوگيالىق تازا تاماق شىعارۋدان اينىماساق، ونىڭ ۇستىنە ميلليونداعان مالدىڭ قيىن ورگانيكالىق تابيعي تىڭايتقىش ەتىپ پايدالانۋدى ءتيىستى جولعا قويىپ الساق، ەۆروپالىقتار ەتتىڭ، ءسۇتتىڭ باعاسى 2-3 ەسە قىمبات ەكەن دەپ ويلانىپ جاتپايدى.

4-باعىت. باتىس قازاقستان. وندا تۇيە شارۋاشىلىعى، مال شارۋاشىلىعى + جىلىجاي. سەبەبى، كليماتى ونشا سۋىق ەمەس ءارى تابيعي گاز ارزان. رەسەي نارىعى جاقىن. ءوز ەلىمىزدەن دە، رەسەيدەن دە وزبەك پەن ءازىربايجان تاۋارىن ىعىستىرىپ شىعارۋ – ءوز قولىمىزدا!

ماڭعىستاۋ – الەمدىك شۇبات ورتالىعىنا اينالا الادى!

ءبىز تەرىسكەي ولكەلەرگە ورالماندارمەن قوسا ىشكى ميگرانتتاردى دا مىندەتتى تۇردە قوسىپ ورنالاستىرۋعا ءتيىستىمىز.

تۇيە جەيتىن ءشوپتى مىڭداعان گەكتارعا ەگۋگە بولادى.

«قازاقتىڭ اق باس سيىرى»، «قىزىل سيىر» تۇقىمىن قايتادان قولعا الۋعا بولادى.

مال باسىن بارىنشا ءتيىمدى پايدالانۋدى ۇيرەنۋ – الدىمىزدا تۇرعان ۇلكەن ءىس.

ەكولوگيالىق تازا ەت پەن ءسۇت ونىمدەرى – قازاقتىڭ برەندىنە اينالادى! ميللونداعان مالدىڭ تەزەگىنىڭ ءاربىر كيلوگرامىنىڭ ءوزى بريكەت تۇرىندە جاسالىپ وتىن (مىسالى، قوي قۇمالاعىنىڭ قىزۋى كومىردەن ارتىق ەكەنىن اۋىلداعىلار جاقسى بىلەدى!) مەن  ورگانيكالىق تىڭايتقىشقا اينالۋى ءتيىس.

بوس قالعان اۋىلدارعا قايتادان جان بىتەدى. وتاندىق عالىمدار مەن ونەرتاپقىشتاردىڭ جاڭالىقتارىن قولدانا وتىرىپ، كۇن مەن جەلدىڭ قۋاتى ءۇيدىڭ جارىعى مەن تەلەديدارىن قوسۋعا تولىعىمەن جەتەدى…

قارجىلاندىرۋ – قايتاتىن تابىس كوزى بولعاندىقتان مەملەكەت ءوزىنىڭ قۇيعان اقشاسىن  1 جىلدا-اق قايتارىپ الا باستايدى. سوندىقتان، وعان العاشقى قولداۋ كورسەتۋدى مەملەكەت تولىق موينىنا الۋى ءتيىس! قارجىنى قايدان الامىز؟

  1. ميللياردتاعان تەڭگە يگەرىلمەي جاتىر.
  2. ميللياردتاعان تەڭگە ءتۇرلى شەتەلدىك كەڭەسشىلەرگە («سامقۇرىق-قازىنا» – 27 ملرد.تەڭگە) جالاقى تۇرىندە «راسپيل» جاسالىپ، جەلگە ۇشىپ جاتىر.
  3. جىل سايىنعى ەكونوميكالىق جانە مەديافورۋمداردىڭ، دىنارالىق ءسامميتتىڭ قارجىسى.
  4. «التىن زاەم» سەكىلدى قۇندى قاعازدار شىعارۋ.

ەڭ باستىسى – كوررۋپتسيانى جويۋ. وسى باعدارلامانى ىسكە اسىرۋعا جاۋاپتى تىكەلەي قر پرەزيدەنتى بولۋى جانە ول جىلىنا باعدارلامانىڭ ورىندالۋ بارىسىن 2 رەت قاراپ وتىرۋى ءتيىس. سەبەبى، بيۋروكراتيا وزىنە تىكەلەي ماتەريالدىق پايداسىن كورىپ تۇرماسا -جاۋاپكەرشىلىكتەن  قاشۋ، قول قويماۋدى ۇردىسكە اينالدىرىپ بارادى.

وزبەكستاندا جىلىنا 8 ملن.ادام سىرتتا تابىس تاۋىپ ءجۇر. ءدال كازىر، ميرزيەەۆ تۇرعاندا بۇل جوبانى ىسكە اسىرىپ قالۋعا بولادى. 5 جىل، 10 جىلدان كەيىن دۇنيە وزگەرىپ، ساياسات وزگەرىپ كەتۋى مۇمكىن…

«اسارداعى» «مودۋل» زاۋىتى اعاشتان «ۆرەميانكا» – قورجىن ءۇي قۇراستىرىپ بەرەدى.  ءۇي-جايدى تۇرعىندارعا، كەيىن ساتىپ الا الاتىن ەتىپ، ەگەر جالداۋ اقىسىن ۋاقتىلى قۇيماسا، ۇيىنەن ايرىلىپ قالاتىن ەتىپ  5-10 جىلعا جالعا بەرۋگە بولادى.  ارۋ ارقانىڭ تابيعاتىن ءبىر-ەكى جىل وندا تۇرعان ادامنىڭ كوزى قيىپ كەتە قويۋى قيىن… «اساردىڭ» ءوزىنىڭ ەڭ كەمى 500 تۇرعىنى باسقا وڭىرلەردە تابىس تاۋىپ ءجۇر. سقو-دا تۇراتىن بۇرىنعى وزبەكستاندىق ازاماتتار شىمكەنتكە، «اساردىڭ» وزىنە دە قايتقىسى كەلمەيدى.

باعدارلاما جۇيە رەتىندە دۇرىس جاسالۋى، ونىڭ باسشىسى تىكەلەي قر پرەزيدەنتىنە باعىنىشتى بولۋى ءتيىس.

سولتۇستىكتە مەملەكەت قاجەتتىلىگىنە دەپ جەردى الۋعا بولادى، بۇل ماسەلەنى دە شەشۋ قيىن ەمەس. ميني-تسەحتار اشىپ تاستاۋ قاجەت، ءار اۋىل ءبىر كاسىپتى يگەرەتىن بولسىن. بۇنىڭ ۇلگىسىن 2-دۇنيەجۇزىلىك سوعىستان قيراي جەڭىلگەن، 2 بىردەي قالاسىنا امەريكالىقتار  اتوم بومباسىن تاستاعان، جەڭىمپازدارعا ميللياردتاعان دوللار كونتريبۋتسيا تولەگەن جاپون ەلى كورسەتكەن بولاتىن. ولاردان كورىپ، كەيىنىرەك كارىستەر، كۇنى كەشە قىتايلار سول ۇلگىمەن باستادى دامۋدى. ءبىزدىڭ اۋىل شارۋاشىلىعىمىزدىڭ  – مال مەن جەردىڭ وڭدەلگەن ونىمدەرى – مىنە، وسىلار ءبىزدى وركەنيەت كوشىنە ىلەستىرەتىن، پويىزدىڭ سوڭعى ۇزەڭگىسىنە اياق ارتتىراتىن مۇمكىندىگىمىز. مۇمكىن، سوڭعى مۇمكىندىگىمىز…

سىرتتاعى قازاق كەلۋگە ءالى قۇشتار! بىراق، ول قۇشتارلىقتىڭ وتى جىل ساناپ باسەڭدەپ كەلەدى. مىنە، ەڭ قورقىنىشتىسى دا وسى!  

سەبەبى، 15 جىل بۇرىنعى قىتاي قازاعى مەن بۇگىنگى قازاقتىڭ ايىرماشىلىعى جەر مەن كوكتەي! ول كەزدە ءسىز شىڭجاڭعا بارساڭىز ءوزىڭىزدى قازاقستاندا جۇرگەندەي سەزىنەتىن ەدىڭىز. كازىر ول زامان كوزدەن بۇلبۇل ۇشقان. وتباسىندا بالاسى (جاس بۋىن) مەن اكە-شەشەسى (ورتا بۋىن) ءبىر-بىرىمەن قىتايشا سويلەسەدى! سەبەبى، بۇرىنعى قازاق مەكتەبىنىڭ بارىندە قازاق ءتىلى مەن ادەبيەتىنەن باسقا ءپان اتاۋلى تۇگەل قىتاي تىلىنەن كوشىرىلگەن سوڭعى 9 جىل ىشىندە قازاقشا بىلمەيتىن، ەسەسىنە قىتايشانى جەتىك بىلەتىن، سول تىلدە سويلەۋگە بەيىم ۇرپاق ءوسىپ شىقتى. بۇل ۇرپاقتىڭ اتا-اناسى قازاقشا دا، قىتايشا دا بىلەدى، ال، ولاردىڭ وزدەرىنىڭ اكە-شەشەسى قىتايشا بىلمەيتىن! ەندى قازاقشا بىلمەيتىن، تەك قىتايشا بىلەتىن ۇرپاق ءوسىپ كەلەدى.  بىز دە قازاقستاندا وتىرساق تا مۇنداي ماڭگۇرتتەردى تاربيەلەۋدى ءالى جالعاستىرىپ كەلەمىز، ايىرماشىلىق بىزدە قىتايشانىڭ ورنىن ورىس ءتىلى يەلەنىپ وتىرعانىندا عانا. ال، بالانىڭ قاي ۇلتتىڭ تىلىندە ءبىلىم مەن تاربيە السا، ول ۇلتتىڭ وكىلى بولىپ شىعاتىنى – ادامزات تاريحىندا دالەلدەۋدى قاجەت ەتپەيتىن اكسيوماعا اينالعان.

«25 جىلدا 1 ميلليون قازاق كەلدى» دەپ بوركىمىز قازانداي بولادى. 1 ميلليون بۇدان ون جىل بۇرىن كەلىپ قويعان-تۇعىن. وتكەن جىلى 32 مىڭ ادام عانا كەلدى. ازىرگە تەك اۋزىمىزبەن وراق ورۋدان اسا الماي، بەس جىلدا ءبىر رەت ەشقانداي ماسەلە شەشپەيتىن قۇرىلتاي وتكىزىپ، توي تويلاۋدان اسا الماي وتىرمىز.

«ورالماندارىڭدى ۇرعانىم بار!» دەيتىن ماماشوۆتار باسشىلىقتا وتىرعاندا، سەڭ ورنىنان ەشقاشان قوزعالمايدى.

قازىر قارقىندى قيمىلداپ قالماساق، ەندى 25 جىل ەمەس، 15 جىلدان كەيىن قىتاي مەن وزبەكستاننان التىن بەرەم دەسەڭ دە قازاقتى اكەلۋ قيىن بولادى. ەۋروپانىڭ، ول تۇگىلى تۇركيانىڭ قازاعى كەلمەي وتىرعان جوق پا! سولتۇستىك قازاقستاندا رەسەيدىڭ مەملەكەتتىك مەيرامدارى ءدال رەسەيدەگىدەي تويلانادى! تەمىر جولى ماسكەۋدىڭ ۋاقىتىمەن جۇرەدى. قىرىم مەن دونباسستى كورىپ تۇرىپ، ۇلى دالانىڭ تەرىسكەيىن، شىعىسى مەن باتىسىن قازاقىلاندىرماساق، ايرىلىپ قالۋىمىز ءبىر كۇندە!

وسى قاتەردى كورمەسەك، ەرتەڭ كىمگە وكپەلەي الامىز؟..

قارامان نارۇلى

دەرەككوزى: Qazaquni.kz

23 پىكىر